ອີຈິບ ໄດ້ເຈລະຈາຂໍ້ຕົກລົງຢຸດຍິງ ລະຫວ່າງອິສຣາແອລ ແລະພວກຫົວຮຸນແຮງປາແລສໄຕນ໌ ຢູ່ໃນເຂດ Gaza ຫລັງຈາກທີ່ໄດ້ມີການສູ້ລົບກັນມາເປັນເວລາສີ່ມື້ທີ່ເຮັດໃຫ້ຊາວປາແລສໄຕນ໌ເສຍຊີວິດໄປຢ່າງ ນ້ອຍ 25 ຄົນ.
ອິສຣາແອລໄດ້ຢຸດຕິການໂຈມຕີທາງອາກາດຕໍ່ເຂດ Gaza ແລະການ ຍິງຈະຫຼວດໂຈມຕີ ຂອງຝ່າຍປາແລສໄຕນ໌ກໍໄດ້ຫລຸດລົງຢ່າງຫຼວງຫຼາຍ ຫລັງຈາກຂໍ້ຕົກລົງດັ່ງກ່າວ ໄດ້ມີຜົນບັງຄັບໃຊ້ໃນຕອນເຊົ້າຂອງວັນອັງຄານມື້ນີ້.
ຍັງບໍ່ທັນມີການຢືນຢັນຢ່າງເປັນທາງການໃດໆກ່ຽວກັບການຢຸດຍິງທີ່ວ່ານີ້ ຈາກເຈົ້າໜ້າທີ່ອິສຣາແອລ ຫລືພວກເຈົ້າໜ້າທີ່ຢູ່ໃນເຂດ Gaza
ເຈົ້າໜ້າທີ່ຮັກສາຄວາມປອດໄພຂອງອີຈິບກ່າວວ່າ ຂໍ້ຕົກລົງດັ່ງກ່າວນີ້ ແມ່ນຮວມທັງການໃຫ້ຄຳໝັ້ນສັນຍາຂອງອິສຣາແອລທີ່ຈະຢຸດເຊົາການ “ລອບສັງຫານ” ແຕ່ເຈົ້າໜ້າທີ່ປ້ອງກັນປະເທດ ຂັ້ນສູງຄົນນຶ່ງຂອງອິສ ຣາແອລ ໄດ້ປະຕິເສດກ່ຽວກັບການໃຊ້ຄໍາເວົ້າດັ່ງກ່າວ. ທ່ານ Amos Giliad ກ່າວໃນການສໍາພາດທາງວິທະຍຸວ່າ ອີສຣາແອລຈະປ້ອງກັນປະຊາຊົນຂອງຕົນຖ້າຫາກມີຄວາມຈໍາເປັນ. ເຖິງຢ່າງໃດກໍດີທ່ານເວົ້າວ່າ “ຄວາມສະຫງົບ” ຈາກຝ່າຍປາແລສໄຕນ໌ ກໍຈະໄດ້ຮັບການຕອບ ສະໜອງຈາກ “ຄວາມສະຫງົບ” ຈາກຝ່າຍອິສຣາແອລ.
ການໂຈມຕີທາງອາກາດຂອງອິສຣາແອລຕໍ່ເຂດ Gaza ໄດ້ເຮັດໃຫ້ມີຜູ້ໄດ້ຮັບບາດເຈັບຢ່າງນ້ອຍ 80 ຄົນ ນັບຕັ້ງແຕ່ວັນສຸກເປັນຕົ້ນມາ. ອິສຣາແອລກ່າວວ່າ ພວກທີ່ຖືກຂ້າຕາຍສ່ວນໃຫ່ຍແມ່ນພວກຫົວຮຸນແຮງ.
