ທາງການອິຣັກກ່າວວ່າ ເດືອນກໍລະກົດທີ່ຜ່ານມານີ້ຖືວ່າ ເປັນເດືອນທີ່ມີການເສຍຊີວິດຫລາຍທີ່ສຸດໃນອິຣັກ ໃນ ຮອບຫລາຍກວ່າສອງປີຜ່ານມາ.
ໂຕເລກຂອງລັດຖະບານທີ່ນຳອອກເຜີຍແຜ່ໂດຍກະຊວງ ສາທາລະນະສຸກ ກະຊວງປ້ອງກັນປະເທດ ແລະກະຊວງ ພາຍໃນຂອງອີຣັກໃນຕອນ ແລງວັນເສົາວານນີ້ ສະແດງ ວ່າມີຄົນຖືກຂ້າຕາຍ ໃນທົ່ວປະເທດ 535 ຄົນ ໃນເດືອນ ກໍລະກົດ ແລະເກືອບ 1,043 ຄົນ ໄດ້ຮັບບາດເຈັບ.
ຈໍານວນຄົນເສຍຊີວິດດັ່ງກ່າວແມ່ນສູງທີ່ສຸດນັບຕັ້ງແຕ່ເດືອນພືດສະພາ ປີ 2008 ຊຶ່ງເວລານັ້ນມີຄົນຖືກຂ້າຕາຍ 563 ຄົນ.
ອິຣັກແມ່ນໄດ້ຖືກກະທົບໂດຍຄື້ນຟອງແຫ່ງຄວາມວຸ້ນວາຍ ນັບຕັ້ງແຕ່ການເລືອກຕັ້ງເອົາ ສະມາຊິກສະພາແຫ່ງຊາດໃນເດືອນມີນາຜ່ານມາ ທີ່ບໍ່ມີຜູ້ໃດໄດ້ຮັບໄຊຊະນະ ຢ່າງຂາດຮອຍ. ບັນດາເຈົ້າໜ້າທີ່ອິຣັກຢ້ານວ່າ ພວກກໍ່ກະບົດອາດກຳລັງສວາຍໂອກາດເອົາປຽບ ຈາກສະຖານະ ການທີ່ບໍ່ໄປບໍ່ມາທາງດ້ານການເມືອງ ເພື່ອພະຍາຍາມຈະທັບມ້າງຄວາມ ຄືບໜ້າທີ່ໄດ້ກະທຳມາທາງດ້ານການຣັກສາຄວາມປອດໄພນັ້ນ.
ຕົວເລກລ່າສຸດ ແມ່ນໄດ້ຖືກເປີດເຜີຍໃນເວລາທີ່ກອງທັບສະຫະລັດພວມກະກຽມທີ່ຈະຖອນກໍາລັງສູ້ລົບອອກໄປຈາກອີຣັກ. ຮອງປະທານາທິບໍດີ ສະຫະລັດ ທ່ານໂຈ ບາຍເດັນ ໄດ້ເນ້ນຢໍ້າຕໍ່ປະຊາຊົນອາເມລິກັນ ໃນອາທິດແລ້ວນີ້ວ່າ ທະຫານສະຫະລັດ ຈຳນວນ 9 ໜື່ນ 5 ພັນຄົນຈະຖືກສົ່ງກັບ ສະຫະລັດ ແລະຈະຍັງເຫລືອພຽງ 5 ໝື່ນຄົນຢູ່ໃນອີຣັກພາຍໃນ ທ້າຍເດືອນສິງຫາ ເພື່ອຊ່ວຍເຝິກແອບກຳລັງທະຫານຂອງອີຣັກ ແລະປົກປ້ອງສະຖານທີ່ ຕັ້ງຕ່າງໆຂອງສະຫະລັດໃນອີຣັກ.
