ພວກກໍາລັງທີ່ຈົງຮັກພັກດີຕໍ່ປະທານາທິບໍດີ Alassane Ouattara ທີ່ໄດ້ຮັບຮູ້ຈາກນາໆຊາດ ໄດ້ປິດລ້ອມບ້ານພັກ ຂອງປະທານາທິບໍດີ Laurent Gbagbo ທີ່ບໍ່ ຍອມລົງຈາກອຳນາດແລະຍັງປົກຄອງປະເທດໃນປັດຈຸບັນໃນວັນພະຫັດມື້ນີ້ ຫລັງຈາກໄດ້ມີການປະທະກັນຢ່າງກະຈັດກະຈາຍຫລາຍບັ້ນລະຫວ່າງກໍາລັງສອງຝ່າຍໃນຄືນຜ່ານມານີ້.
ການປິດລ້ອມດັ່ງກ່າວມີຂຶ້ນໃນເວລາ 1 ມື້ຫລັງຈາກພວກກໍາລັງທີ່ສະໜັບສະໜຸນທ່ານ Alassane Ouattara ບຸກໂຈມຕີຂຸມລີ້ໄພຂອງທ່ານ Gbagbo ແຕ່ໄດ້ພາກັນຖອຍກັບຄືນໃນເວລາຕໍ່ມາຫລັງຈາກປະສົບການຕີໂຕ້ຄືນຢ່າງແຂງແຮງຈາກພວກທະຫານທີ່ນິຍົມທ່ານ Gbagbo ນັ້ນ.
ໃນວັນພະຫັດມື້ນີ້ ພວກເຮືອບິນເຮຄີຄອບເຕີຝຣັ່ງໄດ້ເຂົ້າໄປຊ່ອຍເອກອັກຄະລັດຖະທູດຍີ່ປຸ່ນປະຈໍາ Ivory Coast ອອກມາຈາກບ້ານພັກຂອງທ່ານທີ່ຕັ້ງຢູ່ໃນເຂດທີ່ມີການປະທະກັນລະຫວ່າງພວກກໍາລັງຂອງ ປະນາທີບໍດີທັງສອງທີ່ເປັນຄູ່ປໍລະປັກກັນນັ້ນ.
ທ່ານ Alain Juppe ລັດຖະມົນຕີການຕ່າງປະເທດຝຣັ່ງ ກ່າວວ່າ ອີສຣາແອນກໍໄດ້ຂໍຄວາມຊ່ອຍເຫລືອຈາກຝຣັ່ງເຊ່ນກັນເພື່ອຊ່ອຍອົບພະຍົບພວກນັກການທູດຂອງຕົນອອກຈາກ Ivory Coast ນັ້ນ.
ພວກກໍາລັງທີ່ຈົງຮັກພັກດີຕໍ່ທ່ານ Ouattara ໄດ້ເລີ່ມບຸກລຸກເຂົ້າໄປໃນບໍລິເວນບ້ານພັກຂອງທ່ານ Gbagbo ໃນວັນພຸດວານນີ້ ຫລັງຈາກທ່ານບໍ່ຍອມຮັບເອົາການປາໄຊໃນການເລືອກຕັ້ງປະທານາທິບໍດີ ແລະຍອມຈໍານົນນັ້ນ.
ບັນດາຜູ້ຊ່ອຍວຽກທ່ານ Ouattara ກ່າວວ່າ ກຳລັງຂອງທ່ານໄດ້ຮັບຄໍາສັ່ງໃຫ້ຈັບເປັນ ທ່ານ Gbagbo.
ປະເທດ Ivory Coast ໄດ້ປະສົບກັບວິກິດການດ້ານການເມືອງມາຕັ້ງແຕ່ເດຶອນທັນວາປີແລ້ວນີ້ ເວລາທ່ານ Gbagbo ບໍ່ຍອມຮັບເອົາຜົນຂອງການເລືອກຕັ້ງທີ່ສະແດງໃຫ້ເຫັນວ່າ ປະຊາຊົນ Ivory Coast ໄດ້ເລືອກເອົາທ່ານ Ouattara ເປັນປະທານາທິບໍດີນັ້ນ.
