ຜູ້ວາງລະເບີດດ້ວຍລົດສະຫຼະຊີບ ຂອງລັດອິສລາມ ຄົນໜຶ່ງ ໄດ້
ຂັບລົດ ເຂົ້າໃສ່ຂະບວນລົດ ຂອງພວກທະຫານອີຣັກ ໂດຍໄດ້
ສັງຫານ ຜູ້ບັນຊາການທະຫານ ອາວຸໂສ ສອງທ່ານ ອີງຕາມ
ບັນດາເຈົ້າໜ້າທີ່ຂອງອີຣັກ.
ບັນດາເຈົ້າໜ້າທີ່ ກ່າວວ່າ ການໂຈມຕີເກີດຂຶ້ນໃນວັນພະຫັດມື້ນີ້
ຢູ່ທາງເໜືອ ຂອງເມືອງຣາມາດີ ໃນແຂວງ ອານບາ ທີ່ພວກລັດ
ອິສລາມໄດ້ຄວບຄຸມຢູ່ນັ້ນ ບ່ອນທີ່ກອງກຳລັງ ທີ່ສະໜັບສະໜູນ
ແບກແດດ ໄດ້ສູ້ລົບກັບພວກຫົວຮຸນແຮງຈັດ ເປັນເວລາຫລາຍ
ເດືອນແລ້ວນັ້ນ.
ພົນຕີ Abdul-Rahman Abu-Regheef ຮອງຜູ້ບັນຊາການ ຝ່າຍປະຕິບັດການ ໃນແຂວງ
ອານບາ ແລະພົນຈັດຕະວາ Sefeen Abdul Maguid ຜູ້ບັນຊາການກອງພົນທີ 10 ແມ່ນ
ລວມຢູ່ໃນບັນດາຜູ້ທີ່ເສຍຊີວິດ ອີງຕາມຖະແຫລງການສະບັບໜຶ່ງ ຂອງກອງທັບ.
ນອກນັ້ນ ຍັງມີລາຍງານວ່າ ມີຜູ້ຄົນອີີກຈຳນວນນຶ່ງ ໄດ້ຖືກສັງຫານ ໃນການໂຈມຕີດັ່ງກ່າວ.
ກອງກຳລັງລັດຖະບານອີຣັກ ທີ່ໜູນຫຼັງໂດຍການໂຈມຕີທາງອາກາດ ມາເປັນເວລາດົນເຖິງ
ປີໜຶ່ງ ພາຍໃຕ້ການນຳພາໂດຍສະຫະລັດນັ້ນກຳລັງ ສູ້ຊົນເພື່ອໃຫ້ບັນລຸຜົນທີ່ສຳຄັນ ໃນການ ຂັບໄລ່ ພວກນັກຕໍ່ສູ້ລັດອິສລາມ ທີ່ໄດ້ເຂົ້າຄວບຄຸມ ພື້ນທີ່ອັນກວ້າງຂວາງ ຂອງອີຣັກ ແລະ ຊີເຣຍ.
ໃນວັນພະຫັດມື້ນີ້ ກຸ່ມຫົວຮຸນແຮງຈັດ ນິກາຍຊູນີ ໄດ້ຍຶດເອົາຫຼາຍ ກວ່າ 5 ບ້ານ ຈາກ
ພວກຕໍ່ຕ້ານລັດຖະບານກຸ່ມອື່ນໆ ໃນພາກເໜືອຂອງຊີເຣຍ ອີງຕາມອົງການທີ່ຕິດຕາມ
ການສູ້ລົບໃນຊີເຣຍ.
ກຸ່ມສິ້ງຊອມສິດທິມະນຸດ ໃນຊີເຣຍ ກ່າວວ່າ ໝູ່ບ້ານທີ່ຖືກຍຶດດັ່ງກ່າວ ແມ່ນຢູ່ໃນແຂວງ
ອາເລັບໂປ ແລະ ຢ່າງນ້ອຍບາງເຂດ ແມ່ນຢູ່ໃນຂົງເຂດ ທີ່ສະຫະລັດ ແລະເທີກີ ມີແຜນທີ່
ຈະເຮັດໃຫ້ເປັນເຂດປອດພວກ ລັດອິສລາມ.
