ໃນວັນຈັນມື້ນີ້ ຈີນ ໄດ້ລາຍງານຕົວເລກໃໝ່ຂອງກໍລະນີໄວຣັສໂຄໂຣນາທີ່ຕ່ຳທີ່ສຸດຂອງເຂົາເຈົ້າ, ໃນຂະນະທີ່ 25 ເປີເຊັນຂອງປະຊາກອນ ອີຕາລີ ໄດ້ຖືກສັ່ງໃຫ້ກັກຕົວກວດໂຣກ ແລະ ຜູ້ໂດຍສານຈາກກຳປັ່ນສຳລານລຳນຶ່ງໄດ້ກຽມທີ່ຈະຂຶ້ນຝັ່ງໃນລັດ ຄາລິຟໍເນຍ ທາງພາກຕາເວັນຕົກຂອງ ສະຫະລັດ ຫຼັງຈາກບາງຄົນໄດ້ຖືກກວດພົບໄວຣັສ.
ບັນດາເຈົ້າໜ້າທີ່ສາທາລະນະສຸກຂອງ ຈີນ ໄດ້ກ່າວວ່າ ເຂົາເຈົ້າມີ 40 ກໍລະນີໃໝ່, ເຊິ່ງແມ່ນຕົວເລກທີ່ຕ່ຳທີ່ສຸດ ນັບຕັ້ງແຕ່ເດືອນມັງກອນເປັນຕົ້ນມາ ບໍ່ດົນກ່ອນທີ່ລັດຖະບານໄດ້ກຳນົດການຈຳກັດທີ່ເຄັ່ງຄັດໃສ່ການທ່ອງທ່ຽວ ແລະ ການເຕົ້າໂຮມກັນໃນຫຼາຍຕົວເມືອງ.
ປະເທດ ອິຕາລີ ໄດ້ເລີ່ມການກັກຕົວ ໃນພື້ນທີ່ຢູ່ທາງພາກເໜືອຂອງປະເທດ, ລວມທັງພາກພື້ນຕ່າງໆທີ່ປະກອບດ້ວຍເມືອງ ມິລານ ແລະ ເວນີິສ ໃນວັນອາທິດວານນີ້ ໃນຂະນະທີ່ຈຳນວນຜູ້ເສຍຊີວິດ ໄດ້ເພີ່ມຂຶ້ນ 133 ຄົນເປັນ 366 ຄົນ.
ການເດີນທາງເຂົ້າ ແລະ ອອກຈາກຂົງເຂດດັ່ງກ່າວ ຈະຖືກຈຳກັດຢ່າງເຄັ່ງຄັດຈົນຮອດຕົ້ນເດືອນໜ້າ, ໃນຂະນະທີ່ປະເທດອີຕາລີພະຍາມທີ່ຈະບັນເທົາຄວາມໄວຂອງການເສຍຊີວິດຈາກໄວຣັສດັ່ງກ່າວ. ຫໍພິພິຕະພັນ, ໂຮງລະຄອນ, ໂຮງຊີເນ ແລະ ສະຖານທີ່ບັນເທີງອື່ນໆ ກໍຖືກສັ່ງໃຫ້ປິດທົ່ວປະເທດເຊັ່ນກັນ.
ອິຕາລີ ຍັງໄດ້ຂໍໃຫ້ບັນດາແພດໝໍທີ່ບຳນານແລ້ວກັບມາເຮັດວຽກຄືນ ເພື່ອຊ່ວຍປິ່ນປົວຜູ້ເຄາະຮ້າຍຍ້ອນໄວຣັສໂຄໂຣນາ.
ໃນ ສະຫະລັດ, ມີຜູ້ເສຍຊີວິດ 21 ຄົນຈາກໄວຮັສດັ່ງກ່າວ ແລະ ມີຫຼາຍກວ່າ 500 ກໍລະນີໄດ້ຖືກລາຍງານ.
ກຳປັ່ນສຳລານ Grand Princess ໄດ້ທຳການລໍຖ້າຢູ່ນອກຊາຍຝັ່ງລັດ ຄາລິຟໍເນຍ ໃນຂະນະທີ່ບັນດາເຈົ້າໜ້າທີ່ໃນທ້ອງຖິ່ນ ແລະ ລັດຖະບານກາງ ໄດ້ວາງແຜນ ສຳລັບການຮັບມືກັບຜູ້ໂດຍສານ ແລະ ລູກເຮືອຂອງເຂົາເຈົ້າ, ເຊິ່ງບາງຄົນໃນນັ້ນຖືກກວດພົບໄວຣັສ.
ກຳປັ່ນລຳດັ່ງກ່າວຄາດວ່າ ຈະເຂົ້າທຽບທ່າໃນເມືອງ ໂອກແລນ ໃນວັນຈັນມື້ນີ້ ເພື່ອໃຫ້ຜູ້ໂດຍສານໄດ້ລົງຈາກກຳປັ່ນ. ຜູ້ທີ່ອາໄສຢູ່ໃນລັດຄາລິຟໍເນຍ ຈະຖືກນຳຕົວໄປສະຖານທີ່ຕ່າງໆຂອງກອງທັບໃນລັດນັ້ນ ເພື່ອກັກຕົວກວດໂຣກ 14 ວັນ, ໃນຂະນະທີ່ຜູ້ທີ່ອາໄສຢູ່ລັດອື່ນໆ ຈະຖືກນຳຕົວໄປຖານທັບຕ່າງໆໃນລັດ ເທັກຊັສ ແລະ ຈໍເຈຍ.
