ຄາດກັນວ່າ ສະພາອິຣັກຈະໃຫ້ສັດຕະຍາບັນຕໍ່ຂໍ້ຕົກລົງທີ່ຈະປະກອບຄະນະລັດຖະບານ ສະມັກຄີຊາດຂຶ້ນໃນວັນພະຫັດມື້ນີ້ ຊຶ່ງຈະເຮັດໃຫ້ສະຖານະການດ້ານການເມືອງທີ່ຕົກຢູ່ໃນສະພາບບໍ່ຄືບໜ້າມາໄດ້ 8 ເດືອນ ທີ່ເຮັດໃຫ້ປະເທດບໍ່ມີລັດຖະບານປົກຄອງນັ້ນ ສິ້ນສຸດລົງ.
ບັນດາເຈົ້າໜ້າທີ່ຂັ້ນອາວຸໂສຂອງອິຣັກກ່າວໃນຕອນແລງວັນພຸດວານນີ້ວ່າ ຫລັງຈາກມີການພົບປະເຈລະຈາກັນມາເປັນເວລາຫລາຍມື້ ເຂົາເຈົ້າໄດ້ບັນລຸຂໍ້ຕົກລົງກັນຊຶ່ງຈະໃຫ້ນາຍົກລັດຖະມຸນຕີ Nouri al-Maliki ດຳຣົງຕຳແໜ່ງຕໍ່ໄປຕື່ມອີກສະໄໝນຶ່ງເປັນເວລາ 4 ປີ.
ບັນດາເຈົ້າໜ້າທີ່ກ່າວວ່າ ພັກປະສົມ Iraqiya ທີ່ໄດ້ຮັບການສະໜຸນສະໜຸນຈາກພວກມຸສລິມນິກາຍຊຸນນີ ຊຶ່ງເປັນຄູ່ແຂ່ງທີ່ສໍາຄັນຂອງທ່ານມາລີກີນັ້ນ ໄດ້ຕົກລົງຮັບເອົາຕໍາແໜ່ງ
ປະທານສະພາແຫ່ງຊາດ. ພັກ Iraqiya ໄດ້ຊະນະບ່ອນນັ່ງເປັນສ່ວນຫລາຍໃນການເລືອກຕັ້ງ ລັດຖະສະພາໃນວັນທີ 7 ມີນາຜ່ານມານັ້ນ ແຕ່ບໍ່ສາມາດໄດ້ຮັບສຽງສະໜັບ ສະໜຸນພຽງພໍຈາກພັກການເມືອງອື່ນໆເພື່ອຈະຈັດຕັ້ງຄະນະລັດຖະບານປະສົມສຽງຂ້າງຫລາຍຂຶ້ນ.
ຂໍ້ຕົກລົງສະບັບນີ້ ຍັງຈະອະນຸມັດໃຫ້ທ່ານ Jalal Talabani ຜູ້ນໍາຊາວ Kurds ດໍາລົງຕໍາແໜ່ງປະທານາທິບໍດີຕໍ່ໄປ ໂດຍເຮັດໃຫ້ບົດ ບາດຂອງຊາວ kurds ໃນອິຣັກແຂງແຮງຂຶ້ນ.
ສ່ວນປະທານາທິບໍດີເຂດປົກຄອງຕົນເອງຂອງຊາວ Kurds ທ່ານ Masoud Barzani ກ່າວໃຫ້ຮູ້ໃນວັນພະຫັດມື້ນີ້ວ່າ ຜູ້ນໍາພັກ Iraqiya ແລະອະດີດນາຍົກລັດຖະມຸນຕີ Ayad Allawi ຈະເປັນຜູ້ນໍາພາຄະນະກໍາມາທິການດູແລຄວາມປອດໄພແຫ່ງຊາດທີ່ຈັດຕັ້ງຂຶ້ນມາໃໝ່ໆນັ້ນ.
