ອິສຣາແອລ ກັບປາແລສໄຕນ໌ ເລີ້ມຢຸດຍິງກັນໃໝ່ອີກ 72 ຊົ່ວໂມງ (ສະໄລດ໌/ວີດີໂອ)

11.08.2014

ອິສຣາແອລ ແລະກຸ່ມຮາມັສ ເລີ້ມການຢຸດຍິງເປັນເວລາ 72 ຊົ່ວ
ໂມງກັນຄືນອີກໃໝ່ ອຳນວຍໂອກາດຄັ້ງໃໝ່ໃຫ້ທັງສອງຝ່າຍທີ່
ເປັນຄູ່ສົງຄາມກັນ ໄດ້ສືບຕໍ່ການເຈລະຈາກັນ ໃຫ້ມີການຢຸດຍິງທີ່
ຍືນຍົງ ເພື່ອຍຸດຕິການສູ້ລົບກັນມາເປັນເວລານຶ່ງເດືອນ ທີ່ໄດ້ເຮັດ
ໃຫ້ປະຊາຊົນເສຍຊີວິດໄປແລ້ວ 2 ພັນຄົນ.

ອີຈິບ ໄດ້ໄກ່ເກ່ຍການຢຸດຍິງ ທີ່ມີຜົນບັງຄັບໃຊ້ ຕັ້ງແຕ່ເຊົ້າວັນຈັນ
ມື້ນີ້ເປັນຕົ້ນໄປ ແລະເປັນເຈົ້າພາບຈັດໃຫ້ມີການພົບປະເຈລະຈາ
ກັນລະຫວ່າງບັນດາຜູ້ຕາງໜ້າຂອງທັງສອງຝ່າຍທີ່ນະຄອນຫຼວງ
ໄຄໂຣ.

ການຢຸດຍິງອີກ 72 ຊົ່ວໂມງ ຢູ່ເຂດກາຊາ

ທ່ານພັນກີມູນ ເລຂາທິການໃຫຍ່ສະຫະປະຊາຊາດ ໄດ້ສະແດງຄວາມຍິນດີນຳການ
ຢຸດຍິງກັນນີ້ ແລະໄດ້ສະແດງ “ຄວາມຫວັງທີ່ແຂງແຮງ” ວ່າອິສຣາແອລ ແລະກຸ່ມ
ຮາມັສ ສາມາດຕົກລົງກັນໄດ້ ເພື່ອຍຸດຕິບັນຫາຂັດແຍ້ງກັນເພື່ອຜົນປະໂຫຍດຂອງ
ພວກພົນລະເຮືອນທັງປວງ.

ທ່ານພັນກີມູນ ຍັງກ່າວເຊັ່ນກັນວ່າ ສະຫະປະຊາຊາດຕຽມພ້ອມທີ່ຈະໃຫ້ການຊ່ອຍ
ເຫຼືອ ໃນການຈັດຕັ້ງປະຕິບັດຂໍ້ຕົກລັງກັນໃດໆ ທີ່ນຳມາແຫ່ງສັນຕິພາບ ແລະໂອກາດສຳລັບ “ການສ້າງສາແລະການພັດທະນາເຂດກາຊາທີ່ຕ້ອງການທີ່ສຸດນັ້ນຄືນໃໝ່.”