ຈໍານວນຜູ້ເສຍຊີວິດໄດ້ເພີ່ມຂຶ້ນເປັນ 6 ຄົນແລ້ວ ໃນເຫດແຜ່ນດິນໄຫວ ທີ່ມີຄວາມແຮງແທກໄດ້ເຖິງ 6.0 ຣິກເຕີ ທີ່ໄດ້ສັ່ນສະເທືອນພາກເໜືອຂອງອິຕາລີ ກ່ອນພະອາທິດຂຶ້ນໃນເຊົ້າວັນອາທິດວານນີ້ ໂດຍໄດ້ທໍາລາຍຕຶກອາຄານແລະໂບດທີ່ເກົ່າແກ່ຫຼາຍຮ້ອຍປີ ຢູ່ໃນທົ່ວຂົງເຂດນັ້ນ.
ກົມສໍາຫລວດທໍລະນີວິທະຍາຂອງສະຫະລັດ ກ່າວວ່າ ຈຸດສູນກາງຂອງແຜ່ນດິນໄຫວຄັ້ງນີ້ ແມ່ນຢູ່ຫ່າງຈາກເມືອງ Bologna ໄປທາງພາກຕາເວັນຕົກສຽງເໜືອປະມານ 35 ກິໂລແມັດ.
ແຜ່ນດິນໄຫວເກີດຂຶ້ນໃນຕອນເຊົ້າມືດ ປະມານ 4 ໂມງເຊົ້າຕາມເວລາໃນທ້ອງຖິ່ນ ຊຶ່ງພາໃຫ້ຜູ້ຄົນຢ້ານກົວແລະແລ່ນອອກໄປສູ່ທ້ອງຖະໜົນ ແລະກໍຍັງມີແຜ່ນດິນໄຫວລະດັບນ້ອຍກ່ວາ ຫລື aftershocks ຕິດຕາມມາອີກຫຼາຍຄັ້ງ ຊຶ່ງອັນທີ່ຮ້າຍແຮງສຸດນັ້ນ ແມ່ນມີຄວາມແຮງແທກໄດ້ 5.1 ຣິກເຕີ.
ແຜ່ນດິນໄຫວຄັ້ງນີ້ໄດ້ເຮັດໃຫ້ຕຶກອາຄານແລະໂບດທີ່ເກົ່າແກ່ ຊຶ່ງບາງແຫ່ງກໍມີອາຍຸໄດ້ເຖິງ 1500 ປີ ນັ້ນ ກາຍມາເປັນກອງຊາກຫັກພັງ. ກະຊວງວັດທະນະທໍາຂອງອິຕາລີກ່າວວ່າ ຄວາມເສຍຫາຍແມ່ນໃຫຍ່ຫຼວງສົມຄວນ.
ນາຍົກລົດຖະມົນຕີອິຕາລີ ທ່ານ Mario Monti ໄດ້ສົ່ງຄວາມເສົ້າສະລົດໃຈໄປຍັງພວກທີ່ໄດ້ຮັບເຄາະຮ້າຍ ແລະທ່ານກໍວາງແຜນທີ່ຈະອອກຈາກກອງປະຊຸມສຸດຍອດ NATO ທີ່ຊີຄາໂກ ກ່ອນກໍານົດ ເພື່ອກັບຄືນເມືອບ້ານ.