ເຈົ້າໜ້າທີ່ອີຣັກກ່າວວ່າ ມີຢ່າງນ້ອຍ 51 ຄົນເສຍຊີວິດ ແລະອີກ 100 ກວ່າຄົນໄດ້ຮັບບາດເຈັບ ໃນການໂຈມຕີ ດ້ວຍລະເບີດສະລະຊີບ ຢູ່ນອກສູນກາງ ເກນທະຫານແຫ່ງ ນຶ່ງ ໃນນະຄອນຫຼວງແບັກແດັດ.
ເຈົ້າໜ້າທີ່ຄົນນຶ່ງ ຂອງກະຊວງພາຍໃນອີຣັກເວົ້າວ່າ ຜູ້ໂຈມຕີໄດ້ແນເປົ້າ ໃສ່ພວກທີ່ຖືກເກນເປັນທະຫານ ໃນວັນອັງຄານມື້ນີ້ ໃນການໂຈມຕີ ຮ້າຍແຮງສຸດຢູ່ ໃນອີຣັກ ນັບແຕ່ເດືອນສັກສິດ ຣາມາດານຂອງ ຊາວມຸສລິມ ໄດ້ເລີ້ມຂຶ້ນ ໃນສັບປະດາແລ້ວ.
ເຫດລະເບີດ ທີ່ເກີດຂຶ້ນ ຢູ່ຕຶກກະຊວງ ປ້ອງກັນປະເທດເກົ່າ ສະໄໝຈອມຜະເດັດການ SADDAM HUSSEIN ມື້ນີ້ ແມ່ນມີຂຶ້ນທ່າມກາງ ທີ່ມີຄວາມວິຕົກກັງວົນເພີ້ມຂຶ້ນ ກ່ຽວກັບຄວາມປອດໄພ ຂະນະທີ່ສະຫະລັດ ພວມກະກຽມ ການຖອນກຳລັງສູ້ລົບ ຈຸສຸດທ້າຍ ຂອງຕົນ ອອກໄປຈາກອີຣັກ ພາຍໃນທ້າຍເດືອນນີ້.
ທະຫານອະເມຣິກັນ 50,000 ຄົນ ຍັງຈະຢູ່ ໃນປະເທດອີຣັກຕໍ່ໄປ ເພື່ອຮັບໜ້າທີ່ ເປັນກຳລັງ ໄລຍະຂ້າມຜ່ານ.
ປະທານາທິບໍດີ ສະຫະລັດ ທ່ານບາຣັກ ໂອບາມາ ໄດ້ຕັ້ງເປົ້າໝາຍ ໃນການຖອນ ທະຫານອະເມຣິກັນ ອອກໄປຈາກອີຣັກ ໃຫ້ໝົດພາຍໃນທ້າຍປີ 2011.
