ໃນເຂດກາຊາ ລະບຸວ່າ ອິສຣາແອລ ໂຈມຕີໃສ່ຕຶກທີ່ຢູ່ອາໄສສູງສາມຊັ້ນແຫ່ງນຶ່ງໃນເມືອງຈາບາເລຍ ທາງພາກເໜືອຂອງກາຊາ ເຮັດໃຫ້ມີປະຊາຊົນເສຍຊີວິດຢ່າງໜ້ອຍ 24 ຄົນ ແລະມີຜູ້ບາດເຈັບ 30 ຄົນ ອີງຕາມລາຍງານຂອງອົງການຂ່າວຣອຍເຕີສ.
ພາບວີດີໂອທີ່ເຜີຍແຜ່ໃນສື່ສັງຄົມອອນໄລນ໌ ສະແດງໃຫ້ເປັນຮ່າງທີ່ໄຮ້ຊີວິດຫຼາຍກວ່າ 10 ຄົນພາຍໃຕ້ຜ້າຄຸມ ວາງລຽນຢູ່ເທິງພື້ນດິນດ້ານນອກຂອງໂຮງໝໍແຫ່ງນຶ່ງໃນເມືອງຈາບາເລຍ ໂດຍສື່ຂ່າວທ້ອງຖິ່ນລະບຸວ່າ ເປັນຜູ້ເສຍຊີວິດຈາກການໂຈມຕີຕຶກດັ່ງກ່າວ.
ດ້ານກອງທັບອິສຣາແອລ ຖະແຫລງວ່າ ເປັນການໂຈມຕີ “ຖານປະຕິບັດການຂອງຜູ້ກໍ່ການຮ້າຍ” ໃນເມືອງຈາບາເລຍ.
ສະມາຄົມກາແດງແຫ່ງປາແລສໄຕນ໌ ລາຍງານວ່າ ໄດ້ເຮັດວຽກຮ່ວມກັບອົງການກາຊາດສາກົນເພື່ອອົບພະຍົບຜູ້ປ່ວຍປະມານ 20 ຄົນອອກຈາກໂຮງໝໍ ອາລ-ອົວດາ ໃນເມືອງຈາບາເລຍ ເພື່ອສົ່ງໄປຍັງໂຮງໝໍອີກແຫ່ງນຶ່ງໃນເຂດກາຊາ ຊີຕີ ເມື່ອວັນອາທິດວານນີ້ ແລະມີຜູ້ປ່ວຍນຶ່ງຄົນເສຍຊີວິດຂະນະທີ່ລົດພະຍາຍານຖືກທະຫານອິສຣາແອລສະກັດໄວ້ທີ່ດ່ານແຫ່ງນຶ່ງມາດດົນຫຼາຍຊົ່ວໂມງ.
ກອງທັບອິສຣາແອລ ກ່າວວ່າ ກຸ່ມຮາມາສ ໄດ້ໃຊ້ຕຶກຂອງພົນລະເຮືອນໃນກາຊາ ເປັນຖາປະຕິບັດການ ເຊິ່ງທາງກຸ່ມຮາມາສ ໄດ້ອອກມາປະຕິເສດ.
ຝ່າຍທີ່ທຳການສູ້ລົບຂອງກຸ່ມຮາມາສເປີດເຜີຍໃນວັນອາທິດ ວ່າ ໄດ້ສັງຫານທະຫານອິສຣາແອລ 15 ຄົນ ໃນລະຫວ່າງການໂຈມຕີທີ່ເມືອງລາຮິຢາ ທາງພາກເໜືອຂອງເມືອງຈາບາເລຍ ແຕ່ຍັງບໍ່ມີຄວາມເຫັນຈາກທາງອິສຣາແອລ ໃນເລື້ອງນີ້ ແລະອົງການຂ່າວຣອຍເຕີສ ຍັງບໍ່ສາມາດຢືນຢັນຄຳກ່າວອ້າງຂອງກຸ່ມຮາມາສໄດ້.
ອິສຣາແອລ ສົ່ງທະຫານເຂົ້າໄປໃນເມືອງຈາບາເລຍ ເມືອງລາຮິຢາ ແລະເມືອງຮານາວ ທາງພາກເໜືອຂອງເຂດກາຊາ ຕັ້ງແຕ່ວັນທີ 5 ຕຸລາ ເພື່ອຕໍ່ສູ້ກັບກຸ່ມຮາມາສ ແລະປ້ອງກັນບໍ່ໃຫ້ນັກລົບກຸ່ມນີ້ ກັບມາຮວມຕົວໄດ້ອີກ ໂດຍທາງອິສຣາແອລ ລະບຸວ່າ ສາມາດສັງຫານນັກລົບຮາມາສໄດ້ແລ້ວ ຫຼາຍຮ້ອຍຄົນ ໃນພື້ນທີ່ນີ້ ຕັ້ງແຕ່ເລີ້ມປະຕິບັດການຮອບໃໝ່.
ຂະນະດຽວກັນ ຄວາມພະຍາຍາມເຮັດຂໍ້ຕົກລົງຢຸດຍິງລະຫວ່າວງອິສຣາແອລ ກັບກຸ່ມຮາມາສ ຍັງຄົງຢຸດສະງັກ ເຊິ່ງທັງສອງຝ່າຍຕ່າງກ່າວຫາຊຶ່ງກັນແລະກັນວ່າ ເປັນຕົ້ນເຫດຂອງຄວາມລົ້ມແຫຼວນີ້.
ຮາມາສໂຈມຕີອິສຣາແອລ ເມື່ອ 13 ເດືອນກ່ອນ ເຮັດໃຫ້ມີຜູ້ເສຍຊີວິດປະມານ 1,200 ຄົນຮວມທັງມີການຈັບໂຕປກັນໄປກາຊາ ກວ່າ 250 ຄົນ ອິສຣາແອລ ໄດ້ໂຈມຕີຕອບໂຕກັບເຂົ້າໄປເຂດປົກຄອງຂອງຊາວປາແລສໄຕນ໌ ຢ່າງຕໍ່ເນື່ອງ ຈົນເຮັດໃຫ້ມີຜູ້ເສຍຊິວິດກວ່າ 43,500 ຄົນແລ້ວ ອ້າງອີງຂໍ້ມູນຈາກກະຊວງສາທາລະນະສຸກຂອງກາຊາ.
ຟໍຣັມສະແດງຄວາມຄິດເຫັນ