ຜູ້ນຳຊົນເຜົ່າເຄີດໃນອີຣັກ ທ່ານ Massoud Barzani ໄດ້
ໄປຢ້ຽມຢາມເຂດພູເຂົາ Mount Sinjar ຫຼັງຈາກພວກນັກຕໍ່ສູ້
ຊົນເຜົ່າເຄີດ peshmerga ໄດ້ທັບມ້າງວົງລ້ອມຂອງ ພວກນັກ
ຕໍ່ສູ້ຫົວຮຸນແຮງລັດອິສລາມ.
ປະທານາທິບໍດີ ຂົງເຂດປົກຄອງຕົນເອງເຄິ່ງໜຶ່ງຂອງຊາວເຄີດ
ໃນອີຣັກ ທ່ານ Barzani ກ່າວວ່າ ພວກນັກຕໍ່ສູ້ peshmerga
ໄດ້ເຂົ້າຍຶດຄອງຖະໜົນຕ່າງໆທັງໝົດ ທີ່ເນັ່ງໄປສູ່ເຂດພູເຂົາ
ດັ່ງກ່າວນັ້ນໄວ້ແລ້ວ ແລະ ໄດ້ປົດປ່ອຍບໍລິເວນ ບ່ອນທີ່ມີຊົນເຜົ່າ
Yazidis ຫຼາຍພັນຄົນ ທີ່ຖືກປະຫັດປະຫານ ຕົກຄ້າງຢູ່ນັ້ນ.
ທ່ານກ່າວຕື່ມອີກວ່າ ກອງກຳລັງຊາວເຄີດ ຈະບໍ່ຍິນຍອມໃຫ້ ພວກນັກຕໍ່ສູ້ຫົວຮຸນແຮງລັດອິສລາມໃດໆ ຫລົງເຫຼືອຢູ່ໃນບໍລິເວນ ທີ່ນັກຕໍ່ສູ້ peshmerga ສາມາດເຂົ້າໄປເຖິງໄດ້ນັ້ນ.
ໃນວັນເສົາຜ່ານມາ ກອງກຳລັງນັກຕໍ່ສູ້ peshmerga ທີ່ໄດ້ຮັບການໜຸນຫຼັງ ຈາກການ
ໂຈມຕີທາງອາກາດຂອງສະຫະລັດ ໄດ້ບຸກໂຈມຕີ ໃນທົ່ວບໍລິເວນທາງທິດເໜືອຂອງພູເຂົາ Sinjar ແລະບຸກຄືບໜ້າໄປສູ່ເມືອງ Sinjar ແລະເມືອງ Tal Afar ທາງທິດຕາເວັນອອກ ທີ່ຖືກປິດລ້ອມຢູ່ນັ້ນ.
ຂະບວນລົດບັນທຸກເຄື່ອງຊ່ວຍເຫຼືອ ຈຳນວນ 32 ຄັນ ທີ່ຊາວອີຣັກຊົນເຜົ່າເຄີດ ສົ່ງໄປເພື່ອຊ່ວຍເຫລືອ ຊາວ Yazidis ທີ່ຖືກປິດລ້ອມຢູ່ນັ້ນ ກໍໄດ້ໄປເຖິງເຂດພູເຂົາດັ່ງກ່າວ ໃນວັນເສົາຜ່ານມາ.
