ອິສຣາແອລ ກ່າວວ່າ ຕົນໄດ້ທຳການໂຈມຕີທາງອາກາດໃນວັນອາ
ທິດມື້ນີ້ ໃສ່ 10 ສະຖານທີ່ ໃນເຂດກາຊາ. ການປະຕິບັດງານໃນ
ເຊົ້າມື້ນີ້ ໄດ້ແນເປົ້າໝາຍໃສ່ບ່ອນທີ່ກອງທັບອິສຣາແອລກ່າວວ່າ
ພວກປາແລສໄຕນ໌ໄດ້ຍິງລູກຈະຫຼວດອອກມາໃສ່ອິສຣາແອລນັ້ນ.
ການປະທະກັນຫຼາຍບັ້ນ ລະຫວ່າງຕຳຫຼວດອິສຣາແອລ ແລະ
ພວກປະທ້ວງປາແລສໄຕນ໌ ໄດ້ດຳເນີນມາຫຼາຍມື້ແລ້ວ ໃນເຂດ
ກ້ຳຕາເວັນອອກຂອງນະຄອນ Jerusalem ແລະໃນຫົວເມືອງ
ອື່ນໆ.
ຄວາມເຄັ່ງຕຶງໄດ້ຢູ່ໃນລະດັບສູງ ມາຕັ້ງແຕ່ພວກໄວລຸ່ນອິສຣາແອລ 3 ຄົນຖືກລັກພາໂຕ
ໄປ ຈາກຝັ່ງຕາເວັນຕົກຂອງແມ່ນ້ຳຈໍແດນ ຫຼື WestBank ໃນເດືອນມິຖຸນາຜ່ານມານີ້
ແລະໄດ້ມີການພົບເຫັນສົບພວກເຂົາເຈົ້າໃນເວລາຕໍ່ມາ. ອິສຣາແອລຖິ້ມໂທດໃສ່ກຸ່ມ
ຮາມັສຫົວຮຸນແຮງ ວ່າເປັນຜູ້ລັກພາໂຕ ແລະທຳການຄາດຕະກຳພວກໄວລຸ່ນເຫຼົ່ານີ້.
ໄອຍະການສູງສຸດຂອງປາແລສໄຕນ໌ ກ່າວວ່າ ການພິສູດສົບຂອງເດັກໄວລຸ່ນອາຫຣັບ
ຄົນນຶ່ງ ທີ່ເສຍຊີວິດໃນການໂຈມຕີທີ່ສົງໄສວ່າ ເປັນການແກ້ແຄ້ນ ສະແດງໃຫ້ເຫັນວ່າ
ເດັກຄົນນີ້ຖືກໄຟໄໝ້ຕາຍ.
ໄດ້ມີການພົບເຫັນສົບທ້າວ Mohammed Abu Khudair ທີ່ຖືກໄຟໄໝ້ ຢູ່ໃນປ່າແຫ່ງນຶ່ງ
ໃນນະຄອນ Jerusalem ໃນວັນພຸດຜ່ານມາ ປະມານນຶ່ງຊົ່ວໂມງ ຫຼັງຈາກຜູ້ກ່ຽວຖືກພວກລັກພາໂຕ ບັງຄັບໃຫ້ຂຶ້ນລົດຄັນນຶ່ງໄປ.
ຕຳຫຼວດອິສຣາແອລ ໄດ້ຈັບກຸມພວກຜູ້ຕ້ອງສົງໄສຈຳນວນນຶ່ງ ໃນວັນອາທິດມື້ນີ້ ທີ່ພົວພັນກັບການສັງຫານທ້າວ Khudair ນັ້ນ.
