ການໂຈມຕີດ້ວຍລະເບີດໃນທົ່ວອີຣັກ ໄດ້ເຮັດໃຫ້ປະຊາຊົນຢ່າງ
ໜ້ອຍ 30 ຄົນເສຍຊີວິດ ໃນວັນເສົາວານນີ້ ນຶ່ງມື້ ຫຼັງຈາກການ
ບຸກໂຈມຕີໂບກອິສລາມນິກາຍຊຸນນີແຫ່ງນຶ່ງ ທີ່ໄດ້ສັງຫານພວກ
ທີ່ໄປໂບດຢ່າງໜ້ອຍ 60 ຄົນ ໃນຂະນະທີ່ພວກເຂົາເຈົ້າໄປສວດ
ມົນພາວະນາເປັນປະຈຳ ໃນແຕ່ລະອາທິດນັ້ນ.
ບັນດາເຈົ້າໜ້າທີ່ກ່າວວ່າ ຜູ້ວາງລະເບີດສະລະຊີບຄົນນຶ່ງໄດ້ຂັບ
ລົດເຂົ້າຕຳຕຶກກະຊວງພາຍໃນຫຼັງນຶ່ງ ໃນແບກແດັດໃນວັນເສົາ
ວານນີ້ ເຮັດໃຫ້ ຢ່າງໜ້ອຍ 8 ຄົນເສຍຊີວິດ ແລະບາດເຈັບອີກ
ຫຼາຍຄົນ. ເວລານີ້ຍັງບໍ່ທັນມີຜູ້ໃດຫຼືກຸ່ມໃດອ້າງເອົາຄວາມຮັບຜິດ
ຊອບໃນການໂຈມຕີໃນຄັ້ງນີ້ເທື່ອ.
ບັນດາເຈົ້າໜ້າທີ່ອີຣັກ ກ່າວວ່າ ລະເບີດ 3 ລູກໄດ້ເຕກຂຶ້ນໃນເມືອງ Kirkuk ສັງຫານປະ
ຊາຊົນຢ່າງໜ້ອຍ 18 ຄົນ ແລະໄດ້ຮັບບາດເຈັບ ຫຼາຍກວ່າ 100 ຄົນ. ລະເບີດອີກລູກນຶ່ງໄດ້ສັ່ນສະເທືອນເມືອງ Irbil ເມືອງຫຼວງຂອງເຂດຊາວເຄີດສ໌ຂອງອີຣັກ ຊຶ່ງທຳມະດາເປັນ
ເມືອງທີ່ມິດງຽບນັ້ນ.
ອົງການຂ່າວ Reuters ຍັງແຈ້ງໃຫ້ຊາບເຊັ່ນກັນວ່າ ມີການວາງລະເບີດທີ່ພາໃຫ້ມີຜູ້ຄົນເສຍຊີວິດ ເກີດຂຶ້ນໃນເມືອງ Tikrit.
ໃນຂະນະດຽວກັນ ທູດພິເສດສະຫະປະຊາຊາດ ຮຽກຮ້ອງໃຫ້ມີການເຄື່ອນໄຫວໃນທັນທີ
ສຳລັບເມືອງ Amerli ໃນພາກເໜືອຂອງອີຣັກ ເພື່ອປ້ອງກັນ ອັນທີ່ທ່ານກ່າວວ່າ ການຂ້າລ້າງຜານຜູ້ຄົນເປັນໝູ່ທີ່ອາດມີຂຶ້ນໄດ້ນັ້ນ. ທ່ານ Nickolay Mladenov ກ່າວໃນວັນເສົາ
ວານນີ້ວ່າ ກຸ່ມອິສລາມຫົວຮຸນແຮງ ໄດ້ປິດລ້ອມ ບໍ່ໃຫ້ປະຊາຊົນໄດ້ຮັບສະບຽງອາຫານ
ແລະນ້ຳດື່ມນ້ຳໃຊ້ ມາໄດ້ເກືອບ 2 ເດືອນແລ້ວ. ທ່ານຮຽກຮ້ອງໃຫ້ລັດຖະບານອີຣັກ ກະ
ທຳທຸກສິ່ງທຸກຢ່າງທີ່ຕົນສາມາດ ເພື່ອທັບມ້າງການປິດລ້ອມ ແລະຮັບປະກັນວ່າ ພວກຊາວເມືອງໄດ້ຮັບການຊ່ອຍເຫຼືອດ້ານມະນຸດສະທຳເພື່ອໃຫ້ຊີວິດຢູ່ລອດ ຫຼືອົບພະຍົບ ອອກໄປຢູ່ບ່ອນອື່ນ.
ໃນການເຄື່ອນໄຫວອີກດ້ານນຶ່ງ ກອງທັບສະຫະລັດ ກ່າວວ່າ ຕົນໄດ້ດຳເນີນການໂຈມຕີທາງອາກາດ ໃກ້ກັບເຂື່ອນ Mosul ເພື່ອຊ່ອຍເຫຼືອການປະຕິບັດງານຮັກສາຄວາມ
ປອດໄພຂອງອີຣັກນັ້ນ ແລະວ່າ ການໂຈມຕີໄດ້ທຳລາຍລົດຄັນນຶ່ງ ທີ່ພວກຫົວຮຸນແຮງ
ລັດອິສລາມ ນຳໃຊ້ນັ້ນ.