ລິ້ງ ສຳຫລັບເຂົ້າຫາ

ອະດີດນາຍົກ ອິສຣາແອລ ຖືກສານຕັດສິນ ມີ​ຄວາມ​ຜິດ ໃນຖານ ຮັບ​ສິນບົນ


ອ​ະດີດນາຍົກລັດຖະມົນຕີ Ehud Olmert ຂອງ ອິສຣາແອລ
ສານອິສຣາ​ແອ​ລ​ແຫ່ງ​ນຶ່ງ ​ໄດ້​ຕັດສິນ​ວ່າ ອ​ະດີດນາຍົກ
ລັດຖະມົນຕີ Ehud Olmert ວ່າ ມີ​ຄວາມ​ຜິດ ໃນ​ຖານ
ຮັບ​ສິນ​ບົນ​ໃນຄະດີ ​ທີ່​ພົວພັນ​ກັບ​ໂຄງການ​ພັດທະນາ
ໃນ​ຕອນທີ່ທ່ານ​ເປັນ​ເຈົ້າ​ຄອງ​ນະຄອນ Jerusalem.

ສານໃນ​ນະຄອນ Tel Aviv ​ໄດ້​ອອກ​ຄຳ​ຕັດສິນດັ່ງກ່າວ​
ໃນ​ວັນ​ຈັນ​ມື້​ນີ້. ທ່ານ Olmert ​ທີ່ຢູ່​ໃນ​ສານນຳຈະ​ຮູ້​ຕາມ​
ພາຍຫລັງ​ວ່າ ທ່ານຈະ​ຖືກຕິດ​ຄຸກຫລື​ບໍ່.

ຂໍ້ຫາຮັບ​ສິນ​ບົນນີ້ ​ແມ່ນ​ພົວພັນ​ກັບ ​ໂຄງການ​ສ້າງ​ເຮືອນ
Holyland ​ໃນ​ນະຄອນ Jerusalem. ບັນດາ​ໄອ​ຍະ​ການ
ກ່າວ​ວ່າ ທ່ານ Olmert ​ແລະ​ຄົນ​ອຶ່ນໆ​ ​ໄດ້ຮັບ​ເອົາ​ສີນ​ບົນ ຫລາຍ​ຮ້ອຍພັນ​ໂດ​ລາ ​ແລກ
ປ່ຽນ​ກັບ​ການຊຸກຍູ້​ໃຫ້​ ໂຄ​ງການນີ້​ເກີດ​ຂຶ້ນ​ໄດ້.

ຄະດີ​ດັ່ງກ່າວ​ ​ແມ່ນເປັນ​ຄະດີສໍ້​ລາດ​ບັງ​ຫລວງ ຕ້ານ ທ່ານ Olmert ອັນ​ຫລ້າ​ສຸດ.

​ໃນ​ປີ 2012 ສານ​ໄດ້​ຕັດສິນ​ວ່າ ທ່ານມີຄວາມ​ຜິດ ໃນ​ຖານ​ຊ່ວຍໃຫ້​ອະ​ດີດ​ເພື່ອນ​ຮ່ວມ​ງານ​ຂອງທ່ານຄົນ​ນຶ່ງ ​ໄດ້​ຮັບ​ສັນຍາ​ຫລາຍໆ​ອັນ ຈາກ​ລັດຖະບານ ​ໃນ​ຂະນະ​ທີ່​ທ່ານ​ເປັນ ລັດຖະມົນຕີ ການ​ຄ້າແລະ​ອຸດສາຫະກຳຂອງອິສຣາ​ແອລ ຊຶ່ງທ່ານ​ໄດ້​ຖືກ​ສັ່ງ​ໃຫ້​ເສຍ​ຄ່າ​ປັບ​ໃໝ $18,000 ​ໂດ​ລາ. ​ແລະ​ຂ່າວ​ນອງ​ນັນ​ກ່ຽວ​ກັບ​ເລື້ອງ​ນີ້ ​ເຮັດໃຫ້​ທ່ານ​ຕ້ອງລາ​ອອກ​ຈາກ ຕຳແໜ່​ງນາຍົກລັດຖະມົນຕີ ຫລັງ​ຈາກ​ໄດ້ດຳລົງ​ຕຳ​ແໜ່​ງດັ່ງກ່າວ​ ຈາກ​ປີ 2006 ຫາ​ປີ 2008. ​

ຄວາມເຫັນຂອງທ່ານ

ສະແດງຄວາມເຫັນໃຫ້ເບິ່ງ

XS
SM
MD
LG