ອິສຣຣາແອລ ອອກມາເປີດເຜີຍວ່າ ກອງທັບຂອງຕົນໄດ້ສັງຫານວ່າທີ່ຫົວໜ້າ ກຸ່ມເຮັສໂບລລາ ສໍາເລັດ ລຸນຫຼັງຫົວໜ້າຂອງກຸ່ມດັ່ງກ່າວອອກມາເປີດເຜີຍໃນວັນອັງຄານວານນີ້ເຖິງຈຸດຢືນສະໜັບສະໜູນຄວາມພະຍາຍາມໃນການບັນລຸຂໍ້ຕົກລົງຢຸດຍິງ ສໍາລັບການຕໍ່ສູ້ຂ້າມຊາຍແດນກັບກອງທັບອິສຣາແອລ.
ນາຍົກລັດຖະມົນຕີ ທ່ານເບັນຈາມິນ ເນຕັນຢາຮູ ກ່າວໃນວັນອັງຄານວານນີ້ວ່າ ກອງທັບອິສຣາແອລ ໄດ້ທໍາການສັງຫານ ທ່ານຮາເຊມ ຊາຟີດດີນ (Hashem Safieddine) ຜູ້ທີ່ຖືກຄາດໝາຍວ່າຈະຂຶ້ນມາເປັນຜູ້ນໍາກຸ່ມຕິດອາວຸດດັ່ງກ່າວນີ້ ຫຼັງຈາກການເສຍຊີວິດຂອງ ທ່ານຮັສຊານ ນາຊຣັລລາ (Hassan Nasrallah) ອະດີດຜູ້ນໍາຂອງກຸ່ມທີ່ຖືກສັງຫານໃນການໂຈມຕີຂອງ ອິສຣາແອລ ເມື່ອວັນທີ 27 ກັນຍາ ທີ່ຜ່ານມາ.
ທ່ານ ຊາຟິດດີນ ເປັນລູກອ້າຍລູກນ້ອງກັນກັບ ທ່ານ ນາຊຣັລລາ ແລະທັງເປັນເຈົ້າໜ້າທີ່ອາວຸໂສຂອງກຸ່ມ.
ທ່ານ ເນຕັນຢາຮູ ໄດ້ອອກມາລະບຸໃນຖະແຫຼງການທີ່ເຜີຍແຜ່ທາງຄລິບວີດີໂອໃຫ້ກັບ “ປະຊາຊົນຊາວເລບານອນ” ວ່າ “ພວກເຮົາໄດ້ເຮັດໃຫ້ຄວາມສາມາດຂອງກຸ່ມເຮັສໂບລລາຫຼຸດໜ້ອຍລົງແລ້ວ” ແລະກ່າວຕື່ມອີກວ່າ “ພວກເຮົາໄດ້ກໍາຈັດຜູ້ກໍ່ການຮ້າຍຫຼາຍພັນຄົນ ລວມທັງ ທ່ານ ນາຊັລລາ ແລະຜູ້ທີ່ຈະມາເປັນຫົວໜ້າແທນລາວນໍາອີກດ້ວຍ.”
ກຸ່ມເຮັສໂບລລາ ຍັງບໍ່ໄດ້ອອກມາຕອບໂຕ້ ຫຼື ໃຫ້ຄວາມເຫັນກ່ຽວກັບລາຍງານຂ່າວດັ່ງກ່າວນີ້.
ຜູ້ນໍາຂອງ ອິສຣາແອລ ຍັງໄດ້ກ່າວອີກວ່າ “ຈະດໍາເນີນການທຸກຢ່າງທີ່ຈໍາເປັນ ເພື່ອເຮັດໃຫ້ປະຊາຊົນຂອງພວກເຮົາປອດໄພ ແລະກັບຄືນມາຍັງບ້ານເຮືອນຂອງພວກເຂົາເຈົ້າ” ຢູ່ບໍລິເວນພາກເໜືອຂອງປະເທດ ທີ່ເປັນເປົ້າການໂຈມຕີດ້ວຍລູກສອນໄຟຂອງກຸ່ມເຮັສໂບລລາ ນັບຕັ້ງແຕ່ວັນທີ່ 8 ຕຸລາ ວານນີ້.
ກ່ອນໜ້າທີ່ຈະມີການຢືນຢັນການເສຍຊີວິດຂອງ ທ່ານ ຊາຟີດດີນ, ກອງທັບອິສຣາແອລຫາກໍລາຍງານການໂຈມຕີທາງອາກາດຂອງຕົນວ່າ ໄດ້ທໍາການສັງຫານ ທ່ານຊູຮາອີລ ຮຸສເຊນີ ເຊິ່ງເປັນຜູ້ບັນຊາການອາວຸໂສຄົນນຶ່ງຂອງກຸ່ມ ເຮັສໂບລລາ ທີ່ມີສ່ວນພົວພັນໃນການຂົນສົ່ງອາວຸກຈາກ ອີຣ່ານ ມາໃຫ້ກຸ່ມຕິດອາວຸດດັ່ງກ່າວນີ້.
