ກອງກຳລັງຮັກສາຄວາມປອດໄພອີຣັກ ໄດ້ປະກາດໃນການເລີ້ມປະຕິບັດງານ ທີ່ຈະເຂົ້າ ຍຶດ ເອົາເມືອງ Ar-Rutbah ໃນແຂວງ Anbar ທາງພາກຕາເວັນຕົກຂອງປະເທດ ທີ່ເຊື່ອມຕໍ່ ຂົງເຂດທີ່ຄວບຄຸມໂດຍກຸ່ມລັດອິສລາມທີ່ນັ້ນ ລະຫວ່າງຊາຍແດນຈໍແດນ ກັບຊິເຣຍ.
ໂຄສົກກະຊວງປ້ອງກັນປະເທດສະຫະລັດ ທ່ານ Peter Cook ກ່າວຕໍ່ບັນດານັກຂ່າວ ໃນວັນຈັນວານນີ້ວ່າ “ທ່ານສາມາດເບິ່ງຈາກແຜນທີ່ ແລະມອງເຫັນຄວາມສຳຄັນຂອງເຂດດັ່ງ ກ່າວໃນແຂວງ Anbar. ຖ້າຫາກວ່າ ກອງກຳລັງຮັກສາຄວາມປອດໄພອີຣັກສາ ມາດ ເຂົ້າ ຍຶດເອົາເມືອງ Rutbah ໄດ້ ມັນຈະເປັນບາດກ້າວອັນສຳຄັນຍິ່ງ ໃນການຕໍ່ສູ້ ຕ້ານກຸ່ມລັດອິສລາມຫຼື ISIL ແລະເປັນບາດກ້າວອັນຍິ່ງໃຫຍ່ ເມື່ອເວົ້າເຖິງການຕັດເສັ້ນ ທາງລຳລຽງ ຈາກ ຊາຍແດນຈໍແດນ ໃນທາງພາກຕາເວັນຕົກ ໄປພາກຕາເວັນອອກສູ່ນະຄອນ Baghdad.”
ໃນຕົ້ນປີນີ້ ກຸ່ມລັດອິສລາມ ໄດ້ສູນເສຍດິນແດນທີ່ຕົນຍຶດຄອງໃນພາກຕາເວັນອອກຂອງຊິເຣຍ ແລະໃນບໍລິເວນຊາຍແດນກົງກັນຂ້າມໃກ້ໆກັບພູ Sinjar ຂອງອິຣັກ ຊຶ່ງໄດ້ລົບກວນ ເສັ້ນທາງຄວບຄຸມທີ່ເນັ່ງຈາກແຂວງ Deir Ezzor ຂອງຊິເຣຍ ໄປສູ່ເມືອງ Mosul ແລະຫຼາຍໆເຂດທີ່ຢູ່ໃຕ້ລົງໄປຂອງອີຣັກ.
ການສູນເສຍເສັ້ນທາງເຊື່ອມຕໍ່ທາງພາກຕາເວັນຕົກ ໃນເຂດອ້ອມແອ້ມເມືອງ Rutbah ຈະປ່ອຍໄວ້ພຽງແຕ່ເສັ້ນທາງດຽວໃນເຂດເມືອງ Qaim ແລະໃນແຂວງ Anbar ເຊັ່ນກັນ ຊຶ່ງເປັນເສັ້ນທາງສາຍຫຼັກ ທີ່ເນັ່ງຕົງຈາກຊິເຣຍ ສູ່ອິຣັກ ທີ່ຄວບຄຸມໂດຍກຸ່ມລັດອິສລາມ. ເສັ້ນ ທາງດັ່ງກ່າວແມ່ນສຳຄັນຍິ່ງ ສຳຫຼັບການທະຫານ ໃນເມື່ອວ່າມັນໄດ້ຕັດຜ່ານເມືອງຫຼວງ Raqqa ຂອງກຸ່ມລັດອິສລາມ ແລະເນັ່ງໄປຫາດ່ານຂ້າມຊາຍແດນເທີກີ ທີ່ສາມາດລຳລຽງອຸບປະກອນແລະພວກນັກລົບເຂົ້າມານັ້ນ.
ທ່ານ Cook ໄດ້ລາຍງານການຊັ່ງຊາຫຼ້າສຸດ ໃນການຕໍ່ສູ້ໂດຍທັງໝົດ ກັບກຸ່ມຫົວຮຸນແຮງ ດັ່ງກ່າວ ໃນວັນຈັນວານນີ້ ໂດຍກ່າວວ່າ ໃນປະຈຸບັນນີ້ກຸ່ມດັ່ງກ່າວໄດ້ສູນເສຍປະມານ 45 ເປີເຊັນ ຂອງດິນແດນທັງໝົດ ຊຶ່ງຄັ້ງນຶ່ງ ຕົນເຄີຍຄວບຄຸມໃນອີຣັກ ແລະ ລະຫວ່າງ 16 ຫາ 20 ເປີເຊັນ ໃນຊິເຣຍ.
