ມີ 11 ຄົນ ໄດ້ເສຍຊີວິດ ຮວມທັງຕຳຫຼວດ 7 ຄົນ ແລະອີກ 36 ຄົນ ໄດ້ຮັບບາດເຈັບໃນເຫດລະເບີດ ໃນເຂດໃຈກາງຂອງນະຄອນ Istanbul ໃນຕອນເຊົ້າ ຂອງເວລາໄປລ້າໄປການ ໃນວັນອັງຄານມື້ນີ້ ຊຶ່ງຜູ້ປົກຄອງນະຄອນ Istanbul ໄດ້ໃຫ້ການຢືນຢັນນັ້ນ.
ລົດຄັນນຶ່ງທີ່ບັນຈຸລະເບີດຢ່າງຫຼວງຫຼາຍ ໄດ້ແຕກຂຶ້ນ ໃນຂະນະທີ່ແລ່ນຜ່ານລົດເມ ທີ່ມີລາຍງານວ່າ ເຕັມໄປດ້ວຍພວກຕຳຫຼວດປາບຈາລະຈົນ.
ມີລົດພະຍາບານຫຼາຍໆຄັນ ໄດ້ຖືກສົ່ງໄປຍັງສະຖານທີ່ເກີດເຫດ ທີ່ຄຸ້ມ Vezneciler ໃນເຂດໃຈກາງເມືອງ ໃກ້ໆກັບມະຫາວິທະຍາໄລ Istanbul ແລະ ທີ່ຈະຕຸລັດ Bayazit ຊຶ່ງເປັນສະຖານທີ່ນິຍົມໄປຢ້ຽມຂອງພວກນັກທ່ອງທ່ຽວ.
ຍັງບໍ່ມີກຸ່ມໃດ ອອກມາອ້າງເອົາຄວາມຮັບຜິດຊອບໃນການໂຈມຕີຄັ້ງນີ້ເທື່ອ ເຖິງແມ່ນວ່າເມື່ອໄວໆມານີ້ ກຸ່ມລັດອິສລາມ ແມ່ນໄດ້ທຳການໂຈມຕີໃນເທີກີກໍຕາມ. ພັກກຳມະກອນຊາວເຄີດ ຫຼື PKK ໄດ້ຕົກເປັນເປົ້າໝາຍໃສ່ ຂອງພວກຕຳຫຼວດເທີກີ ແລະພວກທະຫານ ນັບຕັ້ງແຕ່ເດືອນກໍລະກົດປີກາຍເປັນຕົ້ນມາ ໃນການຕໍ່ສູ້ເພື່ອຈະແຍກຕົວອອກເປັນເອກກະລາດ ໃນພາກຕາເວັນອອກສຽງໃຕ້ຂອປະເທດນັ້ນ.
