ທະຫານອິສຣາແອລ ທີ່ສະໜັບສະໜູນດ້ວຍລົດຖັງ ເຮືອບິນ ແລະ
ເຮືອລົບ ຍັງສືບຕໍ່ບຸກຄືບໜ້າເຂົ້າສູ່ເຂດແຫລມກາຊາ ໃນວັນສຸກ
ມື້ນີ້ ຊຶ່ງເປັນມື້ທີ່ສອງຂອງ ບຸກໂຈມຕີທາງພາກພື້ນດິນ ເຂົາໄປ
ໃນດິນແດນຂອງປາແລສໄຕນ໌.
ເຈົ້າໜ້າທີ່ການແພດປາແລສໄຕນ໌ ກ່າວວ່າ ມີພວກຊາວບ້ານ ຢູ່
ໃນເຂດກາຊາ ຢ່າງໜ້ອຍ 21 ຄົນໄດ້ເສຍຊີວິດ ນັບຕັ້ງແຕ່ເລີ້ມມີການບຸກໂຈມຕີທາງພາກພື້ນດິນ ທີ່ໄດ້ແນ່ໃສ່ເພື່ອທໍາ ລາຍອຸໂມງ ຂອງພວກຫົວຮຸນແຮງ ທີ່ໃຊ້ ເພື່ອພະຍາ ຍາມໂຈມຕີເປົ້າໝາຍຕ່າງໆ ຂອງອິສຣາແອລນັ້ນ.
ກອງທັບອິສຣສາແອລ ໄດ້ລາຍງານເທຶ່ອທຳອິດກ່ຽວກັບການເສຍຊີວິດໃນວັນ ສຸກມື້ນີ້ ເວລາ
ທະຫານໄດ້ຖືກຂ້າຕາຍໃນການປະທະກັນກັບພວກນັກລົບຂອງ ກຸ່ມ Hamas ຊຶ່ງເປັນກຸ່ມ
ອິສລາມຫົວຮຸນແຮງ ທີ່ຄວບຄຸມແຫລມກາຊາ.
ເມື່ອຄືນແລ້ວນີ້ ກອງທັບອິສຣາແອລ ກ່າວຜ່ານທາງ Twitter ວ່າ ຕົນໄດ້ສັງ ຫານພວກຫົວ
ຮຸນແຮງ 14 ຄົນ ທຳລາຍຖານຍິງລູກຈະຫຼວດ 20 ແຫ່ງ ໂຈມຕີອຸໂມງເກົ້າແຫ່ງ ແລະໂຈມຕີ
ເປົ້າໝາຍພວກກໍ່ການຮ້າຍທັງໝົດ 103 ບ່ອນ.
ອິສຣາແອລ ບຸກ ເຂດກາຊາ
ນາຍົກລັດຖະມົນຕີອິສຣາແອລ ທ່ານ Benjamine Netanyahu ກ່າວໃນວັນສຸກມື້ນີ້ວ່າ
ທ່ານໄດ້ຕຽມພ້ອມ ທີ່ຈະຂະຫຍາຍການບຸກໂຈມຕີ ໃຫ້ກວ້າງອອກ ຊຶ່ງມາເຖິງປັດຈຸບັນນີ້
ປາກົດວ່າແມ່ນຍັງຢູ່ໃນຂອບເຂດຈຳກັດກວ່າການປະຕິບັດງານຂອງອິສຣາແອລ ໃນປີ
2008 ແລະ 2009 ເວລາຊາວປາແລສໄຕນ໌ ປະ ມານ 1,400 ແລະຊາວອິສຣາແອລ 13
ຄົນ ໄດ້ເສຍຊີວິດໄປນັ້ນ.
ທ່ານ Yonah Jeremy Bob ນັກຂ່າວດ້ານກົດໝາຍ ຂອງໜັງສືພິມ The Jerusalem
Post ກ່າວຕໍ່ວີໂອເອວ່າ ການບຸກໂຈມຕີປາກົດວ່າ ຈຳກັດຢູ່ແຕ່ ພຽງການໃຊ້ກຳລັງພິເສດ
ໂຈມຕີ ຢູ່ໃນຄຸ້ມຕ່າງໆ ໃນເຂດເທດສະບານ. ທ່ານກ່າວວ່າ ທະຫານອິສຣາແອລສ່ວນໃຫຍ່
ແມ່ນເຕົ້າໂຮມກັນຢູ່ບ່ອນເປີດແປນ ຢູ່ທາງສົ້ນຂອງແຫຼມກາຊາ ຫລືຫາກໍເລີ້ມປິດລ້ອມຕໍ່
ເຂດເທດສະບານຕ່າງໆ.
