ອິສຣາແອລ ກ່າວວ່າ ກຳລັງທະຫານຂອງຕົນໄດ້ຍິງສັງຫານຜູ້ຊາຍຊາວປາແລສໄຕນ໌ ຄົນນຶ່ງ ທີ່ໄດ້ແທງທະຫານອິສຣາແອລບາດເຈັບທີ່ເຂດແຄມຝັ່ງຕາເວັນຕົກຂອງແມ່ນ້ຳ ຈໍແດນ.
ຄວາມຮຸນແຮງໃນຕອນເຊົ້າວັນເສົາມື້ນີ້ ມີຂຶ້ນທີ່ດ່ານກວດຂອງທະຫານແຫ່ງນຶ່ງທີ່ແບ່ງເມືອງ Hebron ອອກເປັນສອງເຂດ.
ຄວາມຮຸນແຮງດັ່ງກ່າວນີ້ເກີດຂຶ້ນນຶ່ງມື້ ຫລັງຈາກກຳລັງຂອງອິສຣາແອລໄດ້ຍິງສັງຫານ ຜູ້ໂຈມຕີຊາວປາແລສໄຕນ໌ 3 ຄົນ ຢູ່ໃນເຫດການທີ່ເກີດຂຶ້ນ ຢູ່ເມືອງ Hebron ແລະກ້ຳ ຕາເວັນອອກຂອງນະຄອນເຢຣູຊາແລັມ.
ມີຊາວປາແລສໄຕນ໌ຫລາຍກວ່າ 200 ຄົນ ແລະອິສຣາແອລ 34 ຄົນ ໄດ້ຖືກຂ້າຕາຍໃນຄວາມຮຸນແຮງທີ່ເພີ້ມທະວີຂຶ້ນ ໃນປີແລ້ວ.
ອິສຣາແອລໄດ້ຖິ້ມໂທດການກໍ່ຄວາມແຮງເຫຼົ່ານີ້ໃສ່ການປຸກລະດົມຍຸຍົງໂດຍພວກຜູ້ນຳທາງການເມືອງແລະສາສະໜາປາແລສໄຕນ໌.
ຊາວປາແລສໄຕນ໌ກ່າວວ່າ ຄວາມຮຸນແຮງດັ່ງກ່າວແມ່ນເປັນຜົນທີ່ເກີດມາຈາກຄວາມບໍ່ ພໍໃຈແລະໂກດແຄ້ນ ກ່ຽວກັບການຍຶດຄອງຂອງອິສຣາແອລທີ່ມີມາເປັນເວລາຫລາຍໆທົດສະວັດ.
