ສະພາຄວາມໝັ້ນຄົງສະຫະປະຊາຊາດກໍານົດຈະພິຈາລະນາກັນຢ່າງເປັນທາງການຄໍາຮຽກ
ຮ້ອງຂອງປາແລສໄຕນ໌ທີ່ຂໍເຂົ້າເປັນສະມາຊິກໂດຍເຕັມຂອງສະຫະປະຊາຊາດນັ້ນ.
ການໂອ້ລົມສົນທະນາກັນໃນວັນພຸດມື້ນີ້ ມີຂຶ້ນທ່າມກາງການສືບຕໍ່ຮຽກຮ້ອງໃຫ້ໄຂການ
ເຈລະຈາສັນຕິພາບກັນຄືນໃໝ່ ລະຫວ່າງອິສຣາແອລແລະປາແລສໄຕນ໌ ແລະການປະນາມ
ໂດຍພວກຜູ້ນໍາຂອງສະຫະລັດ ສະຫະພາບຢູໂຣບ ແລະປາແລສໄຕນ໌ ກ່ຽວກັບແຜນການ
ຂອງອິສຣາແອລ ເພື່ອກໍ່ສ້າງບ້ານເຮືອນໃໝ່ໃນພາກຕາເວັນອອກຂອງ Jerusalem ນັ້ນ.
ທ່ານ Lynn Pascoe ຫົວໜ້າດ້ານການເມືອງຂອງສະຫະປະຊາຊາດກ່າວຕໍ່ສະພາຄວາມ
ໝັ້ນຄົງ ໃນວັນອັງຄານວານນີ້ວ່າ ບໍ່ຄວນມີການຍົກເວັ້ນໃນຄວາມພະຍາຍາມໃດໆກໍຕາມ
ເພື່ອຊຸກຍູ້ໃຫ້ທັງສອງຝ່າຍກັບຄືນສູ່ໂຕະເຈລະຈາກັນ ຊຶ່ງທ່ານກ່າວຕໍ່ໄປວ່າ ເວລານີ້ເປັນ
ເວລາສໍາລັບໝົດທຸກຄົນຄວນໃຫ້ໂອກາດແກ່ການດໍາເນີນຂັ້ນຕອນທາງການທູດ.
ການພົບປະເຈລະຈາສັນຕິພາບລະຫວ່າງອິສຣາແອລແລະປາແລສໄຕນ໌ໄດ້ພັງທະລາຍລົງ
ໃນປີແລ້ວນີ້ ຫລັງຈາກການຫ້າມຂອງອິສຣາແອລ ບໍ່ໃຫ້ກໍ່ສ້າງບ້ານເຮືອນໃນຝັ່ງຕາເວັນຕົກ
ຂອງແມ່ນໍ້າຈໍແດນໝົດອາຍຸໄປ. ການພົບເຈລະຈາທີ່ຕົກຢູ່ໃນສະພາບບໍ່ໄປບໍ່ມານີ້ ໄດ້ກະຕຸ້ນ
ໃຫ້ປາແລສໄຕນ໌ພະຍາຍາມຊອກຫາຊ່ອງທາງ ໃຫ້ສະຫະປະຊາຊາດຮັບຮູ້ການເປັນປະເທດ
ປາແລສໄຕນ໌ຂອງຕົນໃນສັບປະດາຜ່ານມານີ້.
ທ່ານນາງຮິນລາຣີ ຄລິນຕັນ ລັດຖະມົນຕີການຕ່າງປະເທດສະຫະລັດເອີ້ນການຕັດສິນໃຈຂອງອິສຣາແອນທີ່ຈະກໍ່ສ້າງບ້ານເຮືອນໃໝ່ຕື່ມອີກ1100 ຫລັງນັ້ນ ເປັນຜົນສະທ້ອນກັບໃນທາງບໍ່ດີແກ່ການຟື້ນຟູການເຈລະຈາກັນຄືນໃໝ່ນັ້ນ ແລະທ່ານນາງກ່າວຕໍ່ໄປວ່າ ທັງສອງ
ຝ່າຍຄວນຈະຫລີກລ້ຽງພຶດຕິກໍາແບບເກາະຜິດຕ່າງໆທີ່ຈະບ່ອນທໍາລາຍຄວາມໄວ້ວາງໃຈ
ກັນໂດຍສະເພາະໃນນະຄອນ Jerusalem.