ໃນບໍ່ເທົ່າໃດມື້ທີ່ຜ່ານມານີ້ ກຸ່ມ Hamas ໄດ້ສະເໜີໃຫ້ມີການຢຸດຍິງເປັນເວລາຫລາຍປີ ທີ່
ຮວມທັງການຮຽກຮ້ອງເຊັນວ່າໃຫ້ອິສຣາແອລຍົກເລີກການປິດລ້ອມ ເປັນເວລາດົນນານ
ຕໍ່ແຫລມກາຊາ ເປີດເຂດອາກາດແລະປ່ອຍບັນດານັກໂທດ ປາແລສໄຕນ໌ ທີ່ໄດ້ຖືກຈັບ
ໂດຍອິສຣາແອລ ໃນເດືອນແລ້ວນີ້ ທີ່ເຂດຝັ່ງຕາເວັນ ຕົກຂອງແມ່ນ້ຳຈໍແດັນຫຼື West Bank.
ແຕ່ອິສຣາແອລ ໄດ້ຊຸກຍູ້ໃຫ້ຮັບເອົາການຢຸດຍິງທີ່ໄກ່ເກ່ຍໂດຍອີຈິບແທນ ຊຶ່ງ ຮຽກຮ້ອງ ໃຫ້ມີ “ການຢຸດເຊົາການເປັນປໍລະປັກ” ເພື່ອແລກປ່ຽນ ກັບການໄປ ມາຂອງຜູ້ຄົນແລະສົ່ງສິນຄ້າເພີ້ມຂຶ້ນ ລະຫວ່າງ ເຂດກາຊາ ແລະອິສຣາແອລ. ກຸ່ມ Hamas ໄດ້ປະຕິເສດບໍ່ຍອມຮັບເອົາແຜນການ ໂດຍເວົ້າວ່າ ຂໍ້ສະເໜີນີ້ ແມ່ນເທົ່າກັບເປັນການຍອມແພ້.
ຮວມທັງໝົດແລ້ວ ມີຊາວປາແລສໄຕນ໌ ເສຍຊີວິດ 260 ຄົນ ນັບຕັ້ງແຕ່ວັນທີ 8 ກໍລະກົດ ຜ່ານມາ ເວລາອິສຣາແອລ ໄດ້ເລີ້ມຂະຫຍາຍການໂຈມຕີທາງອາກາດຕໍ່ເຂດກາຊາ ໃນ ອັນທີ່ອິສຣາແອລຮ້ອງວ່າ ເປັນການພະຍາຍາມຢຸດຢັ້ງ ການຍິງລູກຈະຫລວດໃສ່ອິສຣາແອລນັ້ນ. ສະຫະປະຊາຊາດ ກ່າວວ່າ ປະມານສີ່ໃນທຸກໆຫ້າຄົນໃດ ຂອງພວກທີ່ເສຍຊີ ວິດ ແມ່ນພົນລະເຮືອນ ຮວມທັງພວກເດັກນ້ອຍຫລາຍສິບຄົນ. ມີຊາວອິສຣາແອລສອງຄົນໄດ້ເສຍຊີວິດແລ້ວ.
ທ່ານ Chris Gunness ໂຄສົກຂອງອົງການຊ່ວຍເຫລືອບັນເທົາທຸກ ແລະປະຕິບັດງານ ຂອງສະຫະປະຊາຊາດສຳລັບພວກອົບພະຍົບປາແລສໄຕນ໌ກ່າວຕໍ່ວີໂອເອວ່າ ການສູ້ລົບ ແມ່ນໄດ້ເຮັດໃຫ້ເກີດສະພາບການ ທີ່ຮັບເອົາບໍ່ໄດ້ ສຳລັບພວກອົບພະຍົບປາແລສໄຕນ໌ 1 ລ້ານ 8 ແສນຄົນ ທີ່ດຳລົງຊີວິດດ້ວຍຄວາມທຸກຍາກ ຢູ່ໃນເຂດກາຊາ.
