ກອງທັບອິສຣາແອລ ກ່າວວ່າ ຕົນໄດ້ຍິງຍົນບໍ່ມີຄົນຂັບລຳນຶ່ງຕົກ
ທີ່ບິນເຂົ້າມາໃນອິສຣາແອລ ຈາກເຂດກາຊາ.
ໂຄສົກກອງທັບອິສຣາແອລ ກ່າວໃນວັນຈັນມື້ນີ້ວ່າ ຍົນບໍ່ມີຄົນຂັບ
ຫລື ຍົນໂດຣນລຳນີ້ ໄດ້ບິນເຂົ້າມາເໜືອເຂດ Ashdod ຊຶ່ງຕັ້ງຢູ່
ລະຫວ່າງກາງເຂດກາຊາ ກັບນະຄອນ Tel Aviv ເວລາກຳລັງ
ຂອງອິສຣາແອລຍິງເຮືອບິນລຳນີ້ຕົກ ດ້ວຍລູກສອນໄຟ Patriot.
ກອງທັບອິສຣາແອລ ຍັງກ່າວຕື່ມວ່າ ພວກຫົວຮຸນແຮງຮາມັສ ໄດ້
ຍິງຈະຫຼວດຫຼາຍລູກໃນວັນຈັນມື້ນີ້ ມາຈາກເຂດກາຊາ ໃນຂະນະ
ດຽວກັນ ຝູງເຮືອບິນລົບຂອງອິສຣາແອລ ກໍໄດ້ໂຈມຕີເປົ້າໝາຍ
ຫຼາຍສິບແຫ່ງໃນຄືນຜ່ານມາ ໃນການສືບຕໍ່ການບຸກໂຈມຕີຂອງຕົນ ທີ່ມີມາໄດ້ເກືອບນຶ່ງສັບປະດາເຕັມ ເພື່ອຢຸດການໂຈມຕີດ້ວຍຈະຫຼວດ ຂອງກຸ່ມຮາມັສນັ້ນ.
ເລຂາທິການໃຫຍ່ສະຫະປະຊາຊາດ ທ່ານພັນກີມູນ ໄດ້ສະແດງຄວາມຕົກໃຈນຳການກໍ່
ຄວາມຮຸນແຮງຂຶ້ນນີ້ ແລະຮຽກຮ້ອງໃຫ້ທັງສອງຝ່າຍເອົາບາດກ້າວໃນທັນທີ ເພື່ອຍຸດຕິ
ການສູ້ລົບກັນ.
ທ່ານພັນກີມູນ ກ່າວຢູ່ໃນຖະແຫຼງການສະບັບນຶ່ງ ໃນແລງວັນອາທິດວານນີ້ ວ່າ ການຍິງ
ຈະຫຼວດຂອງກຸ່ມຮາມັສ ເປັນການກະທຳຜິດຕໍ່ກົດໝາຍສາກົນ ໃນຂະນະດຽວກັນ “ກໍມີປະຊາຊົນປາແລສໄຕນ໌ຫຼາຍຄົນໂພດແລ້ວ ທີ່ໄດ້ເສຍຊີວິດໄປ” ຍ້ອນການໂຈມຕີທາງອາກາດຂອງອິສຣາແອລ.
ບັນດາ ເຈົ້າໜ້າທີ່ປາແລສໄຕນ໌ ກ່າວວ່າ ປະຊາຊົນຫຼາຍກວ່າ 160 ຄົນໄດ້ເສຍຊີວິດໄປ ຮວມທັງພວກຫົວຮຸນແຮງ ນັບແຕ່ອິສຣາແອລໄດ້ເປີດສາກທຳການບຸກໂຈມຕີຂອງຕົນ
ໃນວັນອັງຄານແລ້ວນີ້ເປັນຕົ້ນມາ ຊຶ່ງກ່າວກັນວ່າ ພວກທີ່ເສຍຊີວິດໄປນັ້ນ ສ່ວນຫຼາຍ
ແມ່ນພົນລະເຮືອນ.
