ກຳລັງກອງທັບເຮືອຂອງອີສຣາແອນ ໄດ້ບຸກທຳລາຍຂະບວນເຮືອ 6 ລຳ ທ່ີບັນທຸກພວກນັກເຄື່ອນໄຫວ
ທ່ີນິຍົມພວກປາເລສໄຕນ໌ ທ່ີກຳລັງປະກອບພາລະກິດໃຫ້ການຊ່ອຍເຫລືອໃນເຂດກາຊາ ຊຶ່ງພວກທະ
ຫານໜ່ວຍກ້າຕາຍຂອງອີສຣາແອນໄດ້ສັງຫານພວກນັກເຄື່ອນໄຫວໃນເຮືອຢ່າງນ້ອຍ 10 ຄົນ.
ກຳລັງຂອງອີສຣາແອນໄດ້ລັດທາງຂອງພວກຝູງເຮືອເຫລົ່ານີ້ໃນມື້ຄືນຜ່ານມານີ້ ໂດຍພາກັນບຸກເຂົ້າໄປໃນເຮືອ
ຈາກພວກເຮືອບິນເຮລີຄອບເຕີ ແລະພາກັນເປີດສາກຍິງໃສ່ເຮືອລຳນຶ່ງເປັນຢ່າງນ້ອຍ. ບັນດານັກເຄື່ອນໄຫວ
ນິຍົມປາເລສໄຕນ໌ ກ່າວວ່າ ພວກຢູ່ໃນເຮືອຢ່າງນ້ອຍ30ຄົນໄດ້ຮັບບາດເຈັບ.
ກອງທັບອີສຣາແອນກ່າວວ່າ ພວກໜ່ວຍກ້າຕາຍຂອງຕົນໄດ້ເປີດສາກຍິງໃສ່ເຮືອຫລັງຈາກພວກນັກເຄື່ອນໄຫວ
ໂຈມຕີເຂົາເຈົ້າດ້ວຍມີດ ກ້ອນຫິນ ທໍ່ເຫລັກແລະຍິງປືນໃສ່ເຂົາເຈົ້າ. ທະຫານອີສຣາແອນກ່າວວ່າການຍິງຕໍ່ສູ້ກັນ
ໄດ້ເພີ່ມທະວີຂຶ້ນ ຫລັງຈາກພວກປະທ້ວງຍຶດອາວຸດຈາກທະຫານຄົນນຶ່ງຂອງຕົນ ແລະທະຫານຂອງຕົນຫລາຍຄົນ
ໄດ້ຮັບບາດເຈັບໃນການປະທະກັນຫລາຍຄັ້ງ.
ຮອງລັດຖະມຸນຕີການຕ່າງປະເທດອີສຣາແອນ ທ່ານ Danny Ayalon ກ່າວຫາພວກທີ່ຈັດສົ່ງຝູງເຮືອເຫລົ່ານີ້ວ່າ
ມີຄວາມຕັ້ງໃຈແບບຮຸນແຮງ ແຕ່ບັນດາຜູ້ຕາງໜ້າຂອງຂະບວນການອີດສະລະກາຊາຫລືFree Gaza Movement
ກ່າວວ່າ ພວກເຂົາເຈົ້າພຽງແຕ່ພະຍາຍາມດຶງດູມຄວາມສົນໃຈຕໍ່ການປິດລ້ອມເປັນເວລາ3 ປີຂອງອີສຣາແອນໃນ
ເຂດກາຊາເທົ່ານັ້ນ.
ປະທານາທິບໍດີ Mahmoud Abbas ແຫ່ງປາເລສໄຕນ໌ ປະນາມການປະຕິງານຂອງອີສຣາແອນນີ້ ໂດຍເອີ້ນວ່າ ເປັນ
ການຂ້າລ້າງຜານຜູ້ຄົນເປັນໝູ່. ກະຊວງການຕ່າງປະເທດເທີກກີ ກ່າວວ່າ ການບຸກລຸກໂຈມຕີຂອງອີສຣາແອນນີ້ເປັນ
ທີ່ຮັບເອົາບໍ່ໄດ້ ແລະເຕືອນອີສຣາແອນວ່າອີສຣາແອນຈະປະເຊີນກັບຜົນສະທ້ອນຕາມພາຍຫລັງ.