ປະທານາທິບໍດີປາແລສໄຕນ໌ ທ່ານ Mahmoud Abbas ກ່າວຕໍ່ກອງປະຊຸມ ສະມັດຊາໃຫຍ່ ອົງການສະຫະປະຊາຊາດ ໃນວັນພະຫັດນີ້ວ່າ ການຂະຫຍາຍ ການຕັ້ງຖິ່ນຖານຂອງອິສຣາແອລໃນເຂດຍຶດຄອງຢູ່ຝັ່ງຕາເວັນຕົກຂອງແມ່ນ້ຳຈໍແດັນກຳລັງທຳລາຍທຸກຄວາມຫວັງ ໃນການແກ້ໄຂແບບມີສອງລັດສອງປະເທດຄຽງຄູ່ກັນ ຕໍ່ບັນຫາຂັດແຍ້ງທີ່ມີມາເປັນເວລາດົນນານ ລະຫວ່າງອິສຣາແອລແລະບັນດາປະເທດເພື່ອນບ້ານອາຣັບ.
ທ່ານ Abbas ກ່າວວ່າ “ອັນທີ່ ລັດຖະບານອິສຣາແອລ ກຳລັງດຳເນີນຢູ່ ໃນການສືບຕໍ່ແຜນການຂະຫຍາຍການຕັ້ງຖິ່ນຖານຈະທຳລາຍຕໍ່ແມ່ນຫຍັງກໍຕາມທີ່ອາດຍັງຫຼົງເຫຼືອ ຢູ່ສຳລັບການແກ້ໄຂ ແບບມີສອງລັດສອງປະເທດຄຽງຄູ່ກັນ ຢູ່ຕາມຊາຍແດນປີ 1967 ນັ້ນ.”
ນາຍົກລັດຖະມົນຕີອິສຣາແອລ ທ່ານ Benjamin Netanyahu ໄດ້ປະຕິເສດ ຕໍ່ການກ່າວອ້າງຂອງທ່ານ Abbas ແລະເວົ້າວ່າ “ຂ້າພະເຈົ້າພ້ອມແລ້ວ ທີ່ຈະເຈລະຈາ ກ່ຽວ ກັບລາຍລະອຽດຂອງສະຖານະພາບຂັ້ນສຸດທ້າຍ ແຕ່ສິ່ງນຶ່ງທີ່ຂ້າພະເຈົ້າຈະບໍ່ຍອມເຈ ລະຈາ ກໍຄືສິດທິໃນການມີລັດອິສຣາແອລ ພຽງປະເທດດຽວເທົ່ານັ້ນ.”
ທ່ານ Netanyahu ໄດ້ເຊື້ອເຊີນໃຫ້ທ່ານ Abbas ໄປກ່າວຄຳປາໄສຕໍ່ສະພາແຫ່ງຊາດ Knesset ຂອງອິສຣາແອລແລະກ່າວວ່າ ເພື່ອເປັນການຕອບແທນທ່ານຢາກຈະໂອ້ລົມໂດຍກົງກັບສະພານິຕິບັນຢັດຂອງປາແລສໄຕນ໌.”
ຊາວປາແລສໄຕນ໌ ໄດ້ປະຕິເສດຕໍ່ການສະເໜີໃນຄັ້ງຜ່ານມາ ຂອງທ່ານ Netanyahu ກ່ຽວກັບການພົບປະໃນທຳນອງນີ້ ໂດຍກ່າວວ່າ ທ່າທີແບບຫົວແຂງກະດ້າງຂອງທ່ານ ກ່ຽວກັບບັນຫາໃຈກາງຕ່າງໆເຮັດໃຫ້ການໂອ້ລົມກັນເປັນໄປບໍ່ໄດ້.
ທ່ານ Netanyahu ໄດ້ປະຕິເສດ ຕໍ່ແຜນການທີ່ຈະໂຈະການຕັ້ງຖິ່ນຖານຂອງຊາວຢິວ ໃສ່ດິນອາຣັບຢູ່ໃນເຂດຝັ່ງຕາເວັນຕົກຂອງແມ່ນ້ຳຈໍແດັນ. ນອກນັ້ນແລ້ວທ່ານຍັງໄດ້ປະ ຕິເສດບໍ່ຮັບຮູ້ດິນແດນອິສຣາແອລ ກ່ອນສົງຄາມອາຣັບ ກັບອິສຣາແອລ ປີ 1967 ເພື່ອເປັນຈຸດເລີ້ມຕົ້ນໃນການເຈລະຈາຊຶ່ງນັ້ນອາດຈະໝາຍຄວາມວ່າການຄວບຄຸມນະຄອນເຈຣູຊາແລັມຮ່ວມກັນກັບຊາວປາແລສໄຕນ໌ ແລະການປັບປ່ຽນ ທີ່ສຳຄັນອື່ນໆ ກ່ຽວກັບເລື້ອງເຂດນ້ຳແດນດິນ.
ນາຍົກລັດຖະມົນຕີອິສຣາແອລກ່າວວ່າ ການແບ່ງແຍກໃດໆກໍຕາມຂອງນະຄອນເຈຣູ ຊາແລັມ ແມ່ນເປັນທີ່ຮັບເອົາບໍ່ໄດ້ ແລະທ່ານໄດ້ປະຕິເສດທີ່ຈະພິຈາລະນາຖອນການຕັ້ງຖິ່ນຖານໃດໆຂອງຊາວຢິວຢູ່ໃນດິນແດນຂອງປາແລສໄຕນ໌.
ທ່ານ Ban Ki-moon ເລຂາທິການໃຫຍ່ຂອງອົງການສະຫະປະຊາຊາດທີ່ກຳລັງຈະພົ້ນ ຈາກຕຳແໜ່ງ ແລະປະທານາທິບໍດີສະຫະລັດ ທ່ານບາຣັກ ໂອບາມາ ຕ່າງກໍໄດ້ກ່າວອ້າງວ່າ ການຕັ້ງບ້ານໃໝ່ຂອງອິສຣາແອລເປັນໄພຂົ່ມຂູ່ຕໍ່ການແກ້ໄຂແບບມີສອງລັດສອງປະເທດຄຽງຄູ່ກັນຢູ່ໃນຄຳປາໄສຂອງພວກທ່ານຕໍ່ກອງປະຊຸມສະມັດຊາໃຫຍ່ໃນອາທິດນີ້.
