ນັກບວດທີ່ຕໍ່ຕ້ານອາເມຣິກາຄົນນຶ່ງໄດ້ຮຽກຮ້ອງ ໃຫ້ພວກສະໜັບສະໜຸນຕົນ ຢຸດເຊົາທໍາ
ການໂຈມຕີພວກທະຫານສະຫະລັດ ເພາະວ່າບໍ່ຢາກໃຫ້ທະຫານອາເມຣິກັນມີຂໍ້ແກ້ໂຕເພື່ອ
ມີໜ້າຢູ່ໃນອິຣັກຕໍ່ໄປ.
ທ່ານ Muqtada al-Sadr ນັກບວດນິກາຍ Shi’ite ກ່າວຢູ່ໃນຖະແຫລງການສະບັບນຶ່ງ
ໃນ website ຂອງທ່ານໃນແລງວັນເສົາວານນີ້ ວ່າ ທ່ານໄດ້ສັ່ງໃຫ້ພວກທະຫານບ້ານຂອງ
ທ່ານ ປ່ອຍໃຫ້ພວກທະຫານອາເມຣິກັນອອກຈາກປະເທດໄປຢ່າງສັນຕິ. ເຖິງຢ່າງໃດກໍດີ
ທ່ານ Sadr ກ່າວເຕືອນວ່າ ທ່ານຈະເພີ່ມການໂຈມຕີຕໍ່ກໍາລັງຂອງສະຫະລັດຂຶ້ນ ຖ້າຫາກ
ພວກເຂົາເຈົ້າຢູ່ເກີນກໍານົດໄປໃນທ້າຍປີນີ້.
ເວລານີ້ ຍັງມີທະຫານສະຫະລັດຢູ່ໃນອິຣັກບໍ່ຮອດ 50 ພັນຄົນຊຶ່ງທັງ ໝົດນີ້ກໍານົດຈະຖອນ
ອອກຈາກອິຣັກໄປໃນທ້າຍປີນີ້. ແຕ່ວ່າເວລານີ້ ພວກຜູ້ນໍາດ້ານການເມືອງຂອງອິຣັກກໍາລັງ
ທໍາການເຈລະຈາກັບສະຫະລັດ ກ່ຽວກັບວ່າ ຈະຮັກສາພວກທະຫານສະຫະລັດຈໍານວນນຶ່ງ
ໄວ້ເພື່ອເຝິກອົບຮົມທະຫານອິຣັກ ກາຍທ້າຍປີ 2011 ໄປຫລືບໍ?
ບັນດາເຈົ້າໜ້າທີ່ສະຫະລັດແລະອິຣັກໄດ້ກ່າວມາກ່ອນວ່າ ພວກກໍາລັງອິຣັກສາມາດຮັກສາ
ຄວາມສະຫງົບພາຍໃນປະເທດຂອງຕົນໄດ້ ແຕ່ຕ້ອງການການເຝິກແອບໃນການໃຊ້ພວກ
ອາວຸດໜັກເພື່ອປ້ອງກັນຊາຍແດນ ເຂດນ່ານຟ້າ ແລະເຂດນໍ້າແດນດິນທາງທະເລຂອງປະ
ເທດ.
ທະຫານກອງຫລອນ Mahdi ຂອງທ່ານ Sadr ໄດ້ທໍາການສູ້ລົບກັບພວກທະຫານສະຫະ
ລັດຢູ່ໃນອິຣັກມາຮອດປີ 2008 ເວລາທ່ານທັບມ້າງກໍາລັງດັ່ງກ່າວ ແລະເພ່ງເລັງຂະບວນ
ການຂອງທ່ານໃສ່ການດໍາເນີນຂັ້ນຕອນທາງການເມືອງໃນອິຣັກ. ພັກນິຍົມ Sadr ເປັນ
ກຸ່ມນຶ່ງທີ່ສໍາຄັນໃນຄະນະລັດຖະບານປະສົມຂອງນາຍົກລັດຖະມົນຕີ Nouri Al-Maliki.
