ລັດຖະມົນຕີປ້ອງກັນປະເທດສະຫະລັດທ່ານ Leon Panetta ໄດ້ຕໍານິຕິຕຽນສະມາຊິກ
ລັດຖະສະພາສະຫະລັດທີ່ໄດ້ໂຈະການຊ່ອຍເຫຼືອມູນຄ່າ 200 ລ້ານໂດລ່າສຳຫຼັບຈະນຳ
ໄປໃຊ້ ໃນໂຄງການພັດທະນາຕ່າງໆ ຢູ່ໃນເຂດປົກຄອງ ຂອງປາແລສໄຕນ໌.
ທ່ານ Panetta ໄດ້ກ່າວໃນວັນຈັນວານນີ້ ຢູ່ກອງປະຊຸມຖະແຫຼງຂ່າວທີ່ Tel Aviv ກັບລັດ
ຖະມົນຕີປ້ອງກັນປະເທດຂອງ Isreal, ທ່ານ Ehud Barak ວ່າ ເວລານີ້ບໍ່ແມ່ນເວລາທີ່
ຈະມາໂຈະເງິນຊ່ອຍເຫຼືອດັ່ງກ່າວ. ທ່ານຍັງກ່າວອີກວ່າ ເວລານີ້ເປັນໄລຍະທີ່ຫົວລ້ຽວຫົວຕໍ່
ທີ່ສໍາຄັນຍິ່ງຢູ່ໃນຂົງເຂດ ໃນຂະນະທີ່ເຈົ້າໜ້າທີ່ຂອງສະຫະລັດຍັງສືບຕໍ່ຮຽກຮ້ອງໃຫ້ຝ່າຍ
ປາແລສໄຕນ໌ແລະອິສຣາແອລ ທຳການເຈລະຈາເພື່ອໃຫ້ບັນລຸຂໍ້ຕົກລົງສັນຕິພາບນັ້ນ.
ກະຊວງການຕ່າງປະເທດຂອງສະຫະລັດກ່າວວ່າ ລັດຖະບານ ຂອງທ່ານ Obama
ກໍາລັງສົນທະນາຫາລືຢ່າງຂຸ້ນຂ້ຽວ ກັບສະມາຊິກລັດຖະສະພາຄົນສໍາຄັນໆ ທີ່ໄດ້ໂຈະການ
ຊ່ອຍເຫຼືອດັ່ງກ່າວ. ລັດຖະບານຂອງປາແລສ ໄຕນ໌ ແມ່ນໄດ້ກາງຕໍ່ອາໄສການຊ່ອຍເຫຼືອ
ຂອງຕ່າງປະເທດເພື່ອຊ່ອຍປະ ກອບເປັນງົບປະມານປະຈໍາປີຂອງຕົນນັ້ນ.
ພວກເຈົ້າໜ້າທີ່ຂອງອົງການຊ່ອຍເຫຼືອລະຫວ່າງປະເທດຂອງສະຫະລັດຫຼືຢູເສດໃຫ້ການ
ຢືນຢັນວ່າ ບາງໂຄງການຈະໄດ້ຮັບຜົນກະທົບຈາກການໂຈະການໃຫ້ເງິນຊ່ອຍເຫຼືອຂອງ
ສະພາດັ່ງກ່າວ, ແຕ່ວ່າບໍ່ໄດ້ບອກລາຍລະອຽດ ໃດໆໃຫ້ຊາບ. ເຈົ້າໜ້າທີ່ປາແລສໄຕນ໌
ປະນາມການເຄື່ອນໄຫວນີ້ວ່າ ເປັນ ການຂັດຕໍ່ການສ້າງສັນຕິພາບໂດຍເວົ້າວ່າ ມັນຈະບໍ່
ສາມາດຂັດຂວາງບໍ່ໃຫ້ພວກເຂົາເຈົ້າຊອກສະແຫວງຫາຊ່ອງທາງເພື່ອເຂົ້າເປັນສະມາຊິກ
ຂອງອົງການສະຫະປະຊາຊາດໂດຍເຕັມຂອງປະເທດປາແລສໄຕນ໌ໄດ້.
ສະມາຊິກລັດຖະສະພາສະຫະລັດໄດ້ໂຈະການໃຫ້ເງິນຊ່ອຍດັ່ງກ່າວເພື່ອເປັນ ການຕອບໂຕ້
ຕໍ່ການຂໍຮ້ອງຂອງທາງການປາແລສໄຕນ໌ ທີ່ຢາກໃຫ້ສະຫະປະ ຊາຊາດຮັບຮູ້ການເຂົ້າເປັນ
ສະມາຊິກຂອງຕົນ ຊຶ່ງໄດ້ຮັບການຄັດຄ້ານຈາກສະຫະລັດແລະອິສຣາແອລ ທີ່ກ່າວວ່າ ການເຈລະຈາກັນໂດຍກົງແມ່ນຊ່ອງທາງດຽວເທົ່ານັ້ນໄປສູ່ສັນຕິພາບໃນພາກຕາເວັນອອກກາງ.
ໃນເຊົ້າວັນຈັນວານນີ້ທ່ານ Panetta ໄດ້ທຳການໂອ້ລົມສົນທະນາຕ່າງຫາກກັບນາຍົກ
ລັດຖະມົນຕີອິສຣາແອລທ່ານ Benjamin Netanyahu ແລະລັດ ຖະມົນຕີປ້ອງກັນປະເທດ
ທ່ານ Ehud Barak. ທ່ານຍັງໄດ້ພົບກັບປະທານາທິບໍດີຂອງປາແລສໄຕນ໌ທ່ານ Mahmoud
Abbas ແລະນາຍົກລັດຖະມົນຕີ ທ່ານ Salam Fayyad ອີກ. ທ່ານມີກຳນົດເດີນທາງໄປຍັງ
ອີຈິບໃນວັນອັງຄານມື້ນີ້.
