ອິສຣາແອລແລະພວກຫົວຮຸນແຮງປາແລສໄຕນ໌ໃນເຂດກາຊາ ສືບຕໍ່ທໍາການໂຈມຕີກັນອີກ
ໃນວັນອາທິດມື້ນີ້ ລຸນຫລັງການໂຈມຕີຮ້າຍແຮງເຖິງຕາຍຫລາຍບັ້ນ ທີ່ເລີ້ມຂຶ້ນໃນວັນເສົາ
ວານນີ້ ຊຶ່ງຝ່າຍອິສຣາແອລໄດ້ທໍາການໂຈມຕີທາງອາກາດໃສ່ພວກປາແລສໄຕນ໌ຫົວຮຸນແຮງ.
ຄວາມພະຍາຍາມຂອງອີຈິບເພື່ອໄກ່ເກ່ຍໃຫ້ມີການຢຸດຍິງກັນລະຫວ່າງສອງຝ່າຍ ມາຮອດ
ປັດຈຸບັນນີ້ ແມ່ນໄດ້ປະສົບກັບຄວາມລົ້ມແຫລວໃນການຍຸດຕິຄວາມຮຸນແຮງນັ້ນ. ຝ່າຍປາ
ແລສໄຕນ໌ໄດ້ຍິງຈະຫລວດຫລາຍລູກ ໃສ່ພາກໃຕ້ຂອງອິສຣາແອລໃນເຊົ້າວັນອາທິດມື້ນີ້
ຂະນະທີ່ເຮືອບິນຂອງອິສຣາແອລແນເປົ້າໝາຍ ໃສ່ທີ່ໝັ້ນແຫ່ງຕ່າງໆຂອງພວກຫົວຮຸນແຮງ
ໃນເຂດກາຊາໃນຄືນຜ່ານມາ.
ພວກປາແລສໄຕນ໌ຫົວຮຸນແຮງກ່າວໃນວັນອາທິດມື້ນີ້ວ່າ ພວກຕົນຕຽມພ້ອມທີ່ຈະຮັບເອົາ
ຂໍ້ຕົກລົງຢຸດຍິງ ຖ້າຫາກອິສຣາແອລຕົກລົງຮັບເອົາຄືກັນ.
ການໂຈມຕີທາງອາກາດຂອງອິສຣາແອລໃສ່ເປົ້າໝາຍແຫ່ງຕ່າງໆຂອງກຸ່ມອີສລາມ Jihad
ໃນເຂດກາຊາໃນວັນເສົາວານນີ້ ໄດ້ສັງຫານ 9 ຄົນ. ກຸ່ມ Jihad ກ່າວວ່າ ຜູ້ບັນຊາການ
ຄົນນຶ່ງຂອງພວກຕົນແມ່ນຮວມຢູ່ໃນພວກທີ່ເສຍຊີວິດໄປນັ້ນ. ແລະການຍິງຈະຫລວດຕອບ
ໂຕ້ຂອງພວກປາແລສໄຕນ໌ຫົວຮຸນແຮງ ໄດ້ເຮັດໃຫ້ພົນລະເຮືອນອິສຣາແອລຄົນນຶ່ງເສຍຊີວິດ
ແລະບາດເຈັບຢ່າງໜ້ອຍ 2 ຄົນ.
ກອງທັບອິສຣາແອລກ່າວວ່າ ການໂຈມຕີທາງອາກາດຂອງຕົນໃນວັນເສົາວານນີ້ ແມ່ຍິງໃສ່
ພວກຫົວຮຸນແຮງທີ່ເປັນຜູ້ຮັບຜິດຊອບ ໃນການຍິງຈະຫລວດຫລາຍລູກໃສ່ອິສຣາແອລໃນ
ວັນພຸດແລ້ວນີ້ ຊຶ່ງການໂຈມຕີດັ່ງກ່າວບໍ່ໄດ້ສົ່ງຜົນໃຫ້ມີຜູ້ບາດເຈັບລົ້ມຕາຍໃດໆ.
ອິສຣາແອລໄດ້ຮຽກຮ້ອງໃຫ້ນາໆຊາດເຂົ້າແຊກແຊງເພື່ອຢຸດການໂຈມຕີຈາກພວກປາແລສ
ໄຕນ໌ນັ້ນ. ລັດຖະມົນຕີຕ່າງປະເທດອິສຣາແອລ ທ່ານ Avigdor Lieberman ກ່າວໃນວັນ
ເສົາວານນີ້ວ່າ ອິສຣາແອລບໍ່ໄດ້ຊອກຫາການປະເຊີນໜ້າກັນກັບພວກປາແລສໄຕນ໌ ແລະກໍ
ບໍ່ຢາກເຮັດສະຖານະການໃນປັດຈຸບັນ ຮ້າຍແຮງຂຶ້ນ ແຕ່ຕົນກໍຈະບໍ່ປ່ອຍໃຫ້ການລະດົມຍິງ
ຂອງຝ່າຍປາແລສໄຕນ໌ເກີດຂຶ້ນຊໍ້າແລ້ວຊໍ້າອີກ ໂດຍບໍ່ມີການຕອບໂຕ້ນັ້ນ.
ສະຫະປະຊາຊາດໄດ້ຮຽກຮ້ອງໃຫ້ໃຊ້ຄວາມຍັບຍັ້ງ ຊຶ່ງທ່ານ Robert Serry ທູດພິເສດວ່າ
ດ້ວຍກິດຈະການພາກຕາເວັນອອກກາງຂອງສະຫະປະຊາຊາດກ່າວວ່າ ມັນເປັນສິ່ງສໍາຄັນ
ທີ່ຈະຕ້ອງລົດຜ່ອນສະພາບການໃນປັດຈຸບັນນີ້ລົງ ໂດຍບໍ່ມີການຊັກຊ້າໃດໆ.
