ພວກຫົວຮຸນແຮງ ເຮັສໂບລາ ໃນເລບານອນ ໄດ້ຍິງຈະຫຼວດ ໃສ່ທາງພາກເໜືອຂອງອິສຣາແອລ ໃນວັນພຸດມື້ນີ້ ເພື່ອຕອບໂຕ້ການໂຈມຕີທາງອາກາດ ຂອງອິສຣາແອລ ທີ່ເຮັດໃຫ້ມີຜູ້ເສຍຊີວິດ 7 ຄົນ ໃນພາກໃຕ້ຂອງເລບານອນ.
ກອງທັບອິສຣາແອລກ່າວວ່າ ການໂຈມຕີຂອງຕົນທີ່ໄດ້ແນເປົ້າໃສ່ຕຶກອາຄານທາງທະຫານ ໄດ້ສັງຫານສະມາຊິກຂອງກຸ່ມຫົວຮຸນແຮງ ອາລ-ຈາມາ ອາລ-ອິສລາມາຢາ (al-Jamaa al-Islamiya) ທີ່ໄດ້ຊຸກຍູ້ແຜນການກໍ່ການຮ້າຍທີ່ແນເປົ້າໃສ່ອິສຣາແອລ.
ອົງການຂ່າວ AFP ໄດ້ອ້າງເຖິງເຈົ້າໜ້າທີ່ຂອງກຸ່ມຫົວຮຸນແຮງ ອາລ-ຈາມາ ອາລ-ອິສລາມາຢາ (al-Jamaa al-Islamiya) ວ່າ ມີຜູ້ເສຍຊີວິດ 7 ຄົນ ໃນບ້ານ ຢູ່ເຂດ ເຮັບບາຣີຢິ (Hebbariyeh). ແຫຼ່ງຂ່າວດ້ານຄວາມໝັ້ນຄົງຂອງເລບານອນ ໄດ້ໃຫ້ ຂໍ້ມູນຂອງຈຳນວນຜູ້ເສຍຊີວິດທີ່ຄືກັນກັບອົງການຂ່າວ Reuters.
ຄວາມຮຸນແຮງຂ້າມຊາຍແດນນັ້ນ ເປັນການຕອບໂຕ້ຄັ້ງຫຼ້າສຸດທີ່ເກີດຂຶ້ນໃນຂະນະທີ່ອິສຣາແອລດຳເນີນການເຄື່ອນໄຫວເພື່ອແນໃສ່ກຳຈັດກຸ່ມກໍ່ການຮ້າຍ ຮາມາສ ເຊິ່ງເປັນພັນທະມິດຂອງກຸ່ມ ເຮັສໂບລາ ຢູ່ໃນເຂດກາຊາ.
ກອງທັບຂອງອິສຣາແອລຍັງໄດ້ລາຍງານໃນວັນພຸດວານນີ້ວ່າ ກຳລັງປະຕິບັດການທາງພາກພື້ນດິນ ຢູ່ທີ່ໂຮງຫມໍ ຊີຟາ (Shifa) ທາງພາກເຫນືອຂອງ ເຂດກາຊາ, ໃນຂະນະດຽວກັນ ກໍຍັງປະຕິບັດການໂຈມຕີທາງອາກາດ ແລະການສູ້ລົບໃນພື້ນທີ່ ຂອງເຂດ ຄານ ຢູນິສ (Khan Younis) ທາງພາກໃຕ້ຂອງ ເຂດກາຊາ ນຳດ້ວຍ.
ຄວາມພະຍາຍາມໃນການຢຸດຕິການສູ້ລົບກັນຊົ່ວຄາວ, ໂດຍມີຂໍ້ສະເໜີທີ່ລວມເຖິງການປ່ອຍຕົວປະກັນທີ່ຖືກກັກຂັງຢູ່ໃນເຂດກາຊາ ແລະ ການຊ່ວຍເຫຼືອດ້ານມະນຸດສະທຳໃຫ້ແກ່ພົນລະເຮືອນຊາວປາແລັສໄຕນ໌, ປາກົດວ່າ ບໍ່ໄດ້ໃກ້ຄຽງກັບຄວາມເປັນຈິງເລີຍ ເຖິງແມ່ນວ່າ ມະຕິຂອງສະພາຄວາມໝັ້ນຄົງຂອງອົງການສະຫະປະຊາຊາດ ຈະຮຽກຮ້ອງໃຫ້ຢຸດຍິງໃນທັນທີ ກໍຕາມ.
ຟໍຣັມສະແດງຄວາມຄິດເຫັນ