ອິສຣາແອລ ແລະກຸ່ມຫົວຮຸນແຮງ ເຂດກາຊາ ຍິງໂຈມຕີກັນ

ການ​ລະດົມ​ຍິງໂຈມ​ຕີ​ກັນ​ທີ່​ໜັກໜ່ວງ​ທີ່​ສຸດ​ ລະຫວ່າງ​ອີສຣາ​ແອ​ລ ​ແລະ​ເຂດ​ກາຊາ ​ໃນ​ຮອບຫຼາຍ​ໆເດືອນ​ ​ແມ່ນ​ກໍາລັງ​ດຶງ​ດູດ​ຄວາມ​ສົນໃຈໄປ​ສູ່​ກຸ່ມ​ຫົວ​ຮຸນ​ແຮງ Salafist ຢູ່​ໃນ​ເຂດ​ປາ​ແລັສ​ໄຕ.

ກຸ່ມ​ຫົວ​ຮຸນ​ແຮງ​ ​ທີ່​ເອີ້ນ​ຕົນ​ເອງ​ວ່າ ສະພາ Mujahedeen Shura ​ເ​ວົ້າ ວ່າ ຕົນ​ໄດ້​ຍິງ​ຈະຫຼວດຫຼາຍລູກ​ໂຈ​ມຕີ​ເຂດ​ພາກ​ໃຕ້​ຂອງ​ອີສຣາ​ແອ​ລ ນັບ​ຕັ້ງ​ແຕ່​ວັນ​ອັງຄານ​ຜ່ານ​ມາ​ນີ້. ​ໃນການ​ໂຈມ​ຕີ​ບັ້ນ​ລ່າ​ສຸດນັ້ນຊາວອີສຣາແອ​ລຕ້ອງ​ໄດ້​ພາ​ແລ່ນ​ເຂົ້າ​ໄປລີ້​ຢູ່​ບ່ອນຫຼົບ ​ໄພ​ເມື່ອ​ວັນ​ພຸດ​ວານ​ນີ້. ຫຼາຍຊົ່ວ ​ໂມງ​ກ່ອນໜ້າ​ນັ້ນ ກອງທັບ​ອີສຣາ​ແອ​ລ​ໄດ້​ສົ່ງ​ເຮືອບິນ​ລົບ​ຈໍານວນ​ນຶ່ງ​ໄປໂຈມ​ຕີ​ເປົ້າໝາຍ​ຕ່າງໆ​ຂອງກຸ່ມ​ຫົວ​ຮຸນ​ແຮງ​ຢູ່​ພື້ນ​ທີ່ເປີດ​ໂລ່ງໃນພາກ​ເໜືອ​ຂອງ​ເຂດກາຊາ.

ບໍ່​ມີ​ລາຍ​ງານ​ກ່ຽວ​ກັບ​ຈໍານວນ​ຜູ້​ບາດ​ເຈັບ​ລົ້ມ​ຕາຍ ຈາກ​ການໂຈມ​ຕີ​ດ້ວຍຈະຫຼວດ ຫຼື ການ​ໂຈມ​ຕີທາງ​ອາກາດ ຊຶ່ງ​ເປັນ​ການ​ໂຈມ​ຕີ​ທາງ​ອາກາດ​ເທື່ອ​ທໍາ​ອິດ​ຂອງ​ອີສຣາ​ແອ​ລ ນັບຕັ້ງ​ແຕ່​ໄດ້​ມີ​ການ​ຢຸດ​ຍິງ​ ເມື່ອເດືອນ​ພະ​ຈິກປີ​ກາຍ​ເປັ​ນຕົ້ນ​ມາ ກັບ​ກຸ່ມ​ຫົວ​ຮຸນ​ແຮງ​ຮາ​ມາສ ທີ່​ຄວບ​ຄຸມ​ເຂດ​ກາ​ຊາ​ນັ້ນ.

ກຸ່ມ​ຫົວ​ຮຸນ​ແຮງ Salafist ​ເວົ້າ​ວ່າ ການ​ໂຈມ​ຕີ​ດ້ວຍ​ຈະຫຼວດ ​ແມ່ນ​ເປັນ ການ​ແກ້​ແຄ້ນ ​ຕໍ່​ການ​ກະທໍາ​ທີ່​ບໍ່​ຖືກຕ້ອງ​ຂອງ​ອີສຣາ​ແອ​ລ ຕໍ່​ນັກ​ໂທດປາ​ແລັສ​ໄຕ​ໄວ 64 ປີ ຄົນ​ນຶ່ງ ທີ່​ເສຍ​ຊີວິດ​ດ້ວຍ​ໂຣກມະ​ເຮັງ​ ເມື່ອ​ວັນ​ອັງ ຄານ​ຜ່ານ​ມາ. ​ຝ່າຍ​ອີສຣາ​ແອ​ລ​ເວົ້າ​ວ່າ ຕົນ​ໄດ້​ສະ​ເໜີ​ໃຫ້ການປິ່ນປົວ​ຕໍ່​ນາຍ Maysara Abu Hamdiyeh ຜູ້​ທີ່ກໍາລັງ​ຮັບໃຊ້​ໂທດ​ ຈໍາ​ຄຸກ​ຕະ ຫຼອດຊີວິດ ​ໃນ​ຂໍ້​ຫາ​ພະຍາຍາມ​ຂ້າ​ຄົນ ​ໃນ​ການວາງແຜນ​ໂຈມ​ຕີ​ດ້ວຍລະ​ເບີດ​ໃສ່​ຮ້ານ​ກາ​ເຟ Jerusalem ​ໃນ​ປີ 2002.