ນັກເຄື່ອນໄຫວ ຊີເຣຍ ແລະ ຫົວໜ້າວັດຖຸບູຮານຂອງປະເທດກ່າວວ່າ ພວກລັດ ອິສລາມ ໄດ້ລະເບີດວັດໂບຮານໃນເມືອງ Palmyra ຖິ້ມ, ເຊິ່ງເປັນສະຖານທີ່ໜຶ່ງທີ່ມີປະຫວັດສາດຍາວນານທີ່ສຸດໃນ ຕາເວັນອອກກາງ.
ທ່ານ Maamoun Abdulkarim ກ່າວວ່າ ຄວາມຢ້ານກົວທີ່ມືດມົນທີ່ສຸດຂອງເພ່ິນແມ່ນໄດ້ກາຍເປັນຈິງແລ້ວ.
ພວກຫົວຮຸນແຮງ ລັດອິສລາມ ໄດ້ທຳລາຍວັດ Baal Shamin ທີ່ມີອາຍຸເກົ່າແກ່ 2,000 ປີ ດ້ວຍລະເບີດແຮງພໍທີ່ຈະທຳລາຍຫຼັກເສົາຫີນ ໂຣມັນ ທີ່ອ້ອມຮອບຕຶກບູຮານຢ່າງແຮງ.
ອົງການສິ້ງຊອມ ສິດທິມະນຸດໃນ ຊີເຣຍ ທີ່ມີຫ້ອງການຕັ້ງຢູ່ໃນ ອັງກິດ ໄດ້ຢືນຢັນເຖິງການ ທຳລາຍວັດດັ່ງກ່າວໃນວັນອາທິດວານນີ້. ສັບປະດາຜ່ານມາພວກເຂົາເຈົ້າກ່າວວ່າ ພວກຫົວຮຸນແຮງໄດ້ຕັດຫົວອະດີດຜູ້ອຳນວຍການວັດຖຸໂບຮານຂອງເມືອງ Palmyra ທ່ານ Khaled Asaad ຕໍ່ໜ້າສາທາລະນະຊົນ ຜູ້ຊຶ່ງເຮັດວຽກເພື່ອປົກປັກຮັກສາປະວັດສາດທີ່ແຕກຫັກງ່າຍ ໃນສະຖານອັນເປັນມໍລະດົກໂລກ ສະຫະປະຊາຊາດ ເປັນເວລາ 50 ປີມາແລ້ວ.
ພວກລັດອິສລາມ ໄດ້ຍຶດເອົາເມືອງ Palmyra ໃນເດືອນພຶດສະພາທີ່ຜ່ານມາ ແລະ ນັກປະຫວັດສາດໃນທັນທີທັນໃດ ໄດ້ອອກສຽງເຕືອນໄພໄປທົ່ວໂລກ. ພວກຫົວຮຸນແຮງກ່າວວ່າ ສິ່ງປະດິດຂອງຄົນໂບຮານ ແລະ ຮູບປັ້ນແມ່ນສິ່ງດູໝິ່ນສາສະໜາ. ນອກນັ້ນພວກເຂົາກໍຍັງໄດ້ທຳລາຍສະຖານທີ່ປະຫວັດສາດແຫ່ງອື່ນໆອີກໃນ ອີຣັກນຳດ້ວຍ.
ແຕ່ວ່າຂໍ້ມູນສຳຫຼວດກ່າວວ່າພວກ ລັດອິສລາມ ໄດ້ຂາຍວັດຖຸໂບຮານຫຼາຍຊິ້ນສ່ວນເພື່ອສ້າງລາຍໄດ້. ພວກເຂົາກ່າວວ່າ ມີວິດີໂອ ສະແດງໃຫ້ເຫັນວ່າພວກຫົວຮຸນແຮງໄດ້ລະເບີດຮູບປັ້ນຫຼາຍຮູບ ແລະ ສິນລະປະກຳຫຼາຍອັນແມ່ນຂອງປອມ.
