ກຸ່ມໜຶ່ງທີ່ອ້າງຕົນວ່າເປັນພວກຫົວຮຸນແຮງ ລັດອິສລາມ ຫລື IS ໄດ້ເປີດເຜີຍວິດີໂອເຊິ່ງພວກເຂົາຂົ່ມຂູ່ວ່າຈະຕັດຫົວໂຕປະກັນຊາວ ໂຄຣເອເຊຍຄົນໜຶ່ງ ຖ້າລັດຖະບານ ອີຢິບ ບໍ່ປ່ອຍໂຕພວກແມ່ຍິງມຸສລິມ ອອກຈາກຄຸກ.
ວິດີໂອດັ່ງກ່າວ, ໄດ້ສະແດງໃຫ້ເຫັນຊາຍຄົນໜຶ່ງນຸ່ງຊຸດສີເຫຼືອງຄຸເຂົ່າຢູ່ຕໍ່ໜ້າພວກຫົວຮຸນແຮງໃສ່ໜ້າກາກຢືນຈັບມີດຢູ່, ທີ່ເຊື່ອວ່າ ມາຈາກກຸ່ມ ຫົວຮຸນແຮງ ທີ່ເປັນເຄືອຂ່າຍຂອງກຸ່ມລັດອິສລາມອີຈິບໃນແຫຼມຊີນາຍ.
ຊາຍຄົນນັ້ນອ່ານຂໍ້ຄວາມອອກເປັນສຽງດັງ, ເຊິ່ງຖືກລະບຸວ່າເປັນທ້າວ Tomislav Salopek ອາຍຸ 30 ປີ. ລາວກ່າວວ່າ ພວກ IS ໄດ້ຈັບກຸມລາວໃນວັນທີ 22 ກໍລະກົດ.
ລາວກ່າວວ່າ ລາວຈະຖືກຂ້າຖ້າເຈົ້າໜ້າທີ່ ອີຢິບ ບໍ່ຍອມເຮັດຕາມຄຳສັ່ງພາຍໃນ 48 ຊົ່ວໂມງ, ເຖິງແມ່ນວ່າມັນຍັງບໍ່ທັນມີຄວາມກະຈ່າງແຈ້ງວ່າ ກຸ່ມດັ່ງກ່າວຢາກໃຫ້ມີການປ່ອຍໂຕອອກຈາກຄຸກນັ້ນແມ່ນໃຜ.
ກະຊວງຕ່າງປະເທດ ໂຄຣເອເຊຍ ໄດ້ຢືນຢັນວ່າປະຊາຊົນຂອງຕົນຄົນໜຶ່ງໄດ້ຖືກລັກພາໂຕໃນນະຄອນຫຼວງ ໄຄໂຣ ເມື່ອເດືອນແລ້ວນີ້.
ກ່າວກັນວ່າ ທ້າວ Salopek ໄດ້ເຮັດວຽກໃຫ້ກັບບໍລິສັດ CGG Ardiseis, ເຊິ່ງເປັນບໍລິສັດ ນ້ຳມັນ ແລະ ແກສ ຂອງຝຣັ່ງ ທີ່ມີຫ້ອງການຕັ້ງຢູ່ໃນນະຄອນຫຼວງ ໄຄໂຣ.
