ພວກຜູ້ນຳຂອງ Israel ແລະປາແລັສໄຕນ໌ ຈະທໍາການ
ເຈລະຈາກັນຕໍ່ທີ່ເມືອງ Sharm el-Sheik ປະເທດອີຈິບ
ໃນວັນທີ 14 ແລະທີ່Jerusalem ວັນທີ 15 ເດືອນ
ກັນຍານີ້.
ເຈົ້າໜ້າທີ່ກະຊວງການຕ່າງປະເທດສະຫະລັດຖະແຫລງ
ໃນວັນອາທິດວານນີ້ວ່າ ນາຍົກລັດຖະມົນຕີອິສຣາແອລ
ທ່ານ Benjamin Netanyahu, ປະທານາທິບໍດີປາແລສ
ໄຕນ໌ ທ່ານ Mahmoud Abbas, ທ່ານນາງ Hillary
Clinton ລັດຖະມົນຕີຕ່າງປະເທດສະຫະລັດ ແລະທ່ານ
George Mitchell ທູດພິເສດຂອງສະຫະລັດສໍາລັບພາກຕາເວັນອອກກາງ ຈະຮ່ວມໃນການເຈລະຈາໃນຄັ້ງນີ້.
ບັນຫາການກໍ່ສ້າງບ້ານເຮືອນໃໝ່ຂອງຊາວຍິວ ໃນເຂດ ຂອງປາແລສໄຕນ໌ ແມ່ນເປັນໄພຂົ່ມຂູ່ ທີ່ຈະເຮັດໃຫ້ການເຈລະຈານີ້ຕົກລາງ.
ລັດຖະມົນຕີການຕ່າງປະເທດ Israel ທ່ານ Avigdor Lieberman ກ່າວໃນວັນຈັນມື້ນີ້ວ່າ ພັກຂອງທ່ານຈະຂັດຂວາງການຕໍ່ເວລາໃດໆກໍຕາມ ຂອງຄໍາສັ່ງໃຫ້ຢຸດເຊົາການກໍ່ສ້າງບ້ານຢູ່ອາໃສໄວ້ຊົ່ວຄາວ ທີ່ຈະໝົດອາຍຸໃນທ້າຍເດືອນນີ້ນັ້ນ. ສະມາຊິກຫຼາຍໆຄົນຂອງພັກຂອງທ່ານ Netanyahu ກໍຄັດຄ້ານຕໍ່ການຕໍ່ອາຍຸຂອງໂຄງການນີ້ເຊ່ນກັນ.
ຝ່າຍພວກຜູ້ນຳປາແລັສໄຕນ໌ໄດ້ກ່າວວ່າ ພວກຕົນຈະຖອນໂຕຈາກການເຈລະຈາ ຖ້າຫາກ ວ່າການກໍ່ສ້າງຕຶກອາຄານຍັງດໍາເນີນຢູ່ຕໍ່ໄປ.