ກຸ່ມ ເຮັສໂບລລາ ອອກມາເປີດເຜີຍວ່າ ໄດ້ທໍາການຍິງລູກສອນໄຟເຂົ້າໃສ່ບໍລິເວນເມືອງ ໄຮຟາ ທີ່ຕັ້ງຢູ່ທາງພາກເໜືອຂອງ ອິສຣາແອລ, ໂດຍ ອິສຣາແອລ ຢືນຢັນວ່າ ສາມາດກວດພົບລູກສອນໄຟຫຼາຍສິບລູກທີ່ຖືກຍິງຂ້າມຊາຍແດນຈາກ ເລບານອນ ແທ້.
ໃນຊ່ວງເວລາຕອນເຊົ້າວັນອັງຄານວານນີ້, ທ່ານນາອິມ ຄາສເຊມ ຮອງຫົວໜ້າກຸ່ມເຮັສໂບລລາຖະແຫຼງການຜ່ານໂທລະພາບວ່າ ທາງກຸ່ມສະໜັບສະໜູນບາດກ້າວໃນການຢຸດຍິງກັບ ອິສຣາແອລ ໂດຍອ້າງເຖິງຄວາມພະຍາຍາມຂອງ ທ່ານນາບີ ເບີຣີ ເຊິ່ງເປັນປະທານລັດຖະສະພາຂອງເລບານອນ ໃນການຊອກຫາຫົນທາງເພື່ອໃຫ້ໂຈະການສູ້ລົບ ລວມທັງແຜນການຂອງກອງທັບອິສຣາແອລທີ່ຈະດໍາເນີນປະຕິບັດການພາກພື້ນດິນ ຢູ່ບໍລິເວນພາກພື້ນຕາເວັນຕົກສຽງໃຕ້ຂອງເລບານອນ ແລະການເດີນໜ້າການໂຈມຕີທາງອາກາດເຂົ້າໃສ່ເຂດ ດາເຮຍ ຂອງນະຄອນຫຼວງເບຣຸດ ນໍາອີກດ້ວຍ.
ແນວໃດກໍຕາມ, ທ່ານ ຄາສເຊມ ກ່າວວ່າ ກຸ່ມເຮັສໂບລລາ ຍັງຄົງລວມກັນໄດ້ຢູ່ ແລະສາມາດຂ້າມຜ່ານ “ການໂຈມຕີອັນແສນທຸກທໍລະມານນີ້” ມາໄດ້.
ການເວົ້າເຖິງການຍຸຕິສູ້ລົບ ມີຂຶ້ນລຸນຫຼັງອິສຣາແອລບຸກໂຈມຕີຢ່າງໜັກໜ່ວງເຂົ້າໄປໃນດິນແດນຂອງເລບານອນທີ່ອ້າງວ່າ ເພື່ອທໍາການຜັກດັນກຸ່ມເຮັສໂບລລາ ໃຫ້ຖອນຫ່າງອອກຈາກຊາຍແດນຂອງທັງສອງປະເທດ.
ສໍາລັບການບຸກໂຈມຕີພາກພື້ນດິນຂອງ ອິສຣາແອລ ທີ່ເລີ້ມຕົ້ນມາຕັ້ງແຕ່ວັນທີ 30 ກັນຍາ ນັ້ນ, ກອງທັບຂອງ ເທລ ອາວີບ ກ່າວວ່າ ເປັນ “ປະຕິບັດການທີ່ມີການກໍານົດເປົ້າໝາຍ ແບບກໍານົດວົງ ແລະມີຂອບເຂດ.”
ຄວາມຂັດແຍ້ງທີ່ຂະຫຍາຍວົງກວ້າງນີ້ ເຮັດໃຫ້ລັດຖະບານຫຼາຍໆປະເທດ ຟ້າວອົບພະຍົບປະຊາຊົນຂອງຕົນອອກຈາກເລບານອນແລ້ວ ໂດຍນຶ່ງໃນນັ້ນຄື ເທີກີ ທີ່ຈະສົ່ງເຮືອຂອງກອງທັບຈໍານວນ 2 ລໍາ ໄປຍັງນະຄອນຫຼວງເບຣຸດ ເພື່ອທໍາການອົບພະຍົບປະຊາຊົນປະມານ 2,000 ຄົນອອກມາໃນວັນພຸດມື້ນີ້.
ສະຫະລັດ ອອກມາເປີດເຜີຍໃນວັນອັງຄານວານນີ້ວ່າ ກະຊວງການຕ່າງປະເທດ ໄດ້ຈັດ 2 ຖ້ຽວບິນເພື່ອດໍາເນີນການອົບພະຍົບຊາວ ອາເມຣິກັນ ຈໍານວນ 180 ຄົນ ອອກຈາກເມືອງຫຼວງຂອງ ອິສຣາແອລ ໄປຍັງນະຄອນຫຼວງ ອິສຕັນບູລ ຂອງ ເທີກີ ແລ້ວ.
ຟໍຣັມສະແດງຄວາມຄິດເຫັນ