ທະຫານອີຮັກ ຍັງສືບຕໍ່ທຳການສູ້ລົບ ໃນວັນພຸດມື້ນີ້ ຢູ່ເມືອງ
Ramadi ທີ່ພວກເຂົາເຈົ້າພະຍາຍາມຕ່າວປີ້ນ ການສູນເສຍ
ທີ່ສຳຄັນເມື່ອຕົ້ນປີນີ້ແລະຍຶດເອົາເມືອງດັ່ງກ່າວນີ້ຄືນມາຈາກ
ພວກຫົວຮຸນແຮງກຸ່ມລັດອິສລາມ.
ການບຸກໂຈມຕີໄດ້ກ້າວເຂົ້າສູ່ມື້ທີສອງ ໂດຍແນໃສ່ບັນດາຕຶກ
ໂຮງການຂອງລັດຖະບານ. ເຈົ້າໜ້າທີ່ອີຣັກໄດ້ສະແດງຄວາມ
ຫວັງໄປໃນແງ່ດີວ່າ ກຳລັງຂອງຕົນ ຈະສາມາດ ເຂົ້າຄວບຄຸມ
ເມືອງດັ່ງກ່າວ ພາຍໃນສອງສາມມື້ຂ້າງໜ້ານີ້.
ໂຄສົກຂອງກຳລັງປະສົມພາຍໃຕ້ການນຳພາຂອງສະຫະລັດ
ທີ່ໃຫ້ການສະໜັບສະໜຸນ ແກ່ທະຫານອີຣັກ ດ້ວຍການໂຈມຕີທາງອາກາດ ຕໍ່ເປົ້າໝາຍ
ຂອງກຸ່ມລັດອິສລາມ ພັນເອກ Steve Warren ໄດ້ໃຫ້ຄວາມເຫັນແບບລະມັດລະວັງໃນ
ການຊັ່ງຊາເບິ່ງສະຖານະການ ໂດຍກ່າວໃນວັນອັງຄານວານນີ້ວ່າ ໃນຂະນະທີ່ການບຸກເຂົ້າຍຶດເອົາເມືອງ Ramadi ເປັນສິ່ງທີ່ຫລີກລ່ຽງບໍ່ໄດ້ນັ້ນ ແຕ່ກໍຈະມີ ການສູ້ລົບກັນຢ່່າງ
ດຸເດືອດເກີດຂຶ້ນ ແລະຈະໃຊ້ເວລາດົນສົມຄວນ.
ທ່ານກ່າວວ່າ ມີພວກຫົວຮຸນແຮງປະມານ 250 ຫາ 350 ຄົນຢູ່ໃນເມືອງດັ່ງກ່າວແລະອີກ
ຫລາຍໆຮ້ອຍຄົນຢູ່ໃນບໍລິເວນໃກ້ຄຽງ.
ເຮືອບິນລົບຂອງກຳລັງປະສົມໄດ້ທຳການໂຈມຕີເປົ້າໝາຍຕ່າງໆຫຼາຍສິບຖ້ຽວໃນເມືອງ
Ramadi ມາໄດ້ຫລາຍອາທິດແລ້ວ ຮວມທັງເປົ້າໝາຍ ຢູ່ໃນເຂດຊານເມືອງ ໃນວັນອັງ
ຄານວານນີ້. ທ່ານ Warren ເວົ້າວ່າ ການໂຈມຕີຍັງຈະດຳເນີນຕໍ່ໄປເພື່ອສະແດງໃຫ້ນັກ
ລົບຂອງກຸ່ມລັດອິສລາມເຫັນວ່າ ພວກເຂົາຈະບໍ່ມີບ່ອນທີ່ສາມາດຫລົບລີ້ໄດ້.
ການສູນເສຍເມືອງ Ramadi ໃນເດືອນພຶດສະພາປີນີ້ແມ່ນການສູນເສຍທີ່ສຳຄັນສຳລັບ
ລັດຖະບານແລະກອງທັບອີຣັກ. ຄວາມພະຍາຍາມເພື່ອຍຶດເອົາເມືອງດັ່ງກ່າວຄືນ ຊຶ່ງຕັ້ງ
ຢູຸ່ປະມານ 100 ຫລັກກິໂລແມັດຫ່າງຈາກນະຄອນຫຼວງແບັກແດດໄປທາງກ້ຳຕາເວັນຕົກ
ໄດ້ໃຊ້ເວລາຫຼາຍໆເດືອນ ໃນການສູ້ລົບກັນຢູ່ໃນເຂດຊານເມືອງ ແລະການປະຕິບັດງານ
ເພື່ອຕັດເສັ້ນທາງລຳລຽງເຂົ້າໄປສູ່ເມືອງດັ່ງກ່າວ.
