ພວກຫົວຮຸນແຮງຈັດ ລັດອິສລາມ ໄດ້ອ້າງເອົາຄວາມຮັບຜິດຊອບ ສຳລັບ ການໂຈມຕີ ດ້ວຍລະເບີດສະຫລະຊີບ ຕໍ່ສະຖານທີ່ຜະລິດນ້ຳມັນ ຂອງລັດ ຢູ່ທາງພາກເໜືອ ຂອງ ນະຄອນ Baghdad ທີ່ເຮັດໃຫ້ມີ ຜູ້ເສຍຊີວິດ 11 ຄົນ ແລະ ອີກ 21 ຄົນ ໄດ້ຮັບບາດເຈັບ ໃນວັນອາທິດມື້ນີ້.
ມືລະເບີດສະຫລະຊີບ ໄດ້ລະເບີດລົດຄັນນຶ່ງ ຢູ່ໃກ້ໆ ໜ້າປະຕູທາງເຂົ້າສະຖານທີ່ ຜະລິດນ້ຳມັນ ຕອນປະມານ 6 ໂມງເຊົ້າ ຂອງເວລາໃນທ້ອງຖິ່ນ. ຫຼັງຈາກລະເບີດ ໄດ້ແຕກຂຶ້ນແລ້ວ ລົດຕູ້ອີກຄັນນຶ່ງ ທີ່ບັນທຸກພວກກໍ່ການຮ້າຍ ທີ່ໃສ່ເສື້ອລະເບີດ ຢ່າງໜ້ອຍ 6 ຄົນ ກໍໄດ້ເຂົ້າໄປໃນພື້ນທີ່ ຂອງສະຖານທີ່ດັ່ງກ່າວ.
ຫຼັງຈາກມີການຍິງຕໍ່ສູ້ກັນ ປະມານຊົ່ວໂມງນຶ່ງ ກຳລັງຮັກສາຄວາມປອດໄພ ກໍສາມາດ ຢຸດຢັ້ງພວກຫົວຮຸນແຮງໄດ້. ແຕ່ບໍ່ແມ່ນກ່ອນໜ້າພວກເຂົາ ຈະສາມາດວາງເພີງໃສ່ ສະຖານທີ່ເກັບຖັງນ້ຳມັນ 3 ແຫ່ງ ອີງຕາມໂຄສົກ ກອງບັນຊາການຂອງ Baghdad.
ອົງການຂ່າວສານ Aamaq ທີ່ເປັນເຄືອຂ່າຍຂອງກຸ່ມລັດອິສລາມ ໄດ້ລາຍງານວ່າ ກຸ່ມ “ທະຫານຂອງອິສລາມ” ແມ່ນເປັນພວກທີ່ຮັບຜິດຊອບ ສຳລັບການໂຈມຕີດັ່ງກ່າວນັ້ນ.
