Turkey ໄດ້ຂັບໄລ່ເອກອັກຄະລັດຖະທູດອິສຣາແອລປະຈຳກຸງອັງກາຣາໃນວັນສຸກມື້ນີ້ແລະ
ໂຈະການຕົກລົງທັງໝົດທາງດ້ານທະຫານ ຫຼັງຈາກໄດ້ມີຂ່າວກ່ຽວກັບລາຍລະອຽດຂອງລາຍ
ງານສະຫະປະຊາຊາດທີ່ສືບສວນເບິ່ງການບຸກຂຶ້ນໄປກວດຄົ້ນກຳປັ່ນ Turkey ທີ່ມຸ່ງໜ້າໄປ
ຍັງເຂດກາຊາ ໂດຍອິສຣາແອລ ທີ່ເຮັດໃຫ້ມີຜູ້ເສຍຊີວິດໃນປີກາຍນີ້.
ລັດຖະມົນຕີການຕ່າງປະເທດ Turkey ທ່ານ Ahmet Davutoglu ກ່າວໃນວັນສຸກມື້ນີ້ວ່າ
ລັດຖະບານຂອງທ່ານ ໄດ້ລົດລະດັບການມີໜ້າທາງດ້ານການທູດກັບອິສຣາແອລລົງມາເປັນ
ຂັ້ນເລຂາໂທ. ການຕັດສິນໃຈທີ່ວ່ານີ້ມີຂຶ້ນນຶ່ງມື້ຫຼັງຈາກໜັງສືພິມ New York Times ໄດ້
ພິມເຜີຍແຜ່ທາງອິນເຕີແນັດລາຍງານຂອງອົງການສະຫະປະຊາຊາດ ທີ່ມີການຄອງຄອຍຖ້າ ມາເປັນເວລາດົນນານແລ້ວນັ້ນ.
ອີງຕາມລາຍງານຂ່າວທີ່ພິມເຜີຍແຜ່ທາງອິນເຕແນັດນັ້ນຄະນະເຈົ້າໜ້າທີ່ສະຫະປະຊາຊາດ
ສະຫຼຸບວ່າ ການປິດລ້ອມທາງທະເລຂອງອິສຣາແອລຕໍ່ແຫຼມກາຊານັ້ນ ເປັນການກະທຳທີ່
ຖືກຕ້ອງຕາມກົດໝາຍແຕ່ລັດຖະບານອິສຣາແອລໄດ້ໃຊ້ກຳລັງເກີນຂອບເຂດແລະບໍ່ມີເຫດ
ຜົນເພື່ອສະກັດກັ້ນກຳປັ່ນ Turkey ທີ່ພະຍາຍາມຈະບຸກຜ່ານການປິດລ້ອມຂອງອິສຣາແອລ.
ລາຍງານ ໄດ້ຕຳໜິຕິຕຽນກ່ຽວກັບການເສຍຊີວິດ ທີ່ຍັງຜົນມາຈາກການບຸກຂຶ້ນໄປກວດຄົ້ນ
ຂອງອິສຣາແອລນັ້ນວ່າ ເປັນສິ່ງທີ່ຮັບເອົາບໍ່ໄດ້. ລາຍງານເວົ້າຕື່ມວ່າ ອິສຣາແອລບໍ່ໄດ້ໃຫ້
ການອະທິບາຍຢ່າງເປັນທີ່ພໍໃຈ ກ່ຽວກັບການສັງຫານຊາວ Turkey 9 ຄົນ ຊຶ່ງສ່ວນໃຫຍ່
ແລ້ວລາຍງານເວົ້າວ່າ ໄດ້ຖືກຍິງຫຼາຍໆຄັ້ງ ຮວມທັງຍິງຈາກດ້ານຫຼັງຫຼືຖືກຍິງໃນໄລຍະເຜົາ
ຂົນ.
ແຕ່ແນວໃດກໍຕາມ ຄະນະເຈົ້າໜ້າທີ່ສະຫະປະຊາຊາດຍັງພົບເຫັນວ່າ ໜ່ວຍກ້າຕາຍຂອງ
ອິສຣາແອລທີ່ບຸກຂຶ້ນໄປເທິງກຳປັນຂອງ Turkey ນັ້ນ ໄດ້ໃຊ້ກຳລັງເພື່ອປ້ອງກັນໂຕໃນ
ການຕອບໂຕ້ຕໍ່ອັນທີ່ລາຍງານເອີ້ນວ່າ ການຕ້ານຢັນທີ່ສຳຄັນ ມີການຈັດຕັ້ງແລະຮຸນແຮງ
ຈາກຜູ້ໂດຍສານບາງຄົນໃນກຳປັ່ນດັ່ງກ່າວ.
ເຈົ້າໜ້າທີ່ອິສຣາແອລທີ່ຂໍສະຫງວນຊື່ທີ່ພົວພັນນຳລາຍທີ່ພວມລໍຖ້າການພິມແຜ່ນັ້ນໄດ້ກ່າວ
ຊົມເຊີຍລາຍງານ ທີ່ພົບເຫັນວ່າ ການກະທຳຂອງອິສຣາແອລ ບໍ່ໄດ້ລະເມີດກົດໝາຍນາໆ
ຊາດ. ແຕ່ເຈົ້າໜ້າທີ່ອິສຣາແອລຄົນນຶ່ງກ່າວຕໍ່ອົງການຂ່າວຝຣັ່ງວ່າ ພວກເຂົາເຈົ້າອາດຈະ
ສະແດງການສະຫງວນທ່າທີບາງຢ່າງ ກ່ຽວກັບການພົບເຫັນຂອງສະຫະປະຊາຊາດ.
