ເອກອັກຄະລັດຖະທູດຄົນໃໝ່ຂອງ Ivory Coast ຫຼື
Cote d’Ivoire ປະຈຳອົງການສະຫະປະຊາຊາດກ່າວ
ໃນວັນພຸດວານນີ້ວ່າ ການຜິດຂ້ອງຕ້ອງຖຽງ ທີ່ຍັງດຳ
ເນີນຢູ່ຕໍ່ມາກ່ຽວກັບວ່າ ຜູ້ໃດເປັນຜູ້ຊະນະການເລືອກ
ຕັ້ງປະທານາທິບໍດີ ໃນເດືອນແລ້ວນັ້ນ ກໍາລັງຜັກດັນ
ໃຫ້ປະເທດຂອງທ່ານ ຫຍັບໃກ້ເຂົ້າໄປສູ່ການຂ້າລ້າງ
ເຊື້ອຊາດເຜົ່າພັນ.
ທ່ານ Youssofou Bamba ໃຫ້ທັດສະນະດັ່ງກ່າວ
ທີ່ນະຄອນນິວຢອກ ຫຼັງຈາກໄດ້ນຳສະເໜີສານແຕ່ງ
ຕັ້ງທ່ານ ຕໍ່ເລຂາທິການໃຫຍ່ອົງການສະຫະປະຊາຊາດ ທ່ານ Ban Ki-moon. ທ່ານ
Bamba ໄດ້ຖືກແຕ່ງຕັ້ງໂດຍທ່ານ Alassane Ouattara ທີ່ທາງອົງການສະຫະປະຊາ
ຊາດແລະປະຊາຄົມນາໆຊາດຮັບຮູ້ວ່າ ເປັນປະທານາທິບໍດີຂອງ Cote d’Ivoire ນັ້ນ.
ທັງທ່ານ Ouattara ແລະປະທານາທິບໍດີ Laurent Gbagbo ຕ່າງກໍກ່າວວ່າ ຕົນເປັນ
ຜູ້ຊະນະການເລືອກຕັ້ງປະທານາທິບໍດີຮອບສອງໃນວັນທີ 28 ພະຈິກຜ່ານມາ.
ທ່ານ Gbagbo ໄດ້ປະຕິເສດບໍ່ຍອມອອກຈາກຕຳແໜ່ງ ແລະອົງການສະຫະປະຊາຊາດ
ເວົ້າວ່າ ການຕໍ່ສູ້ຍາດແຍ່ງອຳນາດໄດ້ເຮັດໃຫ້ມີຜູ້ເສຍຊີວິດໄປແລ້ວຫຼາຍກວ່າ 170 ຄົນ.
ຂະນະດຽວກັນ ບັນດາຜູ້ນຳຂອງປະເທດ ໃນເຂດອາຟຣິກາຕາເວັນຕົກ ກ່າວໃນວັນພຸດ
ວານນີ້ວ່າ ພວກຕົນໄດ້ຕັດສິນໃຈ ຈະບໍ່ທຳການແຊກແຊງ ທາງທະຫານ ໃນເວລານີ້ເທື່ອ ຂະນະທີ່ພວກທູດຈາກກຸ່ມປະຊາຄົມເສດຖະກິດແຫ່ງອາຟຣິກາຕາເວັນຕົກຫຼື ECOWAS ມີແຜນການທີ່ຈະເຈລາຫາລືເພີ່ມຕື່ມກັບທ່ານ Gbagbo.
