ກະຊວງການຕ່າງປະເທດ ສະຫະລັດ ກ່າວວ່າ ລັດຖະມົນຕີການຕ່າງ ປະເທດ ທ່ານ John Kerry ບໍ່ໄດ້ຖິ້ມໂທດໃສ່ຝ່າຍໜຶ່ງຕໍ່ການເຄື່ອນໄຫວໃຊ້ມີດແທງຄົນໂດຍຊາວ ປາເລສໄຕນ໌ ແລະ ການໂຈມຕີຫຼາຍຄັ້ງຕໍ່ຄົນ ອິສຣາແອລ, ແຕ່ທ່ານພຽງແຕ່ຢາກເຫັນຄວາມຮຸນແຮງດັ່ງ ກ່າວນັ້ນຢຸດເຊົາລົງ.
ໂຄສົກກະຊວງການຕ່າງປະເທດທ່ານ John Kirby ໄດ້ກ່າວໃນວັນພຸດວານນີ້ວ່າ ທ່ານ Kerry ຈະເດີນທາງໄປເຂດດັ່ງກ່າວ ໃນໄວໆນີ້ເພື່ອຫາທາງຟື້ນຟູຄວາມສະຫງົບ ແລະ ໃຫ້ໂອກາດໃນການເຈລະຈາສັນຕິພາບອີກຄັ້ງໜຶ່ງ.
ທ່ານ Kirby ໄດ້ກ່າວວ່າ ທ່ານລັດຖະມົນຕີເຊື່ອວ່າ ການໂຈມຕີຫຼາຍຄັ້ງຂອງຊາວ ປາເລສນໄຕນ໌ ແລະ ການສືບຕໍ່ເຄື່ອນໄຫວຕັ້ງຖິ່ນຖານໃໝ່ຂອງຊາວ ຢິວ ໄດ້ເຮັດໃຫ້ໂອກາດສຳລັບການແກ້ໄຂບັນຫາແບບ ມີສອງລັດ ຕົກຢູ່ໃນອັນຕະລາຍ.
ອິສຣາແອລ ໄດ້ສົ່ງທະຫານຫຼາຍຮ້ອຍຄົນ ກະຈາຍໄປທົ່ວປະເທດເພື່ອຊ່ວຍເຫຼືອຕຳຫຼວດ ໃນການຕ້ານໄພຂົ່ມຂູ່ ຈາກການໂຈມຕີຂອງຊາວ ປາເລສໄຕນ໌ ທີ່ໄດ້ເຮັດໃຫ້ຊາວ ຢິວ ຢ່າງໜ້ອຍ 7 ຄົນເສຍຊີວິດ ແລະ ໄດ້ແຜ່ກະຈາຍຄວາມຢ້ານກົວໄປທົ່ວ ອິສຣາແອລ. ຊາວ ປາ
ເລສໄຕນ໌ 31 ຄົນກໍໄດ້ເສຍຊີວິດໃນເຫດການທີ່ເກີດຂຶ້ນເມື່ອບໍ່ດົນມານີ້.
ຄະນະຮັບຜິດຊອບເລື່ອງຄວາມໝັ້ນຄົງ ຂອງລັດຖະບານອິສຣາແອລ ໄດ້ອະນຸຍາດໃຫ້ຕຳຫຼວດ ປິດກັ້ນຄຸ້ມຂອງຊາວ ອາຣັບ ໃນນະຄອນ Jerussalem ເຊິ່ງເປັນທີ່ມາຂອງນັກໂຈມຕີຫຼາຍຄົນ. ຕຳຫຼວດຍັງໄດ້ຕັ້ງສິ່ງກີດຂວາງໃນເຂດຂອງຊາວ ປາເລສໄຕນ໌ ທາງພາກຕາເວັນອອກຂອງນະຄອນ Jerussalem ແລະ ກ່າວວ່າຊັບສິນຂອງ “ພວກກໍ່ການຮ້າຍ” ຈະຕ້ອງຖືກຍຶດເອົາ ແລະ ສິດທິໃນການອາໄສຢູ່ຢ່າງຖາວອນຂອງພວກເຂົາຈະໄດ້ຖືກຖອນຄືນ.
ຫົວໜ້າຄວາມໝັ້ນຄົງພາຍໃນຂອງ ອິສຣາແອລ ທ່ານ Gilad Erdan ໄດ້ກ່າວໃນວັນພຸດ ວານ ນີ້ວ່າ ສົບຂອງຊາວປາເລສໄຕນ໌ ທີ່ຖືກຂ້າຕາຍໃນການໂຈມຕີຊາວ ອິສຣາແອລ ຈະບໍ່ຖືກສົ່ງກັບຄືນໄປໃຫ້ຄອບຄົວຂອງພວກເຂົາ. ທ່ານ Erdan ໄດ້ກ່າວວ່າ ພວກເຂົາບໍ່ຄວນໄດ້ຮັບຄວາມ “ເຄົາລົບນັບຖື” ສຳລັບການຝັງສົບທີ່ຖືກຕ້ອງຕາມປະເພນີ. ທ່ານໄດ້ກ່າວວ່າ ງານສົ່ງສະການຂອງຊາວ ປາເລສໄຕນ໌ ຫຼາຍຄັ້ງໄດ້ກາຍເປັນ “ການສະແດງຄວາມສະ ໜັບສະໜູນຕໍ່ການກໍ່ການຮ້າຍ ແລະ ຍຸຍົງໃຫ້ມີການຄາດຕະກຳ.”
