ກະຊວງສາທາລະນະສຸກຂອງ ເລບານອນ ແລະສື່ມວນຊົນທ້ອງຖິ່ນລາຍງານ ວ່າ ການໂຈມຕີຂອງ ອິສຣາແອລ ໃນຕອນເຊົ້າວັນສຸກມື້ນີ້ ສົ່ງຜົນເຮັດໃຫ້ນັກ ຂ່າວເສຍຊີວິດຢ່າງໜ້ອຍ 3 ຄົນ, ແລະບາດເຈັບອີກຫຼາຍຄົນ ໃນຂະນະທີ່ພວກ ເຂົາເຈົ້ານອນຢູ່ໃນເຮືອນພັກທີ່ນໍາໃຊ້ສໍາລັບສື່ມວນຊົນໃນເມືອງ ຮາສບາຢາ (Hasbaya) ທີ່ຕັ້ງຢູ່ທາງພາກໃຕ້ຂອງ ເລບານອນ.
ໃນຈໍານວນຜູ້ເສຍຊີວິດເຫຼົ່ານັ້ນ ແມ່ນຜູ້ເຮັດໜ້າທີ່ເປັນມືກ້ອງ ທ່ານ ກາສຊານ ນັດຈາ (Ghassan Najjar) ແລະນັກວິສະວະກອນ ທ່ານ ໂມຮໍາເມັດ ເຣດາ (Mohamed Reda) ຈາກອົງການຂ່າວ ອາລ-ມາຢາດີນ (Al-Mayadeen) ທີ່ສະຫນັບສະຫນູນ ອີຣ່ານ, ພ້ອມດ້ວຍຜູ້ເປັນມືກ້ອງ ທ່ານ ວິສຊາມ ແຄສເຊິມ (Wissam Qassem) ທີ່ເຮັດວຽກໃຫ້ອົງການຂ່າວ ອາລ-ມານາ (Al-Manar) ຂອງກຸ່ມ ເຮັສໂບລລາ (Hezbollah), ໂດຍອົງການຂ່າວທັງສອງແຫ່ງ ໄດ້ອອກມາເປີດເຜີຍໃນຖະແຫຼງການແຍກກັນ.
ການໂຈມຕີດັ່ງກ່າວ ໄດ້ກາຍມາເປັນມື້ທີ່ຮ້າຍແຮງທີ່ສຸດສໍາລັບສື່ມວນຊົນໃນຮອບນຶ່ງປີຂອງການປະທະກັນລະຫວ່າງທະຫານ ອິສຣາແອລ ແລະພວກຫົວຮຸນແຮງເຮັສໂບລລາໃນ ເລບານອນ.
ບໍ່ມີການສະແດງຄວາມເຫັນໃດໆໃນທັນທີຈາກ ອິສຣາແອລ, ເຊິ່ງໂດຍທົ່ວໄປ ໄດ້ແລ້ວ ມັກອອກມາປະຕິເສດການວ່າ ມີການໂຈມຕີໂດຍເຈດຕະນາຕໍ່ບັນດາ ນັກຂ່າວ.
ມີນັກຂ່າວເສຍຊີວິດຈາກການໂຈມຕີຂອງ ອິສຣາແອລ ໃນ ເລບານອນ ທີ່ຜ່ານມາ 5 ຄົນ ລະຫວ່າງມີການປະທະກັນ, ໃນນັ້ນ ລວມທັງ ທ່ານ ອິສຊາມ ອັບດາລລະ (Issam Abdallah), ນັກຂ່າວຈາກອົງການຂ່າວ Reuters ນໍາອີກດ້ວຍ.
ເມືອງ ຮາສບາຢາ, ເປັນເມືອງທີ່ອາໄສຢູ່ໂດຍຊາວ ມຸສລິມ ແລະ ຊາວ ຄຣິສຕຽນ, ເຊິ່ງມີການໂຈມຕີໃນເຂດຊານເມືອງດັ່ງກ່າວໃນບໍ່ເທົ່າໃດອາທິດ ທີ່ຜ່ານມາ. ແຕ່ວັນສຸກມື້ນີ້, ໃນເວລາປະມານ 3 ໂມງເຊົ້າ ຕາມເວລາຢູ່ໃນ ທ້ອງຖິ່ນ, ແມ່ນການໂຈມຕີຄັ້ງທໍາອິດໃນຕົວເມືອງແຫ່ງນີ້.
ທ່ານ ຊີອາດ ມາກາຣີ (Ziad Makary), ລັດຖະມົນຕີກະຊວງຖະແຫຼງຂ່າວ ຂອງ ເລບານອນ ກ່າວວ່າ “ນີ້ແມ່ນອາຊະຍາກໍາສົງຄາມ.” ມີນັກຂ່າວຢ່າງ ໜ້ອຍ 18 ຄົນຈາກອົງການສື່ມວນຊົນ 6 ແຫ່ງ, ລວມທັງ ສກາຍ ນິວສ (Sky News), ອາລ-ຈາຊີຣາ (Al-Jazeera) ແລະວິທະຍຸກະຈາຍສຽງຂອງ ເລບານອນ ທີ່ພາກັນພັກເຊົາຢູ່ເຮືອນພັກດັ່ງກ່າວມານັ້ນ.
ທ່ານ ມູຮໍາມັດ ຟາຮາດ (Muhammad Farhat), ນັກຂ່າວຂອງອົງການຂ່າວ ເລບານອນ ອາລ-ຈາດີດ (Al-Jadeed) ກ່າວຕໍ່ອົງການຂ່າວ Reuters ວ່າ “ພວກເຮົາໄດ້ຍິນເຮືອບິນ ບິນໃນໄລຍະຕໍ່າຫຼາຍ, ນັ້ນຄືສິ່ງທີ່ເຮັດໃຫ້ພວກເຮົາ ຕື່ນຂຶ້ນມາ, ແລະຈາກນັ້ນ ພວກເຮົາກໍໄດ້ຍິນສຽງຂອງລູກສອນໄຟສອງລູກ.”
ລາວກ່າວວ່າ ເຮືອນພັກຫຼາຍແຫ່ງຖືກທໍາລາຍ. ວີດີໂອຂອງລາວສະແດງໃຫ້ ເຫັນລົດປີ້ນຫງາຍ ແລະໄດ້ຮັບຄວາມເສຍຫາຍ, ເຊິ່ງບາງເຄື່ອງໝາຍຂຽນວ່າ “ນັກຂ່າວ.”
ຟໍຣັມສະແດງຄວາມຄິດເຫັນ