ລິ້ງ ສຳຫລັບເຂົ້າຫາ

ວັນອັງຄານ, ໒໑ ພຶດສະພາ ໒໐໒໔

ອິສຣາແອລ ຮຽກຮ້ອງ ໃຫ້ລົງໂທດຕໍ່ໂຄງການລູກສອນໄຟຂອງອີຣ່ານ ຫຼັງຈາກການໂຈມຕີຄັ້ງໃຫຍ່


ຊາວອີຣ່ານ ຍົກທຸງ ແລະ ຮູບຈໍາລອງຂອງລູກສອນໄຟ ໃນລະຫວ່າງການສະເຫຼີມສະຫຼອງ ຫຼັງຈາກການໂຈມຕີດ້ວຍລູກສອນໄຟ ແລະ ໂດຣນຂອງອີຣ່ານ, ໃນວັນທີ 15 ເມສາ 2024 ຢູ່ທີ່ຈະຕຸລັດປາແລັສໄຕນ໌ ໃນກາງນະຄອນຫຼວງເຕຫະຣ່ານ.
ຊາວອີຣ່ານ ຍົກທຸງ ແລະ ຮູບຈໍາລອງຂອງລູກສອນໄຟ ໃນລະຫວ່າງການສະເຫຼີມສະຫຼອງ ຫຼັງຈາກການໂຈມຕີດ້ວຍລູກສອນໄຟ ແລະ ໂດຣນຂອງອີຣ່ານ, ໃນວັນທີ 15 ເມສາ 2024 ຢູ່ທີ່ຈະຕຸລັດປາແລັສໄຕນ໌ ໃນກາງນະຄອນຫຼວງເຕຫະຣ່ານ.

ອິສຣາແອລ ໄດ້ຮຽກຮ້ອງ ໃນວັນອັງຄານມື້ນີ້ ໃຫ້ລົງໂທດຄັ້ງໃໝ່ຕໍ່ ອີຣ່ານ ເພື່ອເປັນສ່ວນນຶ່ງຂອງການຕອບໂຕ້ຕໍ່ກອງທັບອີຣ່ານ ແລະ ພັນທະມິດບາງສ່ວນ ທີ່ໄດ້ໂຈມຕີທາງອາກາດ ຕໍ່ລັດຂອງຊາວຢິວ ທີ່ບໍ່ເຄີຍເກີດຂຶ້ນມາກ່ອນ.

ລັດຖະມົນຕີ​ການ​ຕ່າງປະ​ເທດ​ອິສຣາ​ແອ​ລ ທ່ານ ອິສຣາແອລ ແຄທຊ໌ (Israel Katz) ກ່າວ​ໃນ​ສື່​ສັງຄົມ​ວ່າ ທ່ານ​ໄດ້ຕິດຕໍ່ຫາຫຼາຍກວ່າ 30 ​ປະ​ເທດ​ ເພື່ອ​ຊຸກຍູ້​ໃຫ້ມີການ​ລົງ​ໂທດ​ຕໍ່​ໂຄງການ​ລູກ​ສອນ​ໄຟ​ຂອງ​ອີຣ່ານ ​ແລະເພື່ອ​ປະກາດ​ໃຫ້​ກອງ​ກຳລັງ​ພິທັກ​ປະ​ຕິ​ວັດ​ຂອງ​ອີຣ່ານ ຫຼື IRGC ເປັນ​ອົງການ​ກໍ່​ການ​ຮ້າຍ.

ສະຫະລັດ​ແມ່ນນຶ່ງ​ໃນ​ຫຼາຍ​ປະ​ເທດ​ທີ່​ໄດ້​ກຳນົດໃຫ້ IRGC ​ເປັນ​ກຸ່ມ​ກໍ່​ການ​ຮ້າຍແລ້ວ. ນັບ​ຕັ້ງ​ແຕ່​ເດືອນ​ຕຸລາ, ສະຫະລັດ​ໄດ້​ວາງ​ມາດ​ຕະການ​ລົງ​ໂທດ​ຫຼາຍ​ຄັ້ງ​ໂດຍ​ແນ​ເປົ້າໃສ່​ໂຄງການ​ລູກ​ສອນ​ໄຟ​ຂີ​ປະ​ນາ​ວຸດ​ຂອງ​ອີຣ່ານ​ ໃນ​ຂະນະ​ທີ່​ການ​ລົງ​ໂທດ​ຂອງ ​ສະຫະ​ປະຊາ​ຊາດ​ໝົດ​ອາຍຸ​ລົງ.

ອິ​ສ​ຣາ​ແອ​ລ​ ຍັງ​ປາ​ກົດ​ວ່າ​ ຈະພະຍາຍາມ​ແກ້​ແຄ້ນ​ທາງ​ການ​ທະ​ຫານ, ເຖິງ​ແມ່ນ​ວ່າ ຈະມີການຮ້ອງຂໍຈາກບັນດາ​ຜູ້​ນໍາ​ຂອງ​ໂລກ​ ໃຫ້​ຫຼຸດ​ຜ່ອນ​ຄວາມ​ຮຸນແຮງ​ຂອງ​ສະ​ຖາ​ນະ​ການ ລົງກໍຕາມ.

ເຈົ້າ​ໜ້າ​ທີ່​ທະ​ຫານ​ອິ​ສ​ຣາ​ແອລ ​ກ່າວ​ໃນ​ວັນ​ຈັນ​ວານ​ນີ້​ວ່າ ເຕ​ຫະ​ຣ່ານ ​ຕ້ອງຊົດໃຊ້ ສຳລັບການໂຈມຕີດ້ວຍ​ລູກ​ສອນ​ໄຟ​ ແລະ​ເຮືອບິນບໍ່ມີຄົນຂັບ ປະມານ 350 ຫົວໜ່ວຍ ​ໃນ​ວັນ​ເສົາທີ່ຜ່ານມາ ຊຶ່ງ​ຫຼາຍຫົວໜ່ວຍ​ໄດ້​ຍິງ​ຈາກ​ດິນ​ແດນຂອງ​ອີ​ຣ່ານ.

ພົນ​ໂທ ເຮີຊີ ຮາເລວີ (Herzi Halevi) ຫົວໜ້າ​ກອງ​ທະຫານ​ອິສຣາ​ແອ​ລ ກ່າວ​ວ່າ ການ​ໂຈມ​ຕີ​ຂອງ​ອີຣ່ານ “ຈະ​ໄດ້​ຮັບ​ການ​ຕອບ​ໂຕ້.

"ອີຣ່ານຈະປະເຊີນໜ້າ ກັບຜົນທີ່ຕິດຕາມມາຈາກການກະທຳຂອງໂຕເອງ," ທ່ານກ່າວ ຈາກຖານທັບອາກາດ ເນວາຕິມ (Nevatim) ໃນພາກໃຕ້ຂອງອິສຣາແອລ.

ເຈົ້າ​ໜ້າ​ທີ່​ທະ​ຫານ​ອິ​ສ​ຣາ​ແອລ ​ບໍ່​ໄດ້ໃຫ້​ລາຍ​ລະ​ອຽດ​ວ່າ​ ການ​ຕອບ​ໂຕ້​ດັ່ງ​ກ່າວ ຈະເປັນແນວໃດ, ເຖິງ​ແມ່ນ​ວ່າ​ທ່ານ​ພົນຕີ ແດນນີລ ຮາກາຣີ (Daniel Hagari) ໂຄສົກ​ກອງ​ທັບ​ປ້ອງ​ກັນ​ປະ​ເທດຂອງ​ອິ​ສ​ຣາ​ແອລ ຈະກ່າວ​ວ່າ ການຕອບໂຕ້ຈະເກີດຂຶ້ນ, “ໃນ​ເວ​ລາ​ທີ່​ພວກ​ເຮົາ​ເລືອກ​.”

ພົນ​ຕີ ແພັດ ໄຣເດີ (Pat Ryder) ​ໂຄສົກ​ທຳນຽບຫ້າ​ແຈ ກ່າວ​ວ່າ “ມັນ​ເປັນ​ເລື້ອງທີ່ບອກ​ໄດ້ເລີຍ​ວ່າ ອີຣ່ານ ​ໄດ້ສົ່ງ​ໄພ​ຂົ່ມຂູ່​ທາງ​ອາກາດຫຼາຍກວ່າ 300 ​ຄັ້ງ…ແລະ 99 ເປີເຊັນ ຂອງພວກມັນ ຖືກຍິງຕົກ.

ອ່ານຂ່າວນີ້ເປັນພາສາອັງກິດ

ຟໍຣັມສະແດງຄວາມຄິດເຫັນ

XS
SM
MD
LG