ພວກຫົວຮຸນແຮງມຸສລິມ ໄດ້ພາກັນບຸກໂຈມຕີຄຸກແຫ່ງນຶ່ງທີ່ຢູ່ໃກ້ກັບນະຄອນຫລວງ
ໄນຈີເຣຍ ໂດຍໄດ້ສັງຫານຍາມຜູ້ນຶ່ງແລະປ່ອຍພວກນັກໂທດ 119 ຄົນ ໃຫ້ຫຼົບໜີໄປ
ໃນຄວາມມືດ.
ຜູ້ເຫັນເຫດການກ່າວວ່າ ມີມືປືນປະມານ 20 ຄົນພາກັນຂີ່ລົດຈັກເຂົ້າໄປຫາຄຸກທີ່ຕັ້ງຢູ່
ໃນເມືອງ Kotonkarifi ຊຶ່ງພວກມືປືນ ໄດ້ຍິງພວກຍາມ ແລ້ວກໍລະເບີດປະຕູໃຫຍ່ທາງເຂົ້າ.
ກຸ່ມຫົວຮຸນແຮງມຸສລິມ ນິຍົມແນວທາງເດີມຈັດ Boko Haram ໄດ້ປະກາດໃນວັນພະຫັດ
ວານນີ້ວ່າ ເຂົາເຈົ້າເປັນຜູ້ຮັບຜິດຊອບໃນການບຸກໂຈມຕີ ແລະກ່າວວ່າເຂົາເຈົ້າຢາກປ່ອຍ
ສະມາຊິກຂອງເຂົາເຈົ້າ 7 ຄົນທີ່ຖືກຄຸມຂັງຢູ່ທີ່ນັ້ນ ແຕ່ວ່າມີພວກນັກໂທດ 119 ຄົນພາກັນ
ເອົາຕົວຫລົບໜີໄປ. ເຈົ້າໜ້າທີ່ກ່າວວ່າ 25 ຄົນໄດ້ຖືກຈັບກຸມຄືນອີກ.
ກຸ່ມ Boko Haram ທີ່ມີຄວາມໝາຍວ່າ “ການສຶກສາຂອງປະເທດຕາເວັນຕົກນັ້ນເປັນ
ບາບ” ເປັນຜູ້ຮັບຜິດຊອບຕໍ່ການເສຍຊີວິດຂອງປະຊາຊົນຈໍານວນຫລາຍຮ້ອຍຄົນຢູ່ທາງ
ພາກເໜືອຂອງໄນຈີເຣຍ. ກຸ່ມດັ່ງກ່າວນີ້ ຕ້ອງການນຳໃຊ້ກົດໝາຍອັນເຄັ່ງຄັດ ຂອງສາສະ
ໜາອິສລາມ ແລະຂູ່ຂວັນທີ່ຈະຂ້າຊາວຄຣິສຕຽນທີ່ພາກັນອາໄສຢູ່ໃນພາກເໜືອຂອງ
ໄນຈີເຣຍ ທີ່ປະຊາຊົນສ່ວນໃຫຍ່ເປັນຊາວມຸສລິມ.
