ບັນດາຜູ້ລົງຄະແນນສຽງໃນປະເທດ ອິສຣາແອລ ໄດ້ທຳການປ່ອນບັດໃນວັນຈັນມື້ນີ້ ໃນການເລືອກຕັ້ງຄັ້ງທີສາມຂອງປະເທດ ໃນຮອບ 12 ເດືອນທີ່ຜ່ານມາ.
ເຂົາເຈົ້າກຳລັງຕັດສິນວ່າຈະໃຫ້ນາຍົກລັດຖະມົນຕີ ເບັນຈາມິນ ເນຕັນຢາຮູ ດຳລົງຕຳແໜ່ງສະໄໝໃໝ່ ຫຼື ຫັນຫາທິດທາງອື່ນກັບອະດີດຫົວໜ້າກອງທັບທ່ານ ເບັນນີ ແກ້ນສ໌.
ການຢັ່ງຫາງສຽງກ່ອນການເລືອກຕັ້ງໄດ້ຊີ້ໃຫ້ເຫັນວ່າ ບໍ່ມີພັກການເມືອງຂອງຜູ້ລົງແຂ່ງຂັນຄົນໃດ ຈະໄດ້ການສະໜັບສະໜູນພຽງພໍ ເພື່ອຕັ້ງລັດຖະບານປະສົມຂຶ້ນ.
ນັ້ນແມ່ນກໍລະນີໃນການເລືອກຕັ້ງສອງຄັ້ງທີ່ຜ່ານມາ, ຫຼັງຈາກບໍ່ມີຂໍ້ແກ້ໄຂໃນການເຈລະຈາກຫຼາຍອາທິດ.
ທ່ານ ເນຕັນຢາຮູ ຍັງຄົງເປັນນາຍົກລັດຖະມົນຕີຮັກສາການໃນລະຫວ່າງການເລືອກຕັ້ງຊໍ້າຄືນນີ້. ການເລືອກຕັ້ງຄັ້ງຫຼ້າສຸດ ໄດ້ມີຂຶ້ນສອງອາທິດ ກ່ອນທີ່ທ່ານມີກຳນົດຖືກດຳເນີນຄະດີ ໃນຂໍ້ກ່າວຫາ ກ່ຽວກັບ ການຮັບເງິນສິນບົນ, ສໍ້ໂກງ ແລະ ການຝ່າຝືນຄວາມໄວ້ວາງໃຈ.
ທ່ານ ແກ້ນສ໌ ໄດ້ກ່າວໃນການໂຄສະນາຫາສຽງຂອງທ່ານວ່າ ທ່ານ ເນຕັນຢາຮູ ແມ່ນຖືກຫຸ້ມລ້ອມໂດຍຂ່າວນອງນັນ, ໃນຂະນະທີ່ທ່ານ ເນຕັນຢາຮູ ໄດ້ກ່າວວ່າ ທ່ານມີຄວາມເໝາະສົມທີ່ສຸດ ທີ່ຈະນຳພາປະເທດຊາດໃນເວລານີ້.
ເມື່ອຜົນການເລືອກຕັ້ງອອກມາ, ປະທານາທິບໍດີ ຣູເປັນ ຣິວລິນ ຈະເລືອກຜູ້ລົງແຂ່ງຂັນທີ່ທ່ານຄິດວ່າ ມີໂອກາດສູງສຸດເພື່ອຕັ້ງລັດຖະບານປະສົມ ແລະ ໃຫ້ເວລາເຂົາເຈົ້າຫົກອາທິດເພື່ອດຳເນີນການ. ຖ້າຜູ້ລົງແຂ່ງຂັນຄົນນັ້ນບໍ່ສາມາດເຮັດໄດ້, ອີກຄົນນຶ່ງກໍຈະໄດ້ຮັບ 28 ວັນເພື່ອຕັ້ງລັດຖະບານປະສົມຂອງເຂົາເຈົ້າຂຶ້ນມາເອງ.
