ອິສຣາແອລ ແລະເຂດກາຊາ ຢູ່ໃນຄວາມງຽບສະຫງົບໃນວັນ
ພຸດມື້ນີ້ ຊຶ່ງເປັນມື້ທຳອິດ ທີ່ການຢຸດຍິງຄັ້ງໃໝ່ “ແບບບໍ່ມີກຳ
ນົດ” ເລີ້ມມີຜົນບັງຄັບໃຊ້.
ກອງທັບອິສຣາແອລລາຍງານວ່າ ບໍ່ມີການຍິງລູກຈະຫລວດ
ໂຈມຕີ ຈາກເຂດກາຊາ ແລະກໍບໍ່ມີການໂຈມຕີທາງອາກາດ
ໂດຍກຳລັງຂອງຕົນ ຕໍ່ດິນແດນປາແລສໄຕນ໌.
ການຢຸດຍິງໄດ້ເລີ້ມມີຜົນບັງຄັບໃຊ້ ໃນຕອນແລງຂອງວັນອັງ
ຄານວານນີ້ 50 ມື້ຫລັງຈາກຄວາມເຄັ່ງຕືງລະຫວ່າງສອງຝ່າຍ
ໄດ້ລະເບີດຂຶ້ນເປັນສົງຄາມ ເຮັດໃຫ້ ຊາວປາແລສໄຕນ໌ ຫຼາຍ
ກວ່າ 2,100 ຄົນເສຍຊີວິດສ່ວນໃຫຍ່ເປັນພົນລະເຮືອນ. ອິສຣາແອລ ເສຍຊີວິດຫົກສິບເກົ້າຄົນ ສ່ວນໃຫຍ່ເປັນທະຫານ ຍົກເວັ້ນ 5 ຄົນ ເປັນພົນລະເຮືອນ.
ອີຈິບເປັນຜູ້ໄກ່ເກ່ຍໃຫ້ມີການຕົກລົງໃນຄັ້ງນີ້ ດັ່ງດຽວກັນກັບການຢຸດຍິງພຽງລະຍະສັ້ນໆ ຫຼາຍໆຄັ້ງ ທີ່ໄດ້ປະສົບກັບຄວາມຫລົ້ມແຫລວ.
ຂົງເຂດ ກາຊາ ມີຄວາມສະຫງົບ
ພາຍໃຕ້ຂໍ້ຕົກລົງສະບັບນີ້ ອິສຣາແອລຈະຜ່ອນຜັນ ການປິດລ້ອມຕໍ່ເຂດກາຊາ ໂດຍຈະ
ອະນຸຍາດໃຫ້ສາມາດການສົ່ງການຊ່ວຍເຫລືອ ດ້ານມະນຸດສະທຳ ແລະ ອຸບປະກອນກໍ່
ສ້າງ ເຂົ້າໄປໃນເຂດດັ່ງກ່າວໄດ້.
ທັງສອງຝ່າຍຍັງໄດ້ໃຫ້ຄຳໝັ້ນສັນຍາທີ່ຈະເລີ້ມເຈລະຈາພາຍໃນນຶ່ງເດືອນເພື່ອສົນທະນາ
ກ່ຽວກັບບັນຫາ ທີ່ຕົກຄ້າງ ມາເປັນເວລາດົນນານແລ້ວນັ້ນ ຮວມທັງ ການຮຽກຮ້ອງຂອງອິສຣາແອລໃຫ້ກຸ່ມຮາມັສປົດອາວຸດ ພ້ອມທັງການຍົກເລີກຕໍ່ການປິດລ້ອມໃນຂອບເຂດ
ທີ່ກວ້າງຂວາງ ແລະການເປີດເດີ່ນເຮືອບິນ ແລະທ່າເຮືອໃນເຂດກາຊາ.
