ພວກຫົວຮຸນແຮງ ລັດອິສລາມ ໄດ້ນຳອອກເຜີຍແຜ່ ວີດີໂອ ທີ່
ປາກົດສະແດງໃຫ້ເຫັນການຕັດຫົວຂອງໂຕປະກັນອາເມຣິກັນ
ຄົນທີສອງ ຄືນັກຂ່າວ Steven Sotloff.
ໂຄສົກຍິງກະຊວງຕ່າງປະເທດສະຫະລັດທ່ານນາງ Jen Psaki
ກ່າວວ່າ ເຈົ້າໜ້າທີ່ກຳລັງກວດສອບເບິ່ງຄວາມແນ່ນອນຂອງວີດີ
ໂອ. ທ່ານນາງກ່າວວ່າ ຖ້າມັນແມ່ນແທ້ແລ້ວ “ພວກເຮົາມີຄວາມ
ເສົ້າສະຫລົດໃຈທີ່ສຸດ.”
ຢູ່ໃນວີດີໂອນັ້ນ ຜູ້ຊາຍຫົວຮຸນແຮງ ທີ່ໃສ່ໜ້າກາກດຳ ມີສຳນຽງ
ອັງກິດ ກ່າວໂດຍກົງຕໍ່ປະທານາທິບໍດີສະຫະລັດ ທ່ານ Barack
Obama ໂດຍເອີ້ນການຕາຍຂອງ ທ່ານSotloff ວ່າ ເປັນການຕອບໂຕ້ຕໍ່ການໂຈມຕີທາງອາກາດຂອງສະຫະລັດໃສ່ພວກລັດອິສລາມ ໃນອີຣັກ.
ຜູ້ຊາຍຄົນນີ້ ຍັງກ່າວວ່າ ໃນຂະນະທີ່ລູກສອນໄຟຂອງພວກເຈົ້າ ສືບຕໍ່ໂຈມຕີ ປະຊາຊົນ
ຂອງພວກເຮົາ ມີດຂອງພວກເຮົາກໍຈະສືບຕໍ່ປາດຄໍປະຊາຊົນຂອງ ພວກເຈົ້າ.
ປ.ໂອບາມາ ປະນາມ ການຕັດຫົວ ທ່ານ Sotloff
ນອກນັ້ນ ຊາຍຄົນນີ້ ຍັງໄດ້ຂົ່ມຂູ່ຈະເອົາຊີວິດໂຕປະກັນຊາວອັງກິດ ທ່ານ David
Cawthorne Haines.
ນາຍົກລັດຖະມົນຕີອັງກິດ ທ່ານ David Cameron ຮ້ອງການສັງຫານ ທ່ານ Sotloff
ວ່າ “ປ່າເຖຶ່ອນ ແລະຊົ່ວຊ້າ.”
ພວກຫົວຮຸນແຮງລັດອິສລາມ ໄດ້ຕັດຫົວນັກຂ່າວ ອາເມຣິກັນ ອີກຄົນນຶ່ງ ເມື່ອເດືອນ
ແລ້ວນີ້ ທ່ານ James Foley ແລະໄດ້ນຳເຜີຍແຜ່ຮູບພາບການສັງຫານ ທີ່ໜ້າຢ້ານກົວ
ດັ່ງກ່າວທາງອິນເຕີແນັດ.
ໂຄສົກຄົນນຶ່ງຂອງຄອບຄົວ Sotloff ກ່າວວ່າ ທາງຄອບຄົວຮັບຊາບກ່ຽວກັບ ວີດີໂອ ແລະກຳລັງໂສກເສົ້າເສຍໃຈເປັນການສ່ວນໂຕ."
ຫລັງຈາກການສັງຫານ ທ່ານ Foley ແລ້ວ ແມ່ຂອງທ່ານ Steven Sotloff ທ່ານນາງ
Shirley ກໍໄດ້ຂໍຮ້ອງໂດຍກົງ ຕໍ່ຜູ້ນຳລັດອິສລາມ ທ້າວ Abu Bark al-Baghdadi
ໃຫ້ປ່ອຍໂຕລູກຊາຍຂອງນາງ ແລະນາງກ່າວວ່າ ລາວບໍ່ສົມຄວນທີ່ຈະມາຮັບໂທດ ຍ້ອນ
ນະໂຍບາຍສະຫະລັດ ຢູ່ໃນອີຣັກ.
