ທະຫານອິຣັກ ໄດ້ເລີ້ມເຄື່ອນກຳລັງຢ່າງລະໝັດລະວັງ ໃນວັນພະຫັດມື້ນີ້ ເຂົ້າໄປໃນເຂດຄຸ້ມ ພາຍໃນກຳແພງເມືອງ Mosul ໂດຍກວດຄົ້ນໄປໃນແຕ່ລະບ້ານເພື່ອຄ້ຳປະ ກັນຄວາມປອດໄພຂອງພົນລະເຮືອນ. ພວກທະຫານຕ້ອງໄດ້ລະມັດລະວັງກັບດັກລະເບີດ ພ້ອມ ທັງການດັກສະກັດໂຈມຕີ ແລະການຍິງສັງຫານຈາກໄລຍະໄກ ຂອງພວກ ຫົວຮຸນແຮງ ກຸ່ມລັດອິສລາມ ຊຶ່ງໄດ້ຮັບການຮຽກຮ້ອງຈາກຜູ້ນຳຂອງພວກເຂົາ ໃຫ້ສືບຕໍ່ຕັ້ງຢູ່ກັບທີ່ແລະ ຕ້ານຍັນ ບໍ່ໃຫ້ສູນເສຍເມືອງສຳຄັນແຫ່ງສຸດທ້າຍທີ່ພວກເຂົາຍຶດຄອງໃນອີຣັກນັ້ນ.
ການບຸກເຂົ້າໄປໃນເມືອງ Mosul ຊຶ່ງກຸ່ມລັດອິສລາມ ໄດ້ເຂົ້າຍຶດຄອງ ດົນກວ່າ 2 ປີມາແລ້ວ ພາໃຫ້ຫຼາຍຮ້ອຍຄອບຄົວຫຼັ່ງໄຫຼໜີອອກໄປຈາກບ້ານເຮືອນຂອງພວກເຂົາເຈົ້າ. ພວກເຂົາເຈົ້າເລີ່ມພາກັນອອກຈາກເມືອງ Mosul ຊຶ່ງບາງພວກກໍພາກັນຖືທຸງຂາວ ບາງພວກກໍສົ່ງສັນຍານຂອງການໄດ້ຮັບໄຊຊະນະ ໃສ່ກອງກຳລັງລັດຖະບານ ທີ່ໄດ້ຮັບການຝຶກແອບທະຫານສະຫະລັດ ທີ່ໄດ້ຮັບໄຊຊະນະຫຼາຍໆຄັ້ງໃນປີນີ້ ໃນທີ່ອື່ນໆໃນປະເທດອີຣັກ ຕໍ່ພວກນັກລົບລັດອິສລາມ ຮວມທັງທີ່ເມືອງ Fallujah ນຳ.
ໃນຂະນະທີ່ປະຊາຊົນ ໃນເມືອງ Gogjali ທາງພາກຕາເວັນອອກຂອງເມືອງ Mosul ພາກັນສະແດງຄວາມຍິນດີ ຕ້ອນຮັບການປົດປ່ອຍຈາກພວກນັກລົບລັດອິສລາມ ກໍມີ ຄວາມຢ້ານກົວຍິ່ງເພີ່ມຂຶ້ນ ໃນຂະນະທີ່ເຂດຄຸ້ມຕ່າງໆພາກຕາເວັນຕົກຂອງເມືອງ ທີ່ນິຍົມກຸ່ມລັດອິສລາມຢ່າງຫຼວງຫຼາຍນັ້ນ ຕົກຢູ່ໃນກຳມືຂອງກຳລັງລັດຖະບານ ການແກ້ແຄ້ນແລະການຕອບໂຕ້ຄືນ ກໍຈະເລີ້ມຂຶ້ນ ທັງຈາກປະຊາຊົນໃນເຂດທ້ອງຖິ່ນ ແລະພວກ
ທີ່ໄດ້ຮັບຄວາມທຸກທໍລະມານ ຈາກພວກນັກລົບຂອງກຸ່ມລັດອິສລາມ ໃນເວລາ 2 ປີ
ທີ່ພວກເຂົາຍຶດຄອງເມືອງ Mosul ແລະພວກທະຫານບ້ານ Sunni ທີ່ຖືກກ່າວຫາວ່າ
ໄດ້ທຳການໂຈມຕີ ເພື່ອແກ້ແຄ້ນ ຕໍ່ພວກຜູ້ຊາຍແລະເດັກຊາຍ ໃນເຂດໝູ່ບ້ານອ້ອມແອ້ມ
ທີ່ສົງໄສວ່າມີຄວາມສຳພັນກັບກຸ່ມລັດອິສລາມ.
ອົງການນິລະໂທດກຳສາກົນ ໄດ້ກ່າວໃນວັນພຸດວານນີ້ວ່າ ຕົນໄດ້ຮັບລາຍງານວ່າ ພວກທີ່ເປັນໃຈກັບພວກນັກລົບກຸ່ມລັດອິສລາມ ມີການກ່າວຫາວ່າ ໄດ້ຖືກນຳມາສົບປະໝາດ ທໍລະມານ ແລະທຸບຕີ ໃນຂະນະທີ່ພວກນັກລົບກັບກຸ່ມທະຫານບ້ານ ທີ່ເອີ້ນວ່າ Sabawi Tribal Mobilization ໄດ້ກວດຄົ້ນຕາມໝູ່ບ້ານຕ່າງໆ ທາງພາກໃຕ້ຂອງເມືອງ. ທ່ານ Lynn Maalouf ຈາກອົງການນິລະໂທດກຳສາກົນ ໄດ້ກ່າວວ່າ “ມັນເປັນປະເພນີທີ່ອັນຕະລາຍໃນການບໍ່ຖືກລົງໂທດ ຊຶ່ງພວກທີ່ກໍ່ການໃນການໂຈມຕີ ທຳນອງນີ້ ຮູ້ສຶກວ່າ ເຂົາເຈົ້າສາມາດເຮັດໄດ້ຢ່າງເສລີ ໃນການກໍ່ອາຊະຍາກຳຕ່າງໆ ແລະບໍ່ຮ້ອງໄດ້ຮັບໂທດແຕ່ຢ່າງໃດ.”
ອ່ານຂ່າວນີ້ເພີ້ມຕື່ມເປັນພາສາອັງກິດ
