ການຕໍ່ສູ້ກັນເພື່ອຄວບຄຸມເມືອງໃຫຍ່ແຫ່ງນຶ່ງຂອງ Ivory
Coast ຍັງດໍາເນີນສືບຕໍ່ມາ ຊຶ່ງພວກທະຫານທີ່ຈົງຣັກ
ພັກດີຕໍ່ປະທານາທິບໍດີ Laurent Gbagbo ທີ່ປົກຄອງ
ປະເທດໃນປັດຈຸບັນທໍາການຕ້ານຢັນຢູ່ຢ່າງແຂງແຮງ.
ພວກຊາວເມືອງແລະບັນດານັກຂ່າວຢູ່ໃນແລະໃນເຂດອ້ອມ
ແອ້ມນະຄອນ Abidjan ແຈ້ງໃຫ້ຊາບວ່າໄດ້ຍິນສຽງປືນຍິງ
ຕໍ່ສູ້ກັນແລະສຽງປືນໃຫຍ່ໃນວັນເສົາວານນີ້ ໃນລະຫວ່າງ
ການຄືບໜ້າໄປຢ່າງໄວໂດຍພວກທະຫານທີ່ທໍາການຕໍ່ສູ້
ເພື່ອທ່ານ Alassane Ouattara ທີ່ນາໆຊາດຮັບຮູ້ວ່າ
ເປັນປະທານາທິບໍດີຂອງ Ivory Coast ນັ້ນ.
ພວກກໍາລັງຂອງທ່ານ Ouattara ໄດ້ຍຶດເອົາສະຖານີ
ໂທລະພາບທີ່ລັດເປັນຜູ້ຄວບຄຸມເປັນເວລາສັ້ນໆໃນວັນ
ສຸກຜ່ານມານີ້. ແຕ່ຕົກມາວັນເສົາວານນີ້ ສະຖານີຕົກໄປ
ຢູ່ໃນກໍາມືຂອງພວກກໍາລັງທີ່ນິຍົມທ່ານ Gbagbo ທີ່ໃຊ້ສະຖານີດັ່ງກ່າວເພື່ອຮຽກຮ້ອງເອົາ
ກໍາລັງກອງໜຸນມາຊ່ອຍ.
ທ່ານ Damane Picasse ນັກຕໍ່ສູ້ຫົວຮຸນແຮງທີ່ນິຍົມທ່ານ Gbagbo ຮຽກຮ້ອງໃຫ້ທຸກໆຄົນໃນຄຸ້ມ Cocody ແລະ Yopougon ຊຶ່ງເປັນເຂດອ້ອມແອ້ມນະຄອນ Abidjan ຮວມທັງພວກຊາຍ ຍິງແລະເດັກນ້ອຍໃຫ້ພາກັນປົກປ້ອງປະທານາທິບໍດີ Gbagbo ເອົາໄວ້.
ຜູ້ຄົນສາມາດເຫັນພວກນັກຕໍ່ສູ້ຫົວຮຸນແຮງໄດ້ທີ່ພາກັນຍ່າງມຸ້ງໜ້າໄປຫາພວກຂົວແຫ່ງຕ່າງໆ
ເຂົ້າຫາໃນເມືອງ ຫລືພາກັນຮ້ອງເພັງໃນເຮືອຂ້າມຟາກທີ່ພວກເຂົາເຈົ້າຂີ່ຂ້າມໄປຍັງທໍານຽບ
ປະທານາທິບໍດີນັ້ນ.
ສະຫະປະຊາຊາດກ່າວວ່າ ພວກກໍາລັງຫົວນິຍົມທ່ານ Gbagbo ໄດ້ຍິງປືນໃສ່ພວກກໍາລັງຮັກສາສັນຕິພາບໃນວັນເສົາວານນີ້ ເຮັດໃຫ້ພວກໜ່ວຍຮັກສາສັນຕິພາບ 4 ຄົນໄດ້ຮັບບາດເຈັບຢ່າງສາຫັດ.
ໃນຂະນະດຽວກັນບັນດາກຸ່ມປັກປ້ອງສິດທິມະນຸດຮຽກຮ້ອງໃຫ້ທັງສອງຝ່າຍໃຊ້ຄວາມຍັຍຍັ້ງຫລັງຈາກມີລາຍງານວ່າ ປະຊາຊົນຫລາຍຮ້ອຍຄົນເສຍຊີວິດໃນວັນອັງຄານຜ່ານມາໃນເມືອງ Duekoue ໃນພາກຕາເວັນຕົກຂອງ Ivory Coast ນັ້ນ.
ສະພາພັນສະພາກາແດງນາໆຊາດ ກ່າວໃນວັນເສົາວານນີ້ວ່າ ປະຊາຊົນຢ່າງນ້ອຍ 800 ຄົນໄດ້ຖືກສັງຫານໝູ່ ໃນຂະນະດຽວກັນອົງການກຸສົນສາສະໜາກາໂຕລິກ Caritas ກ່າວວ່າ ຈໍານວນພວກເສຍຊີວິດແມ່ນຫລາຍກວ່ານັ້ນຊຶ່ງກະປະມານກັນວ່າເປັນຈໍານວນ 800 ຄົນ.
