ນາຍົກລັດຖະມົນຕີອີຕາລີ ທ່ານ Silvio Berlusconi ກ່າວວ່າ ທ່ານຈະລາອອກຈາກ
ຕໍາແໜ່ງຫລັງຈາກສະພາຮັບຜ່ານເອົາໂຄງການປະຕິຮູບດ້ານເສດຖະກິດທີ່ສໍາຄັນທີ່ສຸດ
ຕ່າງໆທີ່ມີວັດຖຸປະສົງເພື່ອເຮັດໃຫ້ເສດຖະກິດຂອງອີຕາລີມີສະຖຽນລະພາບນັ້ນ.
ທ່ານ Berlusconi ປະກາດເລື້ອງນີ້ໃຫ້ຮູ້ໃນວັນອັງຄານວານນີ້ຫລັງຈາກສູນເສຍສຽງ
ສ່ວນຫລາຍໃນສະພາແຫ່ງຊາດ ໃນລະຫວ່າງການລົງມະຕິຕາມປົກກະຕິ ກ່ຽວກັບການ
ເອົາມາດຕະການນຶ່ງວ່າດ້ວຍຮ່າງງົບປະມານໃນສະພາຕໍ່າ ເວລາພວກສະມາຊິກຂອງພັກ
ລັດຖະບານ 7 ທ່ານໂຕນໜີຈາກພັກ. ຮ່າງງົບປະມານດັ່ງກ່າວໄດ້ຮັບສຽງສະໜັບສະໜຸນ
308 ສຽງ ແຕ່ພວກຜູແທນຈໍານວນ 321 ທ່ານບໍ່ອອກສຽງໃນການລົງມະຕິກັນນັ້ນ.
ພວກຝ່າຍຄ້ານໄດ້ຮຽກຮ້ອງໃຫ້ທ່ານ Berlusconi ລາອອກຈາກຕໍາແໜ່ງຫລັງຈາກ
ພວກຜູ້ແທນໃນຈໍານວນຫລາຍກວ່າເຄິ່ງຢູ່ໃນສະພາທີ່ມີບ່ອນນັ່ງທັງໝົດ 630 ບ່ອນບໍ່
ຍອມລົງຄະແນນສຽງ.
ທ່ານ Berlusconi ກໍາລັງຖືກກົດດັນຈາກພວກຜູ້ນໍາເຂດຢູໂຣ ໃຫ້ຮັບຮອງເອົາຮ່າງງົບ
ປະມານທີ່ຕັດການໃຊ້ຈ່າຍລົງ ເພື່ອຫລີກລ່ຽງວິກິດການດ້ານການເງິນ ຄືກັນກັບວິກິດ
ການທີ່ເກີດຂຶ້ນໃນປະເທດກຣີສໃນປັດຈຸບັບນີ້. ຄາດວ່າທັງສອງສະພາຈະລົງມະຕິກັນ
ກ່ຽວກັບແຜນການປະຕິຮູບດ້າງງົບປະມານຂອງທ່ານ ໃນເດືອນນີ້.
ທ່ານ Berlusconi ໄດ້ກ່າວເນ້ນອີກໃໝ່ໃນວັນພຸດມື້ນີ້ວ່າ ທ່ານຈະລາອອກຈາກຕໍາແໜ່ງ
ໃນເວລາໄວເທົ່າທີ່ຈະໄວໄດ້ຫລັງຈາກຮ່າງກົດໝາຍວ່າດ້ວຍງົບປະມານໄດ້ຖືກຮັບຮອງເອົາ.
ນອກນັ້ນ ທ່ານ Berlusconi ຍັງໄດ້ກ່າວກັບໜັງສືພິມ La Tampa ຂອງອີຕາລີ ວ່າ ທ່ານ
ມອງເຫັນວ່າ ອີຕາລີຈະຈັດການເລືອກຕັ້ງຂຶ້ນໃນຕົ້ນປີ 2012 ຈະມານີ້ ແລະທ່ານຈະບໍ່ສະ
ມັກເຂົ້າຮັບຕໍາແໜ່ງໃດ ໃນການເລືອກຕັ້ງຄັ້ງຕໍ່ໜ້ານີ້.
ທ່ານ Berlusconi ໄດ້ເລືອກເອົາທ່ານ Angelino Alfano ອະດີດລັດຖະມົນຕີຍຸຕິທໍາ
ເປັນຜູ້ສະມັກຮັບເລືອກຕັ້ງຂອງພັກເພື່ອຊີງເອົາຕໍາແໜ່ງນາຍົກລັດຖະມົນຕີນັ້ນ.
ອິຕາລີເປັນປະເທດທີມີການເສດຖະກິດໃຫຍ່ອັນດັບສາມໃນເຂດທີ່ໃຊ້ເງິນຢູໂຣ ແລະເປັນ
ເສດຖະກິດໃຫຍ່ທີ່ສຸດອັນດັບ 7 ຂອງໂລກ. ແຕ່ປະເຊີນກັບວິກິດການດ້ານເສດຖະກິດທີ່
ເກີດຈາກໜີ້ສິນຂອງລັດຖະບານທີ່ກໍາລັງເພີ່ມທະວີຂຶ້ນນັບມື້ນັ້ນ.
ເບິ່ງວີດີໂອລາຍງານກ່ຽວກັບອີຕາລີ:
