ເຈົ້າໜ້າທີ່ໃນອິຣັກກ່າວວ່າ ຄົນວາງລະເບີດສະຫລະຊີບສອງຄົນໄດ້ສັງ ຫານຢ່າງນ້ອຍ 46 ຄົນໃນວັນອາທິດມື້ນີ້ ໃນການໂຈມຕີສອງບັ້ນຕໍ່ກຸ່ມ ທະຫານບ້ານທີ່ຕໍ່ຕ້ານພວກອາລເກອີດາ. ຄົນຮ້າຍຄົນນຶ່ງໄດ້ລະເບີດ ຕົນເອງຂຶ້ນ ທີ່ຫ້ອງການນຶ່ງຂອງກອງທະຫານບ້ານຂອງພວກນິກາຍ ຊຸນນີ ທີ່ລັດຖະບານໜຸນຫລັງ ທີ່ເອີ້ນກັນວ່າ Sahwa ຫລື ລູກຊາຍຂອງອິຣັກ ທີ່ເມືອງ Radwaniya ໃນເຂດຕາເວັນຕົກສຽງໃຕ້ຂອງແບກແດດ ຊຶ່ງມີຊາວຊຸນນີອາໃສຢູ່ເປັນສ່ວນໃຫຍ່ນັ້ນ ຍັງຜົນໃຫ້ 43 ຄົນເສຍຊີວິດແລະບາດເຈັບອີກ 40 ຄົນ.
ສ່ວນການໂຈມຕີສະຫລະຊີບຄັ້ງທີສອງນັ້ນ ໄດ້ແນເປົ້າໝາຍໃສ່ກອງປະຊຸມຂອງພວກຜູ້ນຳທະ ຫານບ້ານຂອງພວກນິກາຍຊຸນນີທ້ອງຖິ່ນ ທີ່ເມືອງ Qaim ໃກ້ໆກັບຊາຍແດນປະເທດຊີເຣຍ ເຮັດໃຫ້ 3 ຄົນເສຍຊີວິດ. ເວລານີ້ ຍັງບໍ່ທັນມີຝ່າຍໃດອ້າງເອົາຄວາມຮັບຜິດຊອບເທື່ອ.
ເມືອງຫລວງຂອງອິຣັກແມ່ນໄດ້ປະສົບກັບຄື້ນຟອງແຫ່ງຄວາມຮຸນແຮງ ມາຕັ້ງແຕ່ການເລືອກຕັ້ງສະພາຜູ້ແທນເມື່ອເດືອນມີນາແລ້ວນີ້ ທີ່ບໍ່ມີຜູ້ແຂ່ງຂັນຄົນໃດໄດ້ຮັບໄຊຊະນະຢ່າງຂາດຮອຍ.
