ນາຍົກລັດຖະມົນຕີເທີກີກ່າວວ່າ ໂຕປະກັນຊາວເທີກີ 49 ຄົນ
ທີ່ຖືກພວກຫົວຮຸນແຮງລັດອິສລາມຈັບໄປ ຢູ່ໃນປະເທດອີຣັກ
ເມື່ອເດືອນມິຖຸນາຜ່ານມານັ້ນ ໄດ້ຖືກປ່ອຍໃຫ້ເປັນອິດສະຫຼະ
ແລ້ວ.
ທ່ານ Ahmet Davutoglu ກ່າວໃນວັນເສົາມື້ນີ້ວ່າ ໂຕປະກັນ
ໄດ້ຖືກປ່ອຍໃນຕອນເຊົ້າມື້ນີ້ແລະໄດ້ເດີນທາງໄປເຖິງປະເທດ ເທີກີດ້ວຍຄວາມປອດໄພແລ້ວ.
ໂຕປະກັນທີ່ຮວມທັງພວກນັກການທູດ ທະຫານແລະເດັກນ້ອຍ
ໄດ້ຖືກລັກພາໂຕໄປ ຈາກສະຖານກົງສຸນເທີກີ ທີ່ເມືອງ Mosul
ປະເທດອີຣັກ ເມື່ອວັນທີ 11 ມິຖຸນາຜ່ານມາ ໃນຂະນະທີ່ ພວກຫົວຮຸນແຮງລັດອິສລາມຕີ ເມືອງດັ່ງກ່າວແຕກ ໃນການເຂົ້າຢຶດເອົາບໍລິເວນອັນກວ້າງຂວາງຢູ່ໃນປະເທດອີຣັກແລະ ຊີເຣຍ.
ຍັງບໍ່ທັນເປັນທີ່ຈະແຈ້ງເທື່ອວ່າ ເທີກີເຮັດວິທີໃດ ຈຶ່ງມີການປ່ອຍໂຕປະກັນເຫຼົ່ານີ້ ແລະມີ ການຈ່າຍເງິນຄ່າໄຖ່ຫລືບໍ່.
ເທີກີ ຊຶ່ງເປັນສະມາຊິກຂອງອົງການເນໂຕ້ ໄດ້ສະແດງຄວາມລັງເລໃຈໃນການທີ່ຈະເຂົ້າ ຮ່ວມແນວໂຮມຕ້ານພວກຫົວຮຸນແຮງລັດອິສລາມໂດຍອ້າງເຫດຜົນໃນເລື່ອງຄວາມປອດ ໄພຂອງພົນລະເມືອງຕົນ 49 ຄົນ ທີ່ຖືກລັກພາໂຕໄປນັ້ນ.
ການປ່ອຍໂຕປະກັນເຫຼົ່ານີ້ແມ່ນກົງກັນຂ້າມກັບການຕັດຫົວເມື່ອໄວໆມານີ້ ຂອງນັກຂ່າວ ຊາວອາເມຣິກັນ 2 ຄົນແລະພະນັກງານໃຫ້ຄວາມຊ່ອຍເຫຼືອຊາວອັງກິດຜູ້ນຶ່ງ ໂດຍກຸ່ມລັດ ອິສລາມ.
ນາຍົກລັດຖະມົນຕີ Davutoglu ກ່າວວ່າ ການປ່ອຍໂຕປະກັນເຫຼົ່ານີ້ແມ່ນເປັນຜົນຂອງ ວິທີການປະຕິບັດງານໂດຍໜ່ວຍສືບລັບເທີກີ ແຕ່ບໍ່ໄດ້ໃຫ້ລາຍລະອຽດໃດໆເພີ້ມຕື່ມ.
ປະທານາທິບໍດີ Recep Tayyip Erdogan ກ່າວວ່າ ຊາວເທີກີໄດ້ຖືກປ່ອຍ ໃນການປະ ຕິບັດງານທີ່ສຳເລັດຜົນທີ່ໃຊ້ເວລາຕະຫຼອດຄືນ ທີ່ມີຂຶ້ນທ່າມກາງຄວາມລຶກລັບນັ້ນ.
ຄົນຂັບລົດບັນທຸກຊາວເທີກີ 32 ຄົນ ທີ່ຖືກຈັບໂຕໄປຄືກັນ ຢູ່ເມືອງ Mosul ເມື່ອວັນທີ 6 ເດືອນມິຖຸນາຜ່ານມານັ້ນ ໄດ້ຖືກປ່ອຍໂຕນຶ່ງເດືອນຕໍ່ມາ. ເທີກີບໍ່ຍອມໃຫ້ຂ່າວຄາວໃດໆ ກ່ຽວກັບການປ່ອຍໂຕພວກກ່ຽວ.
ໃນການເຄື່ອນໄຫວອີກດ້ານນຶ່ງນັ້ນ ຮອງນາຍົກລັດຖະມົນຕີເທີກີກ່າວໃນວັນເສົາມື້ນີ້ວ່າ ຊາວເຄີດຈາກຊີເຣຍຫຼາຍສິບພັນຄົນ ໄດ້ຂ້າມເຂົ້າໄປໃນເທີກີຫຼັງຈາກອັງກາຣາ ໄດ້ເປີດ ຊາຍແດນຂອງຕົນ.
ທ່ານ Numan Kurtulmas ກ່າວວ່າ ຊາວເຄີດຈາກຊີເຣຍປະມານ 45000 ຄົນ ໄດ້ຂ້າມ ຊາຍແດນເຂົ້າໄປໃນເທີກີ ຫລົບໜີການປະທະກັນກັບພວກຫົວຮຸນແຮງລັດອິສລາມ.
ທ່ານ Kurtulmas ເວົ້າວ່າ ເທີກີໄດ້ເປີດຊາຍແດນຂອງຕົນ 8 ຈຸດເພື່ອໃຫ້ຊາວເຄີດຂ້າມ ເຂົ້າໄປ.
