ບັນດາຜູ້ນຳຂອງອີຣັກ ຈະເລີ້ມຂັ້ນຕອນການຄັດເລືອກເອົາ
ຜູ້ບັນຊາການທະຫານໃນວັນພຸດມື້ນີ້ ທີ່ສາມາດເປັນຜູ້ນຳພາ
ໃນການຈັດແຈງກອງກຳລັງຕ່າງໆ ເພື່ອຕໍ່ສູ້ກັບພວກຫົວຮຸນແຮງ
ລັດອິສລາມ ໃຫ້ດີຂຶ້ນກວ່າເກົ່າ.
ເສນາທິການຮ່ວມຂອງກອງທັບສະຫະລັດ ພົນເອກ Joseph
Dunford ກ່າວໃນວັນອັງຄານວານນີ້ ລະຫວ່າງການເດີນທາງ
ໄປຢ້ຽມຢາມ ອີຣັກ ວ່າ ກຸ່ມແນວໂຮມພາຍໃຕ້ການນຳພາຂອງ
ສະຫະລັດຕ້ອງມີຄົນນຶ່ງ ທີ່ສາມາດອອກຄຳສັ່ງ ກ່ຽວກັບການຕໍ່ສູ້
ທາງພາກພື້ນດິນ ເພື່ອຈະສະໜອງການສະໜັບສະໜູນ ທີ່ດີຂຶ້ນ.
ໃນຂະນະທີ່ກຸ່ມແນວໂຮມ ເປັນຜູ້ທຳການໂຈມຕີທາງອາກາດຢູ່ນັ້ນ ພວກນັກລົບຈາກ
ກອງທັບອີຣັກ ພວກທະຫານບ້ານ Shi’ite ພວກ ຊົນເຜົ່າ Sunni ແລະ ກອງກຳລັງ
ຊາວ Kurd ຕ່າງກໍພວມສູ້ລົບກັບ ພວກຫົວຮຸນແຮງ ຢູ່ໃນຫຼາຍໆເຂດ ຂອງອີຣັກ ໂດຍ
ປະສົບຜົນສຳເລັດ ໃນລະດັບທີ່ແຕກຕ່າງກັນ. ໂດຍລວມແລ້ວ ກຸ່ມພວກຫົວຮຸນແຮງ
ລັດອິສລາມ ຍັງສາມາດຍຶດຄອງດິນແດນສ່ວນໃຫຍ່ ທີ່ຕົນຢຶດໄດ້ ເມື່ອດົນກວ່າປີນຶ່ງ
ຜ່ານມາ.
ນາຍພົນ Dunford ກ່າວວ່າ ທ່ານຈະບໍ່ອະທິບາຍເຖິງ ສະຖານະການ ໃນອີຣັກ ວ່າ
ຢູ່ໃນສະພາບທີ່ບໍ່ໄປບໍ່ມາ ແລະ ຈະບໍ່ກ່າວເຖິງກຳນົດເວລາກ່ຽວກັບການບຸກໂຈມຕີ
ທີ່ແນ່ນອນ.
ໄຊຊະນະບັ້ນນຶ່ງທີ່ໄດ້ຮັບມາ ເມື່ອບໍ່ດົນມານີ້ ກໍແມ່ນໂຮງກັນນ້ຳມັນທີ່ສຳຄັນ ໃນເມືອງ
Beiji ຢູ່ທາງກ້ຳເໜືອຂອງນະຄອນຫຼວງ Baghdad ບ່ອນທີ່ ບັນດາເຈົ້າໜ້າທີ່ກອງທັບ
ສະຫະລັດ ແລະ ອີຣັກ ກ່າວວ່າ ກອງກຳລັງຂອງອີຣັກ ໄດ້ຢຶດຄືນມາໄດ້ ແລະ “ຢູ່ໃນ
ການຄວບຄຸມຢ່າງຄົບຖ້ວນ” ຫຼັງຈາກທີ່ໄດ້ສູ້ລົບກັນມາດົນກວ່ານຶ່ງປີ.
ໂຄສົກກອງທັບສະຫະລັດ ພັນຕີ Mike Filanowski ກ່າວໃນວັນອັງຄານວານນີ້ ຢູ່ທີ່
ນະຄອນຫຼວງ Baghdad ວ່າ ທະຫານອີຣັກ ຈຳນວນ 15,000 ຄົນ ແລະ ກຳລັງຮັກສາ
ຄວາມປອດໄພ ຈຳນວນນຶ່ງ ໄດ້ເຂົ້າຄວບຄຸມ ເມືອງ Beiji ແລະ ໄດ້ກວດລ້າງກຳລັງສັດຕູ
ທີ່ຍັງຫຼົງເຫຼືອຢູ່ນັ້ນ ອອກໄປຈາກບໍລິເວນດັ່ງກ່າວນຳດ້ວຍ.
