ອິສຣາແອລ ກ່າວໃນວັນພະຫັດວານນີ້ວ່າ ກໍາລັງຂອງຕົນ ພວມກະກຽມ ການປະຕິບັດການທາງພື້ນດິນ ໃນເຂດກາຊາ, ແຕ່ຍັງບໍ່ມີການຕັດສິນໃຈໃດໆ ກ່ຽວກັບການໂຈມຕີຕອບໂຕ້ດັ່ງກ່າວເທື່ອ.
ກອງທັບອິສຣາແອລ ໄດ້ວາງກຳລັງກອງໜຸນ 300,000 ຄົນ ໃກ້ຊາຍແດນເຂດກາຊາ ໃນຂະນະທີ່ຕົນໄດ້ຕອບໂຕ້ຕໍ່ການໂຈມຕີຂອງກຸ່ມຮາມາສ ທີ່ໄດ້ເຮັດໃຫ້ມີຜູ້ເສຍຊີວິດຢ່າງນ້ອຍ 1,200 ຄົນໃນອິສຣາແອລ.
ການດຳເນີນການໂຈມຕີທາງອາກາດຂອງອິສຣາແອລ ທີ່ເລີ້ມຂຶ້ນບໍ່ເທົ່າໃດຊົ່ວໂມງ ຫລັງຈາກການບຸກໂຈມຕີຂອງກຸ່ມຮາມາສໃນວັນເສົາ ໄດ້ສັງຫານ 1,200 ຄົນ ໃນເຂດກາຊາ.
ສະຫະປະຊາຊາດກ່າວວ່າ ມີເກືອບ 340,000 ຄົນໄດ້ຖືກຍົກຍ້າຍອອກຈາກບ້ານເຮືອນຂອງເຂົາເຈົ້າໃນເຂດກາຊາ, ໂດຍຫຼາຍກວ່າ 2/3 ໄດ້ໄປລີ້ໄພຢູ່ໂຮງຮຽນຂອງສະຫະປະຊາຊາດ.
ບັນດາອົງການມະນຸດສະທຳ ໄດ້ສະແດງຄວາມກັງວົນ ກ່ຽວກັບການສະໜອງອາຫານ, ນ້ຳ, ເຊື້ອໄຟ ແລະ ຢາປົວພະຍາດ ທ່າມກາງການປິດລ້ອມເຂດກາຊາຂອງອິສຣາແອລ.
ລັດຖະມົນຕີການຕ່າງປະເທດສະຫະລັດ ທ່ານແອນໂທນີ ບລິງເກັນ ພວມຢູ່ໃນປະເທດອິສຣາແອລ ໃນວັນພະຫັດນີ້, ບ່ອນທີ່ທ່ານມີກຳນົດຈະເຈລະຈາກັບນາຍົກລັດຖະມົນຕີ ອິສຣາແອລ ທ່ານ ເບັນຈາມິນ ເນຕັນຢາຮູ, ປະທານາທິບໍດີ ໄອແຊັກ ເຮີທຊອກ (Isaac Hertzog) ແລະເຈົ້າໜ້າທີ່ອື່ນໆ.
“ພວກເຮົາຢືນຢັດ ຕ້ານການກໍ່ການຮ້າຍຢ່າງເດັດດ່ຽວ, ທ່ານບລິງເກັນ ກ່າວຕໍ່ບັນດານັກຂ່າວ. “ພວກເຮົາໄດ້ເຫັນການກະທຳທີ່ເກືອບຈະພັນລະນາບໍ່ໄດ້ຂອງກຸ່ມຮາມາສ ຕໍ່ຜູ້ຊາຍ, ຜູ້ຍິງ, ແລະເດັກນ້ອຍຊາວອິສຣາແອລ. ທຸກໆມື້ພວກເຮົາຮັບຮູ້ຫຼາຍຂຶ້ນ, ແລະມັນເປັນເລື່ອງທີ່ຫນ້າເສົ້າໃຈແທ້ໆ.”
ທ່ານບລິງເກັນ ຍັງມີກຳນົດຈະໄປຢ້ຽມຢາມຈໍແດນໃນລະຫວ່າງການຢ້ຽມຢາມພາກພື້ນດັ່ງກ່າວ. ທ່ານຮັສເຊັນ ອາລ-ຊີກ (Hussein Al-Sheikh), ເລຂາທິ ການໃຫຍ່ຂອງຄະນະບໍລິຫານງານຂອງອົງການປົດປ່ອຍປາແລັສໄຕນ໌, ກ່າວໃນສື່ສັງຄົມ X, ເຊິ່ງໃນເມື່ອກ່ອນເອີ້ນວ່າ ທວິທເຕີ, ວ່າ ທ່ານບລິງເກັນ ຈະພົບປະກັບເຈົ້າໜ້າທີ່ປາແລັສໄຕນ໌ ປະທານາທິບໍດີປາແລັສໄຕນ໌ ທ່ານມາມູດ ອັບບັສ (Mahmoud Abbas) ໃນວັນສຸກ ທີ່ນະຄອນອໍາມານ (Amman).
