ລັດຖະມົນຕີການຕ່າງປະເທດຂອງ ອິສຣາແອລ ໃນວັນຈັນວານນີ້ໄດ້ຮຽກຮ້ອງໃຫ້ສະພາຄວາມໝັ້ນຄົງສະຫະປະຊາຊາດ ກຳນົດກຸ່ມ ຮາມາສ ເປັນອົງການກໍ່ການຮ້າຍ ແລະ ວາງ “ມາດຕະການລົງໂທດຢ່າງໜັກໃສ່ພວກເຂົາ.”
ທ່ານ ອິສຣາແອລ ແຄັດສ໌ ໄດ້ກ່າວວ່າ “ຂ້າພະເຈົ້າຂໍຮຽກຮ້ອງໃຫ້ສະພາຄວາມໝັ້ນຄົງຂອງອົງການສະຫະປະຊາຊາດ ທຳການກົດດັນໃຫ້ຫຼາຍເທົ່າທີ່ຈະຫຼາຍໄດ້ຕໍ່ອົງການຮາມາສ ເພື່ອໃຫ້ປ່ອຍຕົວປະກັນທີ່ຖືກລັກພາຕົວໄປຢ່າງກະທັນຫັນ ແລະ ໂດຍບໍ່ມີເງື່ອນໄຂ.”
ສະພາດັ່ງກ່າວຈະຕ້ອງໄດ້ຕົກລົງກັນໃນການລົງຍັດຕິເພື່ອເອົາບາດກ້າວເຊັ່ນນັ້ນ. ໃນປັດຈຸບັນນີ້, ສະມາຊິກຂອງສະພາຫຼາຍປະເທດ, ລວມທັງ ສະຫະລັດ, ອັງກິດ ແລະ ຍີ່ປຸ່ນ, ແມ່ນໄດ້ກຳນົດກຸ່ມຮາມາສ ໃຫ້ເປັນກຸ່ມກໍ່ການຮ້າຍໃນຮ່າງກົດໝາຍນິຕິບັນຍັດພາຍໃນປະເທດຂອງເຂົາເຈົ້າ.
ທ່ານ ແຄັດສ໌ ໄດ້ກ່າວຄຳປາໄສໃນກອງປະຊຸມຂອງສະພາຄວາມໝັ້ນຄົງທີ່ມີສະມາຊິກ 15 ປະເທດ ທີ່ຖືກຂໍໃຫ້ຈັດຂຶ້ນໂດຍ ສະຫະລັດ, ຝຣັ່ງ ແລະ ອັງກິດ ເພື່ອປຶກສາຫາລື ກ່ຽວກັບ ລາຍງານໂດຍທ່ານນາງ ປຣາມິລາ ແພັດເທັນ, ທູດພິເສດຂອງເລຂາທິການໃຫຍ່ອົງການສະຫະປະຊາຊາດ, ທີ່ຮັບຜິດຊອບ ກ່ຽວກັບ ຄວາມຮຸນແຮງທາງເພດໃນບັນຫາຂັດແຍ້ງ.
ທ່ານນາງ ແພັດເທັນ ແລະ ກຸ່ມຂອງນັກຊ່ຽວຊານດ້ານເທັກນິກ 9 ຄົນໄດ້ດຳເນີນພາລະກິດສອງອາທິດ ຢູ່ໃນ ອິສຣາແອລ ຈາກວັນທີ 29 ມັງກອນ ຫາ 14 ກຸມພາ ແລະ ໄດ້ພົບເຫັນ “ຂໍ້ມູນທີ່ຊັດເຈນ ແລະ ໜ້າເຊື່ອຖື” ວ່າກຸ່ມຮາມາສ ໄດ້ດຳເນີນການກໍ່ຄວາມຮຸນແຮງທາງເພດ, ລວມທັງການຂົ່ມຂືນຕໍ່ຜູ້ເຄາະຮ້າຍຂອງການໂຈມຕີກໍ່ການຮ້າຍເມື່ອວັນທີ 7 ຕຸລາ ໃນອິສຣາແອລ.
ມີປະຊາຊົນຢ່າງໜ້ອຍ 1,200 ຄົນໄດ້ຖືກຂ້າຕາຍໃນມື້ນັ້ນ ພວກຜູ້ເຄາະຮ້ານບາງສ່ວນໄດ້ຖືກທຳຮ້າຍທາງເພດກ່ອນທີພວກເຂົາຈະເສຍຊີວິດ.
ລາຍງານຂອງທ່ານນາງແພັດເທັນ ຍັງໄດ້ສະຫລຸບວ່າ ຄວາມຮຸນແຮງນັ້ນ ອາດຍັງສືບຕໍ່ໄປຕໍ່ພວກໂຕປະກັນທີ່ຢູ່ໃນການຈັບກຸມ.
ຟໍຣັມສະແດງຄວາມຄິດເຫັນ